Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Friday, April 30, 2010

الانسان اصله فراغ

احنا عايشين ليه ؟؟؟.. حد سأل نفسه؟؟ يعني الدنيا دي معمولة ليه في الاساس يعني ايه الهدف؟؟؟
هل هي مسلية مثلا؟؟؟ ماهو كان ربنا كان يقدر يسامح آدم لما اكل التفاحة وهو فوق ؟؟؟
ليه العقاب ده؟؟؟ ده عقاب اشد من النار .. تخيل نفسك فرخة ومعاك تعلب في حلبة مصارعة رومانية..
يعني الحاجة وعكسها في مكان واحد انتا والشيطان في حتة واحدة ..ولانك فرخة فا اقصى مدة تقدر تطير فيها .. عشان تهرب من الشيطان هي .. 13 ثانية ... وبعديها مضطر تلمس الارض تاني عشان يتملك الشيطان منك تاني .. ده لو كان مابيعرفش يطير

في اكتر من كده عقاب؟؟؟؟ واصلا ليه الدنيا تلت ابعاد والرابع الزمن والخامس الحركة والسادس الاستمرارية والسابع ليه بيدورو عليه
يعني ليه الدنيا مش تو دي ونخلص بدال هل ده مثلا عشان نعرف نهرب من العربيات اللي ماشيه في الشارع؟؟
اصلك لو انتا تو دي حتبقا العربية تو دي بردو ..لانك مش معقول تخترع حاجة مش في منطقك لان اوبشن الثري دي مش متسستم عليك
يعني عندك المية بيتغرق فيها لكن ماينفعش حد يعمل حاجة عشان يولع في نفسه تحت المية

واصلا العقاب الاكتر هو انك مش موجود لوحدك .. موجود معاك ناس ... يعني عقول غيرك مش انتا وهو نفس الاسطمبة والا حتحس بملل .. والناس اللي معاك مضطر تتأثر بيهم او تأثر عليهم .. ممكن واحدة مثلا تتخيل انك بتحبها
عشان تهرب منك وفي الاخر تتجوز صاحبك .. على الرغم انك اصلا مابتحبهاش ..يعني القدر يفرض عليك انك تكون الشخصية الرخمة اللي في الافلام العربي اللي بيبقو شبه حرامية السيما دول
وللاسف بردو الناس دي ممكن تكون صفاتها وحشة..ويفترض انك ماتصدقش حد
.. يعني تخيلو ان دليلة مكانتش بتحب شمشون؟؟؟؟؟
ايون... لان شمشون ده كان فتوة كان متخانق مع حبة شباب كده فا حبو ينتقمو منه ..
فا اجروله واحدة اللي هي دليلة .. وادوها شوية فضة كده عشان تمثل انها بتحبه فا يعترفلها بسر قوته
....
اصل الانسان موجود هنا على الارض عشان يعرف قد ايه هو ضعيف ...ويخدع نفسه
يعني انا مثلا واحد بيكتب شعر ...توتالي الكلام اللي بقوله ده مش من عندي
اصلا ده انتا بتبقا قاعد في امان الله كده تلاقي كلام راح مزرع في دماغك كده منغير اي ترتيب
حاجة من عند ربنا .. تخيل يعني ربنا هو اللي يألف .. وانتا تتشهر ؟؟؟؟؟
؟؟؟؟
ماهو اصلا انتا كان ممكن تبقا زيك زي البطيخة ماتفرقش كتير بس هو انا ليه بفكر ؟؟؟ عشان انجح في الامتحان؟؟؟
طب اللي هو انهي امتحان دهون؟؟ امتحان الثانوية العامة؟؟؟
اللي هو حاطه انسان بردو؟؟؟.. واللي اصل حخلصه عشان ادخل الجامعة ؟؟
عشان اتخرج اشتغل او مشتغلش و اتجوز او متجوزش و اخلف او مخلفش واكبر واعيا واموت؟؟؟؟؟
طب وبعدين ... مكان آدم فوق يتعاقب وخلاص ؟؟؟
ماهي الحياة اصلا بطيخة احنا اللي عاملنها يا عم .. يعني ماسمعتش عمري ان ابو لهب كان بيقترض من بنك اتش اس بي سي عشان يجيب عربية عشان يتمنظر بيها على الكفار
واصلا زمان اهتماماتهم كانت مختلفة تماااااااااما
يعني اصلا كل اللي احنا بنعمله دلوقتي من تصرفات آدمية .. نابعة من البهيمة اللي انتا بتتنطط عليها عشان ربنا خلقك بعقل وهي لا

كل صفاتكو .. تخيل ان بتعوم زي السمكة .... بتحارب انسان زيك عشان تتجوز واحدة بتتخانقو عليها زي الماعز الجبلي
طيبتك في الحمار اللي بعد كل الاهانة بيرجع ويطيع صاحبه .. غدرك في الجمل .. اللي بيغدر بصاحبه بعد مابيستحمل منه كتيييييييييير اوي من أرفه
ده حتى طريقة الدفن اللي موجودة عند كل الاديان .. متاخدة من الغراب اللي اتدفن ساعت ما قابيل قتل هابيل

بس حيجي واحد يقوللي ..عمرك شفت حيوان بيهجم على حيوان زيه عشان ياخد بلده وارضه الانسان هو الوحيد اللي كده
.. حقوله لا على فكرة ده موجود في مخلوق بس مش حيوان موجود في حشرة
النمل مش بس منظم ده منه مدمر
النمل الابيض اللي بياكل الخشب .. تخيل زمان ان حبة نمل كانو يقدرة يوقعو بيتك؟؟؟؟
بس مش هو ده اللي بتكلم عليه اللي بتكلم عليه .. النمل السفاح ...
وده كان زي الانسان بالظبط
ده كان بيلم بعضه ويروح على مكان نمل عادي ..
ويتعارك معاه لحد مايغلبوهم ياخدو ارضهم و ومش بس كده .. دول بيشغلو النمل اللي موجود اصلا عبيد عندهم عشان يجمعولهم اكل عشان الشتا

الكوكب اللي عايشين فيه ده مرتبط ببعضه ارتباط فظييييييييييييييييييييييع
يعني الواحد ممكن يكون مرتب لحاجة معينة عشان سبحان اللي تطلع حاجة تانية
عارفين طبعا ان في اختراع اسمع الشوارع؟؟؟؟؟
جوة الشارع في حاجة اسمها اشارة مرور .. تصدقو انها كانت معمولة قبل ما العربيات ماتطلع؟؟؟
..واصلا حاجات كتير في دنيتنا كده زي ماحمد حلمي قال
انا مرة كنت برسم كبري لقتني رسمت واحد صحبي

وسبحان الله اصلا ماهو احنا في اول وجودنا مكناش كده ... داحنا اتطورنا كتيييييراوي
وعلى الرغم من كده مش كل اختلافتنا واحدة كل حبة ناس ليهم عقلية مختلفة
اصلا هو ليه بتوع افريقيا سود؟؟؟ هل هي جينات؟؟؟ على فكرة لا هي مش جينات
لان لو كانت جينات فا معنا كده ان ادم كان اسود ومدام ادم اسود يبقا احنا كمان سود ... بس ده مش صح

انا بقول كل الكلام ده عشان اقول وما أوتيتم من العلم الا قليلا
واحنا اصلا ايماننا بربنا كل مادا بيقل عندنا وبيزيد عند ناس تانية.. في دنيا اصلا احنا اللي عملينها
وبننشغل بحاجات في الاخر احنا اللي عملينها .. لا وشوف الهيافة ... بنخاف منها

واحد خايف على مستقبله ... على الرغم ان هو اللي بيعمله
نجحت؟؟؟ اشطة يا عم مبروك ... منجحتش ... طز قدامك سكتين يا تحاول وتنجح
يا تشوف حاجة تانية وتنجح اكتر
.. عيشو مع نفسكو الانسان عبارة عن هوا

مواااااااااه .. قشطة فل عليكو
محمد عبد المنعم عطية ... راديو عالنت

Sunday, April 25, 2010

انا والعذاب و صلاح

ممكن البعض يفتكر بالعنوان مثلا اغنية انا والعذاب وهواك للعبقري محمد عبد الوهاب
بس هي حكايت ابويا مع غيري و معايا
على قد ماهو روحه فيا ... على قد ماهو ماروحه فيا بردو
فاكر كويس ايام زمان الثانوية العامة ازاي كان حنية الدنيا فيه ...لدرجة اني لما كنت بوصل لحالة اليأس
كنت بقول انا مش حدخل الامتحان ... كانت الجملة دي بالنسباله مش مشكلة ..
كان بيقوللي .. مش عايز تدخل الامتحان بلاش.. التعليم مش جي على هواك مش لازم تكمله
بس ساعة ماكان بيقوللي كده ...كان بيصحي فيا احساس ارخم من اليأس

احساس الفشل والهروب من الواقع

فا مابيبقاش قدامي حل غير اني اكمل...ومافيش غيره بيعرف يعمل معايا الحركة دي
كتير اوي بتخانق معاه.. كأي واحد يعني ... واكبر خلاف بيستمر يوم ..
و لاني منغير ما اصالحه هو بينسى اصلا اننا متخاصمين وبيكلمني عادي

واكتر حاجة بتخنقني بقا فيه ..لما يكون بيكلم اي حد في التليفون .. ويروح قايله خد محمد عايز يكلمك
انا الجملة دي بتستفزني من جوة ... جملة مستفزة تنين ... ياعم انا مش عايز اكلم حد انا حر
مش في المود ..مش طالبة معايا ابدا

بس اكتر حاجة نرفزتني فيه .. قالهالي انهاردا ... قاللي ان واحد صاحبه كان ربان على مركب .. ايام ما كان بابا في شغله القديم
فا كان الربان ده من كتر الفراغ مابين السما والمية .. كان بيكتب شعر ..
وعنده حاجات كتير اوييييييي
وكان بينشر حاجاته في الاهرام وكده يعني

فا قاللي ان الربان ده كان كل مايرجع من سفر ولا حاجة يجيب لبابا مجلد فيه اشعاره ..
تصورو ايه ردة فعل لانسان متعلم ...
كان الربان ده اول مابيمشي ..
يروح بابا " مقطع المجلد اللي الربان اداهوله " يانهار اسووووووووووووووود
ازاي تعمل كده ... انا اول ما قاللي كده كنت حتجنن
يعني واحد تاعب نفسه عشان يفكر .. وبيعرض عليك شغله اللي المفروض مايعرضوش اصلا
وانتا بكل بساطة ............تقطعه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لا والمصيبة اني انا طلعت بكتب شعر ... شوف ربنا بقا

وغالبا ده حيحصل فيا .. او قد يكون بيحصل ... ماهو ذنب ناس بتخلصه ناس

Friday, April 23, 2010

ميسو سنة 30

نشيد بلادي من اروع ما عمل سيد درويش .. بس ده مش نشيدنا ايوا مش نشيدنا ..
لاني انا مش ميسو2010 انا ميسو سنة 30 ... وعلى ايامي مكانش في النشيد ده
على ايامي كانت ايام غريبة اوي .. ايام الضلمة والضرايب والانكليز.. وجوني الهلاس بتاع البارات
والجواسيس والخونة .. والابطال والبندقية الرش والنبل اللي كنا بنستخدمها في مقاومة الانكليز ..وعفريت الليل بسبع رجلين
كان الوطني مننا ينزل يجاهد بالنبلة طول النهار ويتنشأ على اي عسكري انكليزي من ايتها حته
ايام بديعة مصابني ..والشيخ سيد درويش وسلامة حجازي
كان اكبر هلاس فينا حشاش وكان الحشيش مزاج كمان مش ادمان
كان النفر مننا بيقبض لما يكون محترم 3 جنيه .. كنا عايشين ومستورين ...كنا بلد مزة عين العالم عليها .. وبيمشو وراها شوراع عشان يصطادوها ..دنا بلدي من كتر ما كانت جميلة كانت كان الانجليز مبرطعين فيها بس بيني وبينكو انا على ايامي بردو كنت زيكو مكنتش عجباني حالي .. بقبض 3 جنيه
ومش عاجبني الملك ..وكان المللك ظالم قد اييييه وموافق على وجود الانجليز لدرجة انك مش قادر تستحمل انك ممكن تكون انتا واجليزي نايمين في نفس الاوضة
بس ده مكانش بيحصل لانهم كانو بيعملونا على اننا درجة تانية وهما درجة اولي
هما يأبضو كل الفلوس هأ ويسيبونا احنا نسف الفتافيت
ومكانش بيصبرنا عالفقر الا الحشيش ...ده من كتر الحشاشين والسكارية في مصر عندنا وعلى ايامنا
سيد درويش عمل لحن عشان يهزأنا فيه اسمه التحفاجية .. تبقو دورو عليه في موقع انتا انبوبة
عشان انا لسة في سنة 30 وفي الانجليزي ضايع .. اصلي مش ابن زوات ولانيش ابن قنصل
دانا حيالا ابن بشكاتب بيقبض جنيه في الشهر وبيديني مصروفي قرش ابيض بالكتير
ده لما اكون ساعتها غني وكنت بجري عند بتاع البطاطة واخلص الفلوس عنده

بس كانت ايام جميله على الرغم من كده .. وكنا بنحب بعض اوي ..مايغركوش الزحمة اللي عندكو ..احنا كانت البلد فاضية عشان كده كنا بنحب بعض
ودي مالهاش حل غير اننا نعمل مصر تانية في مصر . ونبقا مصرين " بين مصرين ومية " هأو
اصلي بقلش .. على فكرة احنا كنا بنقلش بردو بس بدال مانقول لول كنا بنقول هأو
على فكرة احنا كنا عرب بنحب بعض اوي
وكنا بنساعد بعض في حروب كتيرة اوييييييييييييي يالا الله يجازي اللي كان السبب
احنا شعب عظيم ورخم في نفس الوقت ..رخم عشان محدش بيستحملنا
الهكسوس قعدو كام سنة وماستحملوش وطفشو
التتار وهما بيحاربونا عرفونا عشان كده قالو يالا بينا نخسر يا عم بلاها مصر
الانكليز هما الناس الوحيدة اللي استحملونا بس قعدو كتير وطفشو من وشنا بعد كده
وده لانهم شعب رخم تنيين
اما اليهود بقا فا شكلهم هما دول اللي حيبقو على قلبنا لحد مايحلها ربنا
بس على الرغم من كده احنا شعب عظيم متوحد
شعب فحت قناة السويس وبنا الهرم ....تعرفو ايه كمية الملل اللي في الدنيا لما تقعد تنحت في حجر كتيييييييييييييييييييييير اوي
احنا استحملنا ده ...مستحملين مصر عشان احنا اللي عملينها كل خرم فيها ..
واحنا اللي بنعمل البعبع ونخاف منه
ولما البعبع يخاف بنخاف عليه
ونجري عشان نحميه
نلعن في سلسفيلها وبردو بنحبها ..في كل عصر مش في عهدكو بس..
لعلمكو احنا كمان كنا كده ...طب ايه رأيكو بقا انا بحن لايام عمرو بن العاص .. دانا بقا ابو جدي كان بيحكي لجدي اللي حكالي ان ايامهم كانت الدنيا حلوة والناس طيبين وبيخافو على بعض
وبيحبو بعض
مصر دي ام العجايب وشعبها رهيب
نشتم في امها ..وبردو بنحبها
بنحبك يا مصر

محمد عبد المنعم عطية
راديو عالنت

Monday, April 19, 2010

يا صاحبي لو بعتني حخلي التمن غالي

يا صاحبي لو بعتني حخلي التمن غالي ...
حخليك تحس بوحدة وتتألم من الشدة..
لكنك بالنسبالي ماتجيش على بالي

يا صاحبي لو بعتني حخلي التمن غالي
... حتحس طعم الفوز باسل مالوش الوان
..ولا يفرق معاك كستور من بفتة من كتان
اصل الوحدة دي داء بيمص احساسك
وملازمك زي صداع متملك من راسك
مش طايق حتى كلام ...روح حرب قاتلة سلام
بتندم على نقطة شر بتعكر اخلاصك

يا صاحبي لو بعتني حخلي التمن غالي
مين قال ان الصاحب ده مرايا من صاحبه؟؟
ماهو ممكن ميكونش هواه ومايجيش على طلبه
وممكن يكون له مراية بتكمل اللي ناقصه
وبردو ممكن تكون بتدل على عكسه
عمر مالصحوبية .. ماتكون بالندية
معنى الصحوبية
حب و مشاعر حلوة ملفوفة بتضحية
والطيبة ليها فيونكة
كمانجة وشجن هارمونيكا ..
بترقص عليها السما في سهرة ليلية

يا صاحبي لو بعتني حخلي التمن غالي
يمكن خسارتي انا ارقام من المية
وقصادها ضاع منك معاني انسانية
معاني حب صديق خايف على صديقه
فوانيس في وسط الضلمة تنور لصاحبه طريقه
الدنيا خد بزيادة .. مش هات بأنانية

صاحب يشيل اللقمة من بقه ويديهالي
ياصاحبي لو بعتني حخلي التمن غالي

Ms3a_miso

Thursday, April 15, 2010

فضايح

احتمال انهاردا ابان مختلف حبتين يمكن عشان الظروف اللي بمر بيها بس ححاول افصل من المود النكدي اللي انا فيه ده ..

بما ان في ناس فوق وتحت انهاردا بتتكلم عن الحب فانا ححاول ابتدي بنفسي ... احم احم ححكيلكو عن غرمياتي اللي

مقطعة الدنيا تجطيع .. لاني اصلا زهقت من انتقاد الدنيا لانها اصلا متلخبطة وقررت انهاردا اخد اجازة من الكلام الكبير

وحعيل معاكو على قد مستوى تفكيركم كأني قاعد معاكم عالقهوة

زمااااااااااان وانا صغير ... زي اي برص بيحاول يعبر عن حبه .. بس كانت بدري حبتين

كنت في تانية ابتدائي .. وتعرفو بقا الواحد زمان كان مهلهل وحالته بالبلا .. كان في الدادة اللي بتروحني كان اسمها ام محمود

عشان كنت بتوه وانا صغير كتير .. فا كانت معايا بنتين بيروحو واحدة منهم اسمها كده " بانسيه " هو اسم كان وقتها غريب بس دلوقتي بانسيه ده كأنه ام احمد دلوقتي ده انا بسمع اسامي غريبه.. بانسيه دي وهي صغيرة كانت حاجة كده في غاية الجمال دلوقتي مش عارف اتكهربت ولا ايه اللي حصلها

ام هند كا طفل زي اي طفل عايش .. عايز يعبر عن اعجابه كان في معايا اتنين في نفس التختة هما الاتنين بردو متخيلين انهم بيحبوها هما الاتنين .. وانا لوحدي ... ها ها نعمل ايه نعمل ايه عشان نعبر بالاعجاب فا كل واحد مننا كان بيتسابق عشان يجيبلها كيس شيبسي ... قال يعني حتجيب الشبكة يا خي

ما علينا احنا التلاتة كبرنا واكتشفنا ان اللي كنا بنعمله ده كان هبل .. وبانسيه دي اصلا دلوقتي ساكنة قدامي ولا بحاول حتى اقولها صباح الخير ...لانها زي ما قلتلكو احم احم اتكهربت

استنو بقا كده بقا الفترة اللي جاية دي فترة الحب اللي هو بقا الفترة اللي هي ولا يا ولا ثواني كده بقا اولع الشمعة واطفي النور...

ففف ياسلام بقا لو صوت كمانجة كمان اه اه ايه الحلاوة دي

انا دلوقتي في تالتة اعدادي ...وكنت شب شبه الكورة الجلد اللي مهما رشقتها في الحيط حتبقا كده بتجملها

مش بتوسخها.. كنت حاجة كده كلبوظة وعامل شعري عالجنب زي الطلبة المجتهدة وحاجة بت تيت ..بس كنت ساعتها بقا كان دمي لزيز بقا مش زي دلوقتي كل ماحد يشوفني يستأكب ملامح وشي ويقوللي يا كشري وواحد صحبي احتمال يبقا زميلنا هنا بيقوللي " الشب الميتال " اكمني بعشق اللون الاسود في اللبس اوي

احنا في درس رياضة وياسمين دي كانت سوري في اللفظ تضرب بانسيه دي بستين صرمة

كانت بجد هي مواصفاة فتاة احلامي " حاجة كده شبه هيفا وهبي مع طريقة كلام راندا البحيري مضروبين في الخلاط " يانهار ازرق عالكوكتيل يانهار ازرق عالكوكتيل

وكان فيها سنة سمار وانا بعشق النوع ده ..وكانت ياسمين دي بليدة اوييييييي وده عيبها ..فا كنت انا بقا الواد الفت اللي في المجموعة ومع ذلك كنت بسيب الاستاز يشرح وانا قاعد ابصلها وعايش في وادي تاني خالص

وهي كانت بتضايق اوي اوي اوي من بصاتي ليها و مستكبرة اوي عليا بس مش عارف كانت شداني بطريقة مقلكوش

ومرت السنة وانا ماتخذتش خطوة واحدة كالعادة اللي فيا " جبان " بس قلت خلاص بقا اهيه راحت وفقدت الامل

دلوقتي انا في تانية ثانوي وفي درس رياضة بردك سبحان الله البت دي تخصص درس رياضة

كنت ساعتها بقا اتكحرتت شوية واتعرفت على حبة عيال من المقطعة دول نقحو صورتي شوية وبقا يعني جيل وحركات بقا ومش عارف ايه بس انا يعني كنت مز من يومي مايغركوش ... يعني ماينطبقش عليا مثل وش تعمل الماشطة في الوش العكر

المهم حبة ثقة في النفس بقا وكده وطريقة في الكلام لقيتها هي اللي بدأت تنخ ... وتحاول تجر معايا كلام بأي وسيلة

اكمني كنت مكشملها .. راحت قايلالي بعد " 5 " حصص انا بشبه عليك مش انا كنت باخد درس رياضة في بيتك ...حدقة اوي البت دي تبقو فكروني اعملكم ايتم في كيف تصطاد الانثى فريستها

فا رحت قايلها بسقوعية القطب الشمالي وصحراء سيبيريا "ايه ده بجد؟؟" ورحت مسقعلها ومتكلم مع واحدة تانية ولا كأنها بتكلمني اشاسا...فا حسيت انها اتضايقت اوي وحست انها مش لافتة نظري خالص

الحصة اللي بعديها بقا جت لابسة اللي عالحبل كله ... جابت اخرها معايا بقا... اول مادخلت علينا بقا كنا تلت ولاد في الدرس راح الاتنين اللي جنبي صفرو ... انا اتغظت الصراحة

نزلنا تحت واحنا بنصور الورق كأغلب الدروس يعني فا رحت قيلها قدام البنات ايه اللي انتي لابساه ده انتي جاية حفلة

انا لمحت على وشها تعبير غريب لحد دلوقتي مش عارف اترجمه بس انا حسيت انها مبسوطة بس كان في صوت واحدة غبيه جنبها كانت بتقولها قولي للميس ..بس انتي يا ست بتاعة انتي لقيت ان ياسمين بتقولها لا بس بس راح واحد من العيال راح قايللي ايه اللي انتا بتقوله ده .....................................

اوبس ايه اللي انا قلته ده انا الصراحة اتحرجت من نفسي اوي وبقيت مش عارف اقول ايه وفي نص هدمي ..بحط نفسي في مواقف بايخةةةةةة.. انا مش عارف ايه اللي خلاني اقولها كدة ...يمكن غيرت عليها مش عارف

انا بقولكم حاجات مكانش المفروض لساني يعرفها اساسا ..ايه اللي انا بعمله ده ..بس عادي يلا اتجرسلي حبة

بس بعد كده بقا اللي حصل ان المدرسة اللي كانت بتدينا لاحظت انها ايه حتضيع الدنيا ومستوايا بينزل وقاعد اتنيل مش مركز

فا استنتلها على امتحان وطردتها عشان بسلامتها خايبة مابتزاكرش وانا بقا فعلا فعلا من ساعة ما بطلت تيجي الدرس وانا كان مستوايا بينحط مش بيتدنى مش عارف انا لحد دلوقتي مشفتهاش ولو صدفة يعني

..احم احم رقم تلاتة دي بقا مكانش حب .. ده كان جنان ازلي ومش اي جنان ده جنان متفجر الارادة

كانت بتاخد معايا درس انجليزي في تالتة ... اعجبت بستايلها الامريكاني في الكلام والثقافة حسيتها عقلية متفتحة وكانت فعلا دحيحة اوي ..بس دي بقا عدت السنة فعلا منغير مانقول لبعض حتى صباح الخير ... مش عارف انا فيا حاجة غلط

بس حسيت في يوم انا عايز اكلمها في الاجازة قبل مادخل الكلية.. وهنا بقا كانت ارادة المجانين ... دورت عليها بالتخمين كده تعرفو في مواقع النتيجة بتاع الثانوية العامة ده فضلت اجرب الاسم وحدة وحدة لحد ماطلعلي اسمها بالكاااااااااامل

طب انا عايز اكلمها انا مالي ومال اسمها بالكامل .. اشطة دليل التليفون مواقع الدليل لفيتها خرم خرم اني الاقي حاجة ابدا في الاخر في لحظة يأس دورت عالفيس بوك ...فا لقيتها اوبس انا مش مصدق نفسي ده هي فعلا...اشطة عملتلها اد وخدت ايميلها وكلمتها فعلا...الكلام اخد بعضه ايه بقا راحت قايلالي انا اتخطبط واللي خنقني اكتر انها كانت ممكن تحكيلي على خطيبها ساعات

نزلت عليا كالصاعقة...ياه عالاحساس ......

استسلام ويأس ...مصر يوم النكسة....الدنيا عندي كانت سودة ودي كانت بداية الشب الميتال على فكرة

احم احم رقم 4 ... واحبهم لقلبي ...انا مش حقول اسمها بس ممكن لو تسمعني واعتقد حتبقا عارفة نفسها

بس يعني ماهو محدش عارف حاجة انا سايب الموضوع مجمل

يعني كنت كده حاجة نشيطة في الكلية كنا في اعدادي وهي لسة جاية من كلية تانية محولة منها ..

شدتني جدا بقا بجد ..بس حسيت بقا طب دي حكلمها ازاي دي ...ولا ولا بطل جبن بقا بطل ..

فا كنت بنتهز وقوفها مع اي حد اعرفه ..اعمل نفسي بنادي عليه ورح جي لازق

يعني واكمن عددنا في الدفعة صغير وكلنا عارفين بعض فكان لازم يجي اليوم ونعرف بعض

بس يعني كان وقتها كده كنا لسه داخلين الكلية ومش اوي وانا كنت بكتب شعر وبنزل مواضيع على البلوج بتاع الكلية وكده فا كنت حاجة لزيزة كده يعني كانوع من الترفيه عن النفس بعيدة عن جو التعب والشقى

وكنت عامل لنفسي اسم كده غريب بكتب بيه " مسعا ميسو " اللي يسمعه من اول وهلة يحس انه اسم يهودي وحبة وحيقول شالوم وكده يعني بس ده اصلا اسمي بالكامل ....ما علينا

فا بعض اصحابي يقولولي مسعا وحبة يقولولي محمد وحبة يقولولي صلاح وحبة يقولولي ميسو وحبة مايقولوليش حاجة

فكانت البنت متلخبطة ... فا رسيتها عالفولة.. بأني اسمي بالكامل هو محمد صلاح الدين عبد المنعم على عطية حسن

ومن هنا ابتدا كلام شوية ... بس المشكلة هي هي وهي الجبن وده السبب اني معرفتش اعمل اي حاجة معاها

هو ممكن يكون مش جبن اصلا ..هو ممكن يكون لخبطة وعدم تصرف كويس ...الصراحة انا كنت عايزها اوي

بس انا دلوقتي مش عارف

انا دلوقتي سايبها على الله .. واللي يحصل يحصل بس انا اصلا مش رومانسي خالص ...او جايز يمكن اصلي مجربتش بالشكل المعروف اللي هو القعاد بالساعات مع بعض

وعالتليفون بالسنين والكلام ده

مش عارف الصراحة ايه السيناريو اللي حيحصل؟؟؟؟اوعدكو اوي ما الوضع ده يتغير

حنزل بوست احكيلكو فيه على التطورات ...محمد عبد المنعم عطية ... راديو عالنت

Thursday, April 8, 2010

انا كده

انا كده
انا كده ربنا خالقني .. حلوي بوحشي .. نفخي بلذذي ..ذلي بعزي .. مزايايا وعيوبي
سواء حبتوها او محبيتوهاش .. احب اقولهم .. انا كده ومش حتغير
تعرفو ليه مش حتغير؟؟؟؟ عشان مبقاش زيكو
اوقات كتير اوي بشوف ناس تتكلم عن حد وحش اوي وبتنهش في لحمه
واول ماتشوفه ... تاخده بالحضن.. ساعتها بقعد اضحك من قلبي تعرفو ليه؟؟؟
عشان عارف اني وانا مش موجود بيتعمل معايا كده بالظبط

وبحب اقول لتامر حسني .. بركة يا شيخ انك ماتغيرتش
عملت طيب حتتغير ليه مدام اللي حواليك مش بيتغير ولا عايز يتغير ولا عمره حيتغير
من الاخر كده مافيش امان لجنس بنيآدم
واللي بيتكلم في وشك حلو اتوقع مليون في المية انه من وراك بيقول عليك كلام ابيح
واللي انهاردا بيديلك وردة ممكن كمان ساعتين يحدفك بالطماطم

عارفين انا ليه بقول الكلام ده ؟؟؟ اني عمري ما حتغير
عشان ناس ياما اوي كانت من كام سنة بتحبني وبتضحك في وشي وبتشجعني
دلوقتي بتبصلي وكأنها ولا تعرفني
ولو سلمت على حد فيهم بتكون الاجابة على قد السؤال
ودي حاجة بتدايقني جدا!!!!!
يعني انا جي وهازز طولي ورايح للسنبورة وجي مالسنبورة
علشان في الاخر تقوللي بأحساس بنشوفية " ازيك" ؟؟؟
اينما كان عيبي اوي كده ماينفعش اكون بتكلم معاك وعلى الاقل مش بتضحك في وشي
ده كده مش حبصلك تاني اصلا ولا حسلم عليك
دانتا كده بتطفشني ومش بتربي زبون

اينما كان عيبي فا مش انا اللي عامله
مسترخمني ؟؟؟؟ والله مش ذنبي يا عم
عود نفسك ان مش كل الناس حتعجبك وانك ماتحبش حد ده عادي
بس ماتعملوش وحش وخصوصا لو ماكنتوش متخاصمين من اساسه
وتيجي هوووب مرة وحدة كده تقطع؟؟؟ طب ده جنان ولا ايه؟؟؟

يا اما بقا لو كنت غلط في حاجة بدون قصد فا بحب اعتزر
ولو ان دي حاجة مش سهلة لاني مبتأسفش لحد كتير .. لاني مبزعلش حد الا كل فين وفين
وعلى الرغم من كده بردو في ناس انا مزعلها
ولو جت الفرصة اللي اعيد فيها اللحظة اللي زعلتهم فيها
حعيدها وازعلهم تاني... عشان ده حلال فيهم
عشان دي ناس مصلحجية
كتير قالولي شوف مصلحتك انتا كمان
جه كل الناس كده ومحدش بيسأل على حد
ولو الناس بتعرف بعضها بتعرف بعضها عشان المصلحة بس
زي ما قال احمد مكي ربك ميز كل واحد منا بحاجة فالناس تفضل لبعض دايما محتاجة
بس
الاحساس بالحاجة ده تطور لدرجة المرض
وبقت عيني عينك ومافيهاش اي نوع من صنعة اللطافة
ايوا عوز معنديش ادنى مشكلة بس هو انتا عايز اللي انتا عايزه وانا اتحرق يعني؟؟؟
للدرجادي الاحساس بالمادة مغلب على آدميتي
مش حاسس اصلا بأن في نفس بشرية موجودة متضايقة من اللي بيحصل
ماكنة تشتغل طول النهار عشان احم احم تنول غرضك :D

طب هي الماكنة دي مش عايزة ترتاح ؟؟؟ على رأي واحد صاحبي

الدنيا سودة اوووووووي
ممكن اطلع بقا من اللبس الاسود اللي انا لابسه ده احسن ده بقا عامل زي الثقب الاسود اللي !!! بيبلع ام ام ....تفاؤلي بالحياة
انتو عارفين انا مين؟؟؟ انا حسن الهلا... اسف ده فيلم تاني
انتو عارفين انا مين انا ضميركم
ضميركم اللي داخل كل واحد فيكم وبيقولكم ماينفعش كده
وكلامكم اللي جوة كل واحد فيكم ومنكم انا اللي كنت بقوله ده ماينفعش
لو صبرنا سنتين كمان حنبقا في غابة
ده اذا مابقيناش اصلا دلوقتي
الموضوع ده زاد اوييييييييي
خافو على بعض بقا

محمد عبد المنعم عطية

Ms3a_miso

Saturday, April 3, 2010

تضامنا مع احمد مهنا




من هو احمد مهنا؟؟؟

احمد مهنا ده ناشر في دار دون للنشر كل الذنب اللي حصل انه نشر كتاب بعنوان
" البرادعي والثورة الخضراء "
انا مش مع البرادعي ..ولا حتى ضده
لاني ماشفتش منه حاجة عشان اكون معاه
او عشان اتبعه وانا عينيا مغمضة كده عشان اغير وخلاص...

ما ينفعش لازم اعرفه الاول...

نرجع لمرجوعنا

ازاي واحد ناشر يتقبض عليه عشان نشر كتاب بيتكلم عن واحد لسه حيرشح نفسه للرئاسة

على كده بقا انا ممكن بكرة يتقبض عليا عشان قلت كلمة ازاي
طب ايه اللي مفروض انه يتعمل تجاه دار نشر؟؟؟ غير انها تنشر
اي كان اي حاجة

المهم اللي حصل ده بينافي اختراع اسمه حريات
ودلوقتي مهنا في المعتقل وقالو لابوه ابنك حيقعد معانا شوية

طب ازاي انا اقدر اكل الجبنة والمصيدة منصوبة
ازاي بتقول ان في حرية وانتا مكلبشها اصلا
ولا هو كلام وبس

Thursday, April 1, 2010

مولد سيدي الانسان

بتخاف مالناس؟؟؟ اوقات كتير بتحس انك بعيد عن ناس احسن؟؟؟؟ جايز عندك حق .. الوحدة مملكة واسعة اااااا وملهاش نهاية ولا خط افق ولا حدود... ضلمة وخيالك بيضيئ فيها ...احساسك هو اللمبة الهالوجين الميت وات اللي بتشع الحياة على قلبك ... لوحة بتخططها واحدة واحدة
وبتلونها بقوانين تمشي عليها " مش قوانين عاملها عشان تبوظها" لان بأمانة ممكن يكون انك تاخد ركن لوحدك دي احسنلك الف مرة من " الدخول في لموؤاخذة " المعمعة" بس الاحسن بقا انك تتحدى وعشان تتحدى لازملك تلت صفات موجودين في معظم المصريين
ال لا مبالاة السائدة
الاحساس بالانا
الاحساس بالمساواة تحت مبدأ لقد زلطتنا امهاتنا ملوكا ومحدش فينا عبد يا صحبي
يعني زيك زيي في كل حاجة مهما كان سنك ومنصبك انا وانتا حاجة واحدة
لان في الاسف مش عندنا بس لان دي صفة في الانسانية جميعا
وهي ان اي واحد قاعد في منصب معين ايا كان حتى لو الكاشير اللي قاعد في محل لبن لازم يحس بالسلطة على الزباين ويحس بانه بيمن عليهم وهو بيديهم البون او الباقي وده عشان يحسس نفسه انه مهم على الرغم ان الفلوس دي في النهاية رايحة للبقرة

ولو طبقنا كل ده على حياة كل واحد حيلاقي حاجات وبلاوي متلتلة
نبدأ لو طبقنا ده على واحد شغال في بنك وبيقبض بالجن الياباني يا عم عشان ماحدش يقول اننا بننصر الغلابة بس
الانسان ده من اول مابينزل من بيته بيتنطط عالناس والناس بتتنطط عليه
اول ما ينزل من الشقة ويركب الحوامة بتاعته وييجي عم فلان البواب يفضل معاه يطلعه ويقولله اطلع قدام وامشي لورا
وتك تك لحد مايطلع وبعدين يفضل يقوله يا سعادة البيه يا سعادة البيه عشان ينفخه شوية فالتاني يتنفخ او يتنفخ وبعدين عشان يسكته او يمن عليه بيديله كام بريزة ويافكيك بالعربية
يوصل شغله فا يصتدم ب 2 العميل و لموأخذة المعمول او الريس بتاعه
ازاي الناس الاكبر منه تتعامل معاه حيلاقي نفسه مجبر انه يشتغل بدماغ ناس اكبر منه لانه مش بأيده يعمل حاجة منه نفسه تحت مبدأ السلطة الوظيفية
واستغلالها السئ جدا جدا جدا ليها واحدة واحدة الانسان اللي قعد يكون في شخصيته طول حياته مش حيعرف يستخدمها ببصلة
واللي بيتعمل فيه حيعمله عالزباين
تحت مبدأ فش الغل
قليل اوي دلوقتي لما بلاقي حد بيستقبل حد بأبتسامة الا في الاماكن الفخمة مع ان الابتسامة دي سلاح فظييييييييييييييع
حد متضايق منك تاكله بأبتسامة حد بيغلس عليك تصده بأبتسامة .. حد غاوي ينكد عليك تهده الابتسامة .. الروتين بيتهد بأبتسامة
وده بقا في ذكاء التعامل حبقا اكلمكو عليه بعدين تحت نظرية المرتبة الاسفنج
انا كل قصدي من الليلة دي كلها ان ابين ان انتا ملك نفسك حاكم لدنيتك ..ربنا اللي اختارك خليفة ... مش اللي بيديلك مرتبك
كلنا سواسية
وان كان في مبدأ احترام للكبير فا ده انا شايفه مش واجب ابدااااااااااااااااااااااااااا ولا لازم اصلا
لان الاحترام تطوع وليس واجب او بمعنى اصح ذوق وجنتلة يعني ماتجيش تضربني بالقلم عشان اكبر مني وعايزني اسكت
مافيش حاجة اسمها كده " الاهانة تترد بأهانة " لان اللي اكبر منك ده بيتسغل انه اتولد قبلك عشان يفكرك انه اكبر منك ومن هنا لازم تحترمه حتى لو قلع اللي في رجله وادالك بيه
على الرغم ان انتا مالك ازا كان اتولد قبلك

حاجة زي كده اتقالتلي وانا في المعهد بتاع المزيكا ايام زمان ...ايام ما كنت بتعلم الاستاز بتاعي كل شوية يقوللي بأستهزاء بيا ... ده علم كبير مش اي حد يفهمه واللي انتا بتدرسه في ربع ساعة ده اساتزة كباااااااااااار اتعلموه في سنين " يوووووووووووووووو هو كل شوية يقوللي كده رحت قايلله انا زنبي اي اني اتولدت بعدهم ... مانا كان ممكن انا اتولد قبليهم وانا اللي يتعلمو مني وكنت بردو ممكن تقول لموزارت وهو قاعد مكاني ده محمد عبد المنعم عطية قعد سنين عشان يعمل الكلام ده وانته بتتعلمه في ربع ساعة وساعتها كان موزارت ده حيسيب الاوضة اللي انتا قاعد فيها ويمشي وحيقول مش عايز اتعلم بقا

والمشكلة اننا بنخدع نفسنا بكل حاجة .. لان ممكن انتا اصلا لو مش موجود في الحياة واحد تاني يعمل اللي انتا بتعمله بالظبط هو هو
لان الابداع مش منك
الابداع من اللي خلقك
بطلو عقد

محمد عبد المنعم عطية
راديو عالنت

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com