Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Wednesday, March 31, 2010

بركان غضب

احساس جميل انك تكون ... بركان غضب وسط السكون
اخرس و ملا بقه الكلام
و ضميره مش عارف ينام
في وسط غفلة م العيون

عالم كبير والعقل فيك ... والجهل لازمك ومخاويك
والدنيا شغلت كل همك
وغمت عينيك بنضارة شيك

نضارة سودة حابسة الاضاءة
بتقسي قلبك ... تمحي البراءة
تخدع عينيك بلون سوادها
تبقا العداوة زي الصداقة

وممكن تشوف بيها الحقيقة
في نفوس تبان هادية وبريئة
وجواها نار بتأيد وتطفي
وكل قلب وله طريقة

احساسي حالا بأني ناضج
بطلت اكون جوايا ساذج
الدنيا عندي مش مساوية
اتبنى قدوة او نماذج

انا قدوتي ... وجوايا صالحي
وليه انسان يحكم مصالحي؟؟؟
ويفرض نفسه وهواه عليا
في وقت زعلي ووقت فرحي

ابكي وقت ماكون عايز واضحك وقت مايحلالي
صغير اه ماشي وجايز..مش معنى كده عقلي عيالي
كأسنان المشط مخلوقون
متساويون حسب القانون
بس القانون لو فرد حاكمه
حيكون تطبيقه شئ خيالي

رائد فضاء حامل لواء متمرد وزنه عالجاذبية
فاقد الزمن حتى التمن مسمعش سيرته من سنين ضوئية
لان عيشته عيشة مختلفة ولا همه منصب ولا يكون الألفا
راضي بقليله على عكس جيله غاويين الذل وبلاها حرية
يجرو ورا صيت واسامي وورا الفلوس والترقية
ومات اختراع اسمه التضحية
وسكنت قلوبكم الانانية

Ms3a_miso

Thursday, March 18, 2010

الفهلوي

اكتر حاجة بتخنقني في عيشتي الاحبااااااااااااط ...تعرف يعني ايه لما تكون بتعمل اقصى حاجة عندك وحاجة فرحان بيها ...ويجي واحد تافه بكل بساطة يقولك ايه القرف ده
وممكن فعلا يكون شغلك ده مقرف اوي اوي اوي ....بس في عين امه غزال
ممكن واحد تاني يقول دع الخلق للخالق وانا اقولله ليه حاجة حلوة او وحشة
وده غلطان والغلط راكبه من ساسه لراسه لانه اناني ومش بيفكر غير في نفسه عايز نفسه هو وبس اللي يتنفس كل الهوا والغلاف الجوي ويسيب اللي عايشين معاه في نفس البيئة المحيطة يموتو مشنوقين بضيق التنفس
وممكن واحد تاني يقول طب انا حنبهه للحاجة دي بصنعة لطافة وجمال ورشاقة في الكلمات
يعني يجي ويقولله بص يا برنجي نايس مجهود بس يطلع منك احسن

لكن لو الموهبة مش موجودة اشاسا يبقا يفضل الاجابة رقم واحد وهي انك تقنعه انه يسيب الجريمة اللي هو بيعملها ويشوفله شغلانة تانية

لان الانسان مش شرط يكون مولود بكل حاجة...والا بقا يكون هو بيعمل كده عشان شاف حد بيعمل كده ....وبيقول اشمعنى انا ....ودول موجودين كتيييييييييييييييييييييييييييييييييييير

الواد الفهلوي اللي مقطع الدنيا تجطيع ...اللي يعمل كل حاجة ويقنع الناس انه بيعملها صح ..واللي بيعمله ده يمكن وصفه ب" شكل بطن رجل واحد رجله كبيرة ومغروسة في الطين في شهر اغسطس في عز الشتا في عز الشتا في عز الشتاااااااااااا" اسف اندمجت

اللي هو الواد الفت النت اللي معلق عالرشاقة الف وخمسميت بت
و اللي يعدي من خرم ابرة ولا اجعصها خيط وكان فاضله شوية ويمشي على الحيط

واللي تسأله بتعمل ايه في حياتك " يروح قايلك شوف اباشة انا مودلز ومدرس تاريخ وعلوم ورياضة وفزلفة و بدرب ناشئيين منتخب مصر في زراعة الهوا ...والكلام اياااااااااه بتاع كل مصر
انتا ماتعرفنيش دانا وانا وانا وفي الاخر بببببب كله على فشوش مع انه كان من وية جايبلك مالاخر وعاملك من البحر طحينة

و لو مسكنا نموذج واحد وفرطناه من نمازج المجتمع وحبينا نشوف الفهلوي حيعرف يجمع كام في المية من صفات الديزينر اللي على حق
لو شفنا الديزينر ايه مواصفاته
-يكون بيعرف يرسم
-تكون قدرته على الابتكار 100% اذا لم تكن اكتر
-عارف اساسيات التنفيذ او الدراسة الانشائية للتصميم
-متخيل ممتاز للماتيريال
-لبق وحسن المظهر
- واثق في نفسه
-قادر على العمل تحت ضغط سواء من مواعيد تسليم او القدرة على الوصول للجمال ومش الكروتة
-ارضاء الزوق العام

لو طبقنا الكلام ده على فهلوي حيجمع 40 % من الكلام ده بس اصلا الملكة مشمخلوقة معاه
هو حاول ...بس معرفش
وللاسف عندنا في مصر الحكاية دي كتييييييييييييييييييييييييييييييييييييييييييير
وكل مصر فهلوي..ولكن ليس كل فهلوي مصري مع ان الفهلوة مش موجودة غير عندنا

حتى مجالي مجال العمارة والتصميم المعماري كان للاسف في وقت عمل المساكن الاقتصادية وقت ما كان اغنى واحد في كل شارع صاحب مهنة لموأخذة واطية
مكوجي سباك الخخخخخخخخخخخ
كان الوقت ده المقاول هو اللي بيقول حعمل عمارة ..من غير ما يفكرهل العمارة دي صالحة للسكن الادمي ولا لا هو كل همة يسكن ناس كتيييييييييييير وميدفعش كتير عشان يكسب اكتر
وهكذا وهو الكسبان
انهاردا الحج صلاح ابويا ....قاللي يا واد يا ميسو الانسان لو موراهوش حاجة تعاقبه يبقا مش حيشتغل
طب وليه ده كله؟؟؟؟؟؟؟ليه الانسان مش بيجري صح الا لو وراه كلب بيجري وراه
او رئيس شغل بيتنطط عليه وبيزله؟؟؟؟؟؟؟؟
طب ليه ماتشتغلش عشان عايز تشتغل؟؟؟ عايز تطلع مجهود
على فكره امتع احساس بيحسه الانسان وقت ما يتعب اوييييييييي ويحس انه عمل انجاز عشان يشوفه قدامه ...مش عشان يقولو فلان ده بيأبض كذا فا يبقا كويس

انا لو رئيس جمهورية ...حمنع المرتبات ...الا للناس اللي تعبت بجد

محمد عبد المنعم عطية ...من امام خيالي الواسع

راديو عالنت

Tuesday, March 16, 2010

الارض عرقانة

http://www.youtube.com/watch?v=T2vfGkvd9lo

قبل التحية بقول القضية ...اصل القضية في الحلم غية
وحمامنا طاير في الجو لافف ..حوالين سفينة الديموقراطية
وسحابة ماشية ومليانة مية في افق فداديننا الافتراضية
احلام مغروسة في ارض بور ..ياما حلفت بماضيها الطيور
والشمس نزلت في اوطى نقطة ..وسلمت للعتمة القضية
شرق المحيط من كتر ظلمي وحالف لايغطي البرية
والارض ثارت وبان حمارها واتجاوز دمارها الاحصائية
والقشرة رقصت مع كل دبة بعزمي خطيتها رجليا
ولمبة نهارنا اتحبس شعاعها وكاتمة اهاتها وحايشة اوجاعها
يلا افرحو يا كدابين ...اصل التلوج راح تبقا مية

من كتر التلوث ازداد عمانا ومن كتر الصهد الارض عرقانة
وهدومها عصرة و100 فرد واسرة متشردين بقالهم سنين
مابقتش شايفة عيني قدامي ولاحد حاسس بألامي
ولا حد ينجد لا امم متحدة ولا الف منصب واسامي
اصل الشبك مشافش المية من سنين والعنكبوت عشش خيوطه عالصيادين
والنت نتن و الهم سّكن كل الشوارع والميادين ..بالعصباجية والشحاتين
والحرب ولعت بالهيدروجين ... والذرة مهمهاش مساكين
واليتم نال من كل واحد والكفر بيّت في كل جاحد
والرحمة طفشت من قلوبنا ومن عمانا مش شايفين ..ومن عمانا مش شايفين

Sunday, March 7, 2010

جايزة احسن شطافة

بعد سنتين من التعب والشقا في الكلية ....وعلى اخر الزمن ....وانا نفسي لسة في الدنيا
و حي لا ارزق
في لحظة
قررو يدونا مشروع فما عساه يا ترى؟؟؟؟
واذا به بمشروع
حمامات وجراش
على اخر الزمن
ناس في سنة تانية عمارة
بدال ما يخدو عمارة سكنية بكل بساطة ...يكون مصيرهم في حمامات وجراش
لا وايه تحت الارض
واحد مجنون يسألني واشمعنا تحت الارض
اقوله اكيد عشان يدفنو مواهبنا
طب ليه يا جماعة مديتوناش عمارة سكنية ولا حاجة يكون مشروع كبير
قال.... احنا الدفعة الوحيدة اللي ضعيفة في الحمامات والجراشات........واصلا ناس متخرجين مايعرفوش يعملو حمام
وكان نتيجة للمشروع ده ...اننا اتنمرنا مابين الدفعات وفضيحتنا بقت بجلاجيل... وشخالييل
واصبحنا مصدر شماتة طلبة اولى عمارة اللي لسة مايعرفوش البيضة بتفقس ولا بتولد واللي اخدو مشروع "مكتبة" بسلطاتها
ببابا غنولها
وعندهم مساحة للابتكار...بس احنا جراج وحمامات وتحت الارض...لا مش كده وبس ويا حبذا من بعض المعاناة
فقد تقدم ميعاد التسليم 3 ايام بدل ما يتأخر ...ونتيجة لكدا ناس كتير سلمت اي كلام
واي كلام دي تحتمل 3 حاجات ..شغل مش كامل بس فكرة حلوة
او شغل مش كامل وبايع الاضية
او شغل كام تقريبا بس مش اوي وفكرة لم تنضج بعد او عمل كده عشان الناس فضلو يتحايله عليه عشان يسلم
وده اللي هو انا
بعد معاناة مع الشيطان اللي بتعارك معاه كل مشروع
واتنرفز عليه واتخلق على اللي في البيت تقولشي ضاع مني كاس امم اورونبا يا خي
على الرغم ان بشمهندسة هوبيز ربنا يسترها ويصبحها ويمسيها بالخير قالت جملة مفيدة... وحياة ابلة مفيدة
قالت ايه ...قالت يا واد يا ميسو الحكاية مش حكاية انك تعرف او ماتعرفش "تطلع مشروع" هو الموضوع موضوع وحي
وشد تحتيها 20 خط وكارت شحن من ابو 100
يعني ان جالك الريح افتحله شباكك ..ولو مجالك يبقا ريح بالك
ومافيش حاجة بالغصب...كل شئ بالخناق الا الديزاين بالوفاق... ويا بخت من وفق راسين في الزريبة
ام هند
وبعد ما اقول كل مرة مش حسلم... بضعف قدام الحاح الجميع وبنزل على فشوش زي المعلم حنفي واقول خلاص حتنزل المرادي
وكل مشروع وانتو طيبين
واسلم
وبعدين اجيب نفس الدرجة هي هي في كل مرة ....ربنا يستر عليا بقا انا شكلي حسقط السنة دي
وافضل اقول لنفسي زي كل مشروع اهدى يابني انتا مستقبلك مش هنا ... كلام بيرضي الغرور ...بس بيحسس الانسان بقيمته
مهما كانت قيمته الحقيقية اعلى او اقل
زمان كان اعتقادي ... ان الناس اللي شبه بعض بيكونو في حتة واحدة...بس ده تعريف منقوص
لييييييييييييييييه؟؟؟
الناس اللي شبه بعض في كل حاجة" الا حاجة واحدة" وهي الشخصية
الدبلوماسي دبلوماسي ...بس طيب ولا شرير نضيف ولا مرتشي كداب ولا صادق ...الخخخخخخخخخ
بس هو في الاول او الاخر "دبلوماسي" يعني ايه؟؟ يعني ربنا كاتبله انه يكون كده مهما كانت شخصيته
يعني ممكن شخصيته تتغير بس بردو كاتبله نفس الوظيفة وفي نفس الوقت ممكن لا
وده بينطبق علينا كا مصريين من نفس الطينة اللي مطينة بطينة
ايه الفرق بينك وبين واحد هولندي؟؟؟؟؟؟؟؟؟هل مثلا السمنة ليها علاقة بوصولهم لكأس العالم؟؟؟؟
هل رشو الحج بلاتر بصفيحتين سمنة هولندي؟؟؟؟ على الرغم ان السمنة الهولندي غالية وشاحة من السوق
وعلى الرغم من كده طلع من عندهم الحج العالم اللي جه عندنا الكلية عشان يقول الحاضرة عن الشواطئ واللي محدش فهم منها حاجة اكمننا نوابغ ....بس كان ينقص الترجمة اكمن النبي عربي
ما علينا
طب ماهو الكابتن الهولندي اللي جه كان بيتكلم عن الشواطئ ودي مالهاش ادنى علاقة بالعمارة في حد ذاتها الا بمقدار 20 % نابعة من التخطيط اللي لسة حناخده ..بس لازم ناخد كل حاجة بمحمل جدي ماهو ناس كتير فعلا مافهمتش حاجة ومنهم انا والكلمة والوحيدة اللي اتفهمت هي
thank you
صحيح اننا مجتمع سطحي...بس بردو عندنا انتقادات دايمة ...انتقدتها انهاردا..في المحاضرة قلت الضمها في نفس السلسلة مع البوست
مافيش مكان للكاميرا مناسب عشان تتحط فيه عشان التسجيل
اكمن الراجل اللي كان بيصور ده كان متضايق قوي اكمن الناس كانت بتعدي قدام الكاميرا وهو بيصور ...وكلهم ماشاءالله من دفعتنا
يا اما كان بيصور والناس بتعدي من وراه وكانت بردو مافيش مسافة
حاجة كمان .. الدكتور خالد الديب وبشمهندس احمد الزيات كان بيقول ارجو ان الناس ماتسيبش المحاضرة وتمشي والراجل بيتكلم كانوع من الادب.....ناس كتير اوي مسمعتش الكلام وراحو خالعين ...قال يعني بقا الفرعنة على العلم مقطعة بعضها....ومعجبتهمش المحاضرة
حتى لو معجبتكش المحضرة يا عم الحج ...خليك كانوع من الاحترام خليك موجود....
حاجة كمان ..احنا عندنا حكاية الخوف على نظرة الاجانب لينا حتى لو كانو من ساحل العاج....خايف على النظرة يا معلم يبقا متداريش ...عشان هما مش بيدارو يعني ماتعملش الغلط وبعدين تخبي عشان مايقولوش عليك كلمة كده ولا كده

طب ليه ماتبقاش كويس من اولها؟؟؟؟؟؟؟؟ حرام مثلا؟؟؟؟؟؟؟ يعني الراجل اصلا لو كده عيب انه جي كلية فنون جميلة ويلاقيها موسخة للدرجادي!!!!!!!!!! ايه ده والناحية الشمالية من الكلية دي حتتنضف امتى؟؟؟؟؟؟اصلا وايه سر حبنا للمبنى الكلاسيك ده؟؟
عشان مش عارف مين سابه من ايام الخديوي محسن وزكرى واثار...طب اثار حطه في متحف.... اديه لفنون هما اللي يقدرو القديم
ايعجز معماريون مصر عن صنع كلية تعليم الصنعة ؟؟؟ ام باب النجار مخلع؟؟؟؟؟؟
حرام نعمل ديزاين لكليتنا من تاني نخلي العالم يحلف بيها؟؟؟ولا حبنا للقديم مهما كان سوء وضعه سيطر علينا للدرجادي؟؟

اللي اعرفه حاجة... عبد الوهاب... مات واتدفن .... ماتحنطش عشان الناس تتفرج عليه ويقولو عبد الوهاب...بيكتفو بس بالبص على صورته في الافلام
لو حنفضل نحافظ على المباني المهكعة عشان خايفين على التراث في خلال 50 سنة مصر حتخلص عشان مش لاقيين مكان نبني عليه حاجة جديدة

في اورونبا والدول المتقدمة ....بيهتمو بالتفاصيل اوي اوي اوي اوي .. واكمن مرات عمي عايشة في المانيا فا معقداني في عيشتي بألمانيا واللي بيحصل فيها هناك حب التفاصيل في كل شئ لدرجة ممكن يهتمو بالشطافة والسيفون بالشكل
وممكن يعملو مسابقات تخصصية في الحاجات دي كمان

التشط مليان غسيل
والهدوم متوسخة
والدموع عالخد تسيل
واه من كتر الانزحه
مناخير ابو الهول متكسره
والهم رجعنا لورا
يا شماتت جيراننا فينا
ماحنا خلاص مالهم بقينا
بين الشعوب متكدره
وغلبي....
بس خلاص

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com