Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Monday, November 26, 2012

انا سعيد اني ركبت الميكروباص ده

حكاية سردية بحتة ..
شاء القدر اني ماروحش الشغل النهاردا بسبب امتحان ديبلومة في تصميم الجرافيك كنت قاعد بزاكرلها طول النهار .. وفي موعد نزولي في وقت الذروة 
زحمة كالعادة ... ولكنها اشد 
قلت اشطة انا متعود على كده حروح اركب من جنب المنشية اديني بسبق العربيات اللي واقفة
ولما وصلت .. بعد ما ايقنت اني مستحيل حركب سمعت صوت جي من سواق بيقول لزبون .. شايفين اديني بقالي ساعة الا ربع في بحري بس .. ليا حق "اقطّع المسافة بقا ولا لأ " حرام بقا بصراحة 
والناس بتوافقه .. من براها بس .. انما من جواها لأ 
وفضلت واقف نص ساعة .. مش لاقي ركوبة .. حتأخر على الامتحان ..طيب وبعدين 
وشي مكشر .. بسب وبلعن في دي بلد 
وبقول يلعن ابوها بلد بنت وسخة 
طلعلي من شارع المفروض مكانش يطلع منه .. الشارع ده بتاعت مشاريع تانية .. وكأنه ميكروباص فريد من نوعه 
والناس اتلمت عليه عشان فاضي .. وانا متوقع اني مش حركبه 
سأل احد المحاولين الركوب ... للسواق "اللي في بلدنا هو دايما اللي بيتسأل " ... رايح فين ؟؟؟؟؟؟
وكانت الاجابة .. سيدي بشر ... ظهر لي في الافق ايموشن رمضان مبروك عالمين حمودة ... قائلا ... والله لسة فيكي نخوة يا بلد
مشروع فريد من نوعه مش بيقطع المسافة عشان ياخد اجرتين ..
وبدأ المرشوع يمشي وناس تركب 
ركّاب الميكروباص هم ..
رجل في السيتينات من عمره .. وبجانبه شاب مقبل على الثلاثين  يجلسان بجانب سائق .. محترم قريب من 35 عام
اما في الكابينة الخلفية ..
سيدتان حينزلو بسرعة 
بجانبهم على الكرسي الايمن .. شابة جذبت انتباهي .. بخاتم به وردة كبيييييرة .. مش ذهب ..يبدو عليها الطاقة 
وتقول للي وراها انا اسفة مديقاكي بالكرسي ؟؟؟!! ترد سيدة منتقبة تحمل رضيعة .. سفك انتظارها الميكروباص دمائها ... لا لا ولا يهمك اسندي عادي 
بجانبها .. رجل .. واخد الدنيا ببساااااااااااطة ..تضرب تقلب .... مصدر مؤخرته للدنيا ولديه حس فكاهة و فضولي شويتين..لاحظت ده من كتر ما اتكلم مع شابة قاعدة جنبه عندها روح اجتماعية 
وعن يميني ست حتنزل قريب .. وعن شمالي .. واد مالوش دعوة بأأأأأأأأأأأأي حاجة .. سادد ودنه بالهاندفري .. وبيقول خراب يا دنيا عمار يا دماغي 
وورايا .. 3 مضحكاتية .. مكانوش بيعملو اي حاجة غير انهم بيضحكو 
ولّع شرارة اعجابي .. الي بدأ بأستغلاس الموضوع .. الراجل الفضولي خفيف الظل .. متحدثا عن مظاهرة بكرة التلات وانه شايف البلد دي بقت سيئة .. 
ردت عليه الشابة الاجتماعية متحدثة عن اللي حصل في سموحة .. وقالت ان المتظاهرين ولعو في المقرات بتاعت الحرية والعدالة 
التعليق ده استفز بطلة اعجابي .. البطلة دي ناشطة سياسية .. ام الخاتم اللي بوردة
معاها ماجيستير و بتتكلم بنفس الحماس اللي كن بيتكلم بيه اي حد عاصر الثورة 25 
وعلى عكس ردة الفعل اللي انا متوقعها .. انا كنت متوقع ان تحصل خناقة .. مابين الناس والناشطة السياسية دي ده رقم واحد 
وزيادة على كده اقتتال مابينها وبين السيدة المنتقبة ..
طلعت انا اللي حمار .. او هما اللي حالات مختلفة تماما 
انا لاحظت الاعجاب اللي بينط من عين اي حد بيركب الميكروباص ده حتى السواق بالناشطة دي 
لأ والادهى اللي خلاني اريّل .. التأييد التام .. من المنتقبة .. للناشطة السياسية دي اللي كانت بتهاجم مرسي والاخوان بضراوة 
الوحيد .. اللي كان مش عاجبه الكلام .. الراجل الستيناتي .. مش لأنه اخوان .. لأ ... لأنه لسة مافاقش من مرض ادوله فرصة .. انا كنت في حالة قرف تامة قبل ما اركب الميكروباص ده .. بس الميكروباص ده لفت نظري 
ان اول مرة من ايام الثورة .. الناس تتفق على حاجة .. 
مشفتش حد رأيه زي التاني .. من وقت الثورة ..
انا بدأت اشك .. قلت جايز الناس دول بس ... لكن لأ .. اي حد ركب اليكروباص ده في اي وقت طول الطريق .. وسمع الناشطة السياسية دي .. كان مبسوط بيها اوي اوي 
حسيت بجد قد ايه رصيد الاخوان نقص عند الناس بجد .. التعاطف معاهم اللي كان مخليهم اغلبية ... راح 
جشعهم في السلطة كره الناس فيهم .. سوء التصرف كمان .. البطئ من مرسي ..الطيش السياسي و قلة الحيلة 
قللت كتيييييييييييييييييييييييييييييييييييييييييييييييييييييييييييييييييير اوي .. واللي مش حاسس كده بجد .. حقوله زي ما الاخوان كانو بيقولو للي ضدهم .... انزلو الشارع 
في كل مكان بيحلق كره الناس للاخوان ... الا قليييييييييييل 
الميكروباص ده اكدلي كده .. والاسواق اللي جنب بيتي كمان .. اي حد بدقن يدخل السوق .. يستلموه .. البياعين اللي مالهومش في السياسة بيشتمو مرسي ... ولو حد بدقت عارضه .. السوق كلللللللله يبقا ضده وتقوم عاركة 
الميكروباص ده .. اداني امل .. ان مش كل الناس بقت مستسلمة ..
سعدت سعادة تضاهي سعادة حازم صلاح ابو اسمعيل لما بيتسأل الاسئلة 
أنا سعيد اني ركبت الميكروباص ده .. ايموشن حازم صلاح ابو اسماعيل

Friday, November 23, 2012

اجيب فلاشة ليه مدام حتبوظ

اليوم .. 23/11/2012 ... شعور بيأس لا ادري ما سببه 
ربما لأني اجد ان معظم ما حلمت به اصبح بعيدا .. فأصبحت مثل أناس لطالما تهكمت على طريقة حياتهم
اغار من حظ من هم اعلى 
واشعر بفخر شديد عندما انظر لمن هم دوني ... وسرعان ما اتذكر ان فخري هذا يمكن ان يكون لي سبب انتكاسة 
احلامي راحت ادراج الرياح .. شاب في الثانية والعشرين لا يعرف كيف يبدأ .. ولا متى سينتهي ..تائه 
وجدت عمل .. واصبحت ثور في ساقية .. من الشغل للبيت ومن البيت للشغل .. للاسف 
حلمت ان يكون لي كتب ... ولكني للاسف .. لم اسعى الى ذلك .. مع كثرة كتاباتي .. ليس كسل مني .. وليس لأنه لا يوجد وقت لدي 
بل الوقت متوفر ولكن .. التوفيق غير متوفر .. فلم يأتي الميعاد .. وندمي منذ الان ان لا يأتي
فهذا التردد يجعلني مابين خطوات موجبة وسالبة ... فمحصلتي دائما صفر
اعمل كتاب ليه .. ماهو ممكن يفشل.. هو مين اللي حيشتريه  
اكلم واحدة ليه ماهي ممكن ماتعجبش بيا وتكسفني
اسافر ليه مانا جايز يحصلي مشاكل هناك ومعرفش اخد حقي ومحدش يقدرّني و اتهان
اجيب عربية ليه مانا اكيد حخبط حد 
اجيب فلاشة ليه مدام حتبوظ
ولحد وقت قريب ... أصلي ليه .. مانا كده كده في النار 
اعيش ليه مدام حموت 
فعلا على رأي هشام صحبي .. اللي مش بسأل عليه ومش بسأل على ايه حد من صحابي 
اصلي اسأل عليهم ليه .. مانا مابسألش على حد اصلا 
شئ سيئ اني بفكر كتير اوي اعيش لوحدي 
حتى منغير ابويا وامي 
انا فعلا كتير جدا جدا بقعد طول اليوم لوحدي 
قدامي المخروب ده وبكلم ناس مش بتقرالي على البلوج بتاعي 
بتنشأ على احساس بطاقة بتجيلي لما حد بيقوللي على حاجة عاملها ..الله دي حلوة اوي 
احساس مايتوصفش 
ولو حد قال على الحاجة دي وحشة 
ببطلها 
بطلت موسيقى عشان مكانش حد بيسمعها 
لان لو حد حيسمعها .. مش حيفهمها .. مش عشان انا عبقري مثلا .. لأ عشان شعبنا مش بيفهم الا الاغاني والموسيقى المشخلعة 
بيتعامل بأسامي.. اشطة ده اللي عاملها ماهو مشهور .. ويفضل يسمعهاله .. 
انا ضيعت سنين من حياتي في كتابة اغاني لو جمعت الورق اللي كتبته و وقفت عليه حوصل للدور اللي فوقي
رسومات كتير رسمتها وانا صغير 
الحان كتير عملتها ..بيقابلها الناس بوجه عبوس وبيقولو لنفسهم ايه القرف ده 
وببقى حتجنن ... ها بقا .. يالا بقا .. تسقيفة اومال .. تشجيعة اومال 
بوزع وانا عمر ما كان حلمي اني اكون عازف كويس اصلا .. لاني عمري ما سعيت لكده ابدا 
حسيت ان التوزيع ممكن لو اشتغلت عليه اكتر ممكن يطلع حاجة .... 
الموسيقى حرام .... صوت جي من ناس اصلا مش بتصلي .. الموسيقى حرام 
طب خلاص الموسيقى حرام .. بلاش موسيقى 
اعمل ايه !!!
ارسم ؟؟؟ ماهو بردو حرام .. انحت ... ماهو بردو 
طب اعمل ايه ؟؟ 
ثورة وسياسة ... انتا ليبرالي علماني كافر 
ها بقا وبعدين .. مانا ضدكو يبقا انا معاهم مهما كانو هما ايه 
وارجع في الاخر اكتئب ويقولولي انتا مكتئب .. ماهو انا مكتئب لاني دايما بحاول ارضيكو 
وعشان عارف اني عمري ما حرضيكو .. دايما بقف
ده حتى انا كنت بخاف من مدرسيني في المدرسة ..بخاف اتضرب ..بخاف ارفع ايدي عشان اجاوب 
ببص لنفسي نظرة دونية عن الناس ان هما دايما هما اللي فاهمين وانا لو دخلت في موضوع حبوظه 
احا على ده تفكير 
احا على دي ناس بيظيطو مع الظيطة وبنخلهم ويركبو 
احا على دي دنيا كان ممكن تمشي وانا مش فيها انا مين يعني عشان اكون فيها .. خلاص يعني انا ترس مهم اوي ماتمشيش الا بيا 
احا على اخوان بيأيدو وخلاص 
واحا على معارضين بيستعرضو قدام الكاميرات 
وكله غلط
انا مستنى كارثة تاخدني وتاخد البلد بنت الوسخة دي 
مش دي سنة 2012 اللي قالو حتحصل فيها الكارثة بقا ... هي فييييييييييييييييييييييييييييييين

Tuesday, November 20, 2012

ثور


يا عقل زي النيل سدو منابعه ومنعو طميه للوصول للمصب 
وحيلته قلت وحبسو حلمه وهو لساه شب 
حسد الحمام على عيشته 
ومسك بأيده ريشته 
ورسم جناح احلامه
 لوّن خياله انكب
طموحه بركان هب
خضّر اراضي بوّرها الزمان صب
اسمنت حظ ثابت على عقل متكهرب
عالفاضي شحناته بيسرب
ومصيرها سالب ارض
ولكل يائس رد
حظك فريسة راقبها
وفي المعاد انقض
قضاء وماله رد
خليك مفتح دماغك على كل مستكرد
ارخي اللجام وقت الامان 
وفي الشدة ثور واتخض
سكوتك معنى مرض
اجلد شيطان وسوس لودنك بصوت يقول اتهد
اوعاك في يوم تتهد 
اجري في حلقة ماتجيش في يوم تخلص
حظوظ الجهد في العادي واحد و مش انصص
حقك حتاخده طول ما عليه بتسعى
لكل واحد حتديه يتردلك تسعة 
ماتسبش نفسك للكسل بين الخلايق ترخص
الدنيا زي النحلة .. شفاها في اللسعة
الدنيا لحم وشوك وصعب تتفصص
اكل العسل حلوة بس النحل بيقّرص

Thursday, September 6, 2012

رحمة مفرومة


مدام اميمة  
امرأة ضئيلة الجسم قصيرة القامة كبيرة العمر في ال52 من عمرها محجبة  تعمل في احدى المصالح الحكومية .. ولذلك لا تمتلك سيارة خاصة بها لديها من الابناء اثنين زوجة لرجل متوسط الحال يكاد يتغزل في الطبقة الفقيرة ومترسب في قعر الطبقة المتوسطة المنقرضة بطبيعة الحال في بلدنا ولا ينعش حال هذه الاسرة المهدده بالافلاس نتيجة لإن ولديها الاثنين مكبلين بالثانوية العامة الا مرتب مدام اميمة الذي يذهب كله ولا يتبقى منه شيئ بعد يوم 22 في الشهر  

في منظر خارجي روتيني جدا تخرج كعادتها هذه المرأة بعدما نفذت طاقتها الكلية تقريبا ويلازمها الصداع الذي يتسبب فيه بطبيعة الحال ضعف ابصارها من كثرة التدقيق في الملفات .. ومتثاقل وزنها بسبب كمية الماء المفقدة من جسدها وقد اصبحت علاقة الماء  بملبسها كالعلاقة الحميمة بين الماء و قطعة الاسفنج وهذا شئ طبيعي .. ففي المصلحة الحكومية التي هي بها لا تزال برمجة عقولهم الصدأة لم تسمع عن شئ اسمه تكييف .. لا يزالون يعتمدون على المراوح التي لا تفعل شيئ ابدا مع كثرة التكدس السكاني داخل هذه المدينة المزدحمة المسماة "بالمصلحة الحكومية" ...وهذه المصلحة هي دولة داخل الدولة تمشي بقوانين مختلفة تماما فهي أم الروتين 
والسبب الرئيسي في اصابة ثلاث ارباع المسافرين داخلها بالضغط والسكر  والجلطات 
ورئيس هذه الدولة المسئول عنها وهو مدير المصلحة لا يقوم بالصرف على هذه المصلحة ليس للفضاء الدائم للخزائن والميزانية كما يزعم البعض من المديرين
ولكن لأنها مصلحة حكومية قانونيا اذا تبقى مبلغ كبير في خزينة اي مؤسسة حكومية فتوزع الارباح على مدير هذه المؤسسة وحاشيته على حسب الغزالة  
تتحسر على حالها و تنظر في ساعتها ويعبس وجهها .. ينتظرها منزلها الذي لا يعتمد سوى عليها.. اسرة كاملة لا تنتظم حياتهم الا بها ..سواء من اعمال المنزل الطعام والنظافة والمال وغير ذلك من مهمات النساء المرهقة كمهمات فرق الكوماندوز 
تنساق دائما مدام اميمة لأنها قد تعودة على ذلك وتذهب لتستقل "الميكرباص الاول " من اول الشارع الذي يذهب بها الى الشارع  الرئيسي حيث تستقل "الميكروباص الثاني"  الذي يأخذها مباشرة الى باب بيتها بعد طول عناء
تركب مدام اميمة مركبتها الاولى .. والتي كالعادة يكون سائقها "مبرشم"ويستمع الى بعض اغاني الاشباح التى تسمى"المهرجانات" و التي لا يفهمها عادة سوى ابناء الجان و قانتي الاحياء الشعبية من فئة عمرية صغيرة 
يصرخ السائق .. اربعة ورا أفنديا..وتبدأ بعدها ملحمة "لم الاجرة" التي دائما وابدا تكون .. وها هي امنا اميمة تتصبب عرقا من كثرة الحر والزحمة 
توصلها مركبتها الاولى في سلام وامان فتنزل لتعبر الشارع لتستقل مركبتها الثانية .. وتتعجب السيدة "يا سلام الطريق النهاردا مش زحمة زي كل يوم اكيد حوصل بدري" تعبر اميمة منتصف الشارع الرئيسي بصعوبة ثم تبدأ في العبور في النصف الثاني
واذا بسيارة مسرعة .. يركبها شاب اخرق عديم المسئولية يصدم هذه الام ..فتتطاير الام من قوة الصدمة بعد ان عانق جسدها حديد السيارة  فتلف في الهواء لفتين وترطتم رأسها اولا بالارض فيستقر جسمها بعد ذلك ممددا .. واذا بأول قطرات تتساقط من فمها مندفعة تجر ورائها شريط عمرها الذي يمر بسرعة امام عينها ولا يعلمه الا هي وخالقها 
ولا تسمع من هذه الدنيا سوى خلفيات لاصوات كلاكسات لا تبالي وواناس يصرخون .. هاتوووووو الاسعاااااااااف 
وتمر خمسة دقائق ويبدأ الطريق المنساب يتكدس .. سيارات سيارات سيارات .. اناس كتيرون..وسيارات كثيرة على بعد 4 كيلو لا تعلم ماذا يوقفها .. 
والغريب انه ليس من جهتها فقط تكدس المرور .. ولكن نصف الطريق الاخر الذي قد عبرته توها قبل الحادثة توقف هو الاخر 
والذين حولها فقط هم من ينتظرون الاسعاف وبعضهم .. جاء لينظر فقط .. غلاسة .. مش اكتر 
وتمر السيارات متتالية بتصوير بطئ .. هو لن يساعدها ... ولن يوصلها الى مستشفى .. ولكن يمر بجانب جسدها ويشق دمها المنساب على الارض بأبطئ تصوير بطيئ .. وهو ينظر فقط .. ويتكدس المرور اكثر واكثر .. ويصرخ الناس من حولها في السيارات "امشي يا عم " وبردو السواق يستهبل ويمشي بالراحة .. فزمن مرور السيارة بعد ان رأي الجثة ملقاة على الارض هو 3 دقائق لكل سيارة
ثم يأتي من بعيييييييييييييييييييييييييييييييييييييييييد
صوت سيارة الاسعاف التي تترجى السيارات "لو سمحت وسع شمالك .. فضي شمالك يا ملاكي "ولا احد يهتم والكل يمشي امامها  ويعوقها لينجح في الهروب من الزحام 
ولاتزال تحاول سيارة الاسعاف الوصول ..لانقاذ اي شخص يموت في هذه اللحظة ... حتى الان 
الان فقط.. اميمة قد ماتت
ومات مستقبل اسرة
الان .... وصلت عربة الاسعاف.. هل من منقذ ؟؟ 
!!!!

Saturday, August 4, 2012

معارك


مسعى 
طريق طويل متقطع غير معلوم الاتجاه والمنتهى 
صراع بين اشباه احلام 
لمس اكتاف 
خليط بين حبات العرق والدموع 
يأس 
استسلام
الاحباط يولد في جوفه الطموح
فيبتلعه الاول 
نقد ضعيف .. يحطم سلسلة انتصارات قليلة قد مضت
ويقضي على مستقبل مليئ بالاحلام 
قليل من يتكأ على نقد وجه له 
واقل من يتخذه سلم يصعد عليه 
ليصل الى كمال منقوص
ويلمس تاج احلامه الذهبي
ولكن من لم يقوى ..يضمحل طموحه
ويعود ادراجه 
فيتطاير حلمه 
ويتلاشى 
يبدأ بالتفكير 
هل ما افعله حرام ؟؟؟
ماذا عساي ان افعل إن كسبت دنياي وخسرت اخرتي
قد يكون محق في بعض اعماله 
ولكنه في المجمل يكسب معركته ضد نجاحه
وينتصر فشله 
فيبرر يأسه بسراب 
فمن بعد ايمانه 
يقول هل اترك دنياي من اجل اخرتي 
!!!!
ماذا افعل 
وإن عاد الى دنيته 
يقول ءأترك اخرتي من اجل دنياي 
!!!!
ماذا افعل 
تضاد 
شيطان
نفس أمارة بالفشل عند بشاير النجاح
سواء كانت في الدنيا او في الاخرة 
حيرة 
احباط 
معارك

Monday, July 23, 2012

تحيا شركة لينك راعية النصب في مصر



في شهر ديسمبر سنة 2011 قمت بالاشتراك في احد عروض شركة لينك في احد فروع الموزعين .. فرع الغرفة التجارية بالمنشية .. في عرض اشتراك بسرعة 2 ميجا بايت لستة شهور بنصف الثمن 115 جنيه.. ثم العودة بعد 
الستة شهور الى ثمن السرعة الحقيقي المضاعف وهو 230 جنيه 
فقررت ان اشترك في هذا العرض لمدة الستة شهور .. واقوم بتقليل السرعة قبل انتهاء المدة ...وهذا قانوني تماما ولم يرد به اي شئ مخالف لذلك عند الاشتراك 
وقبل انتهاء العرض في مدة الستة شهور ..بشهر كاااااااااااامل ... ذهبت الى هذا الفرع الموزع .. لدفع اخر شهر وتقليل السرعة قبل انتهاء العرض .. قالت لي الموظفة على الشباك .. لا لن اغير لك السرعة الان .. عند مجيئك لدفع الشهر القادم مقدما سيتم تقليل السرعة ....
فذهبت قبل يومين من استحقاق الفاتورة للشهر التالي وتأخري كل هذا لتسليمي مشروع تخرجي من الجامعة .. المهم  .. قبل العودة الى السعر الحقيقي لل 2 ميجا ... فقلت لها اريد تخفيض السرعة فقالت لي الموظفة لا يحق لك طلب تخفيض السرعة قبل اسبوع .. قلت لها ان ده مكانش بيحصل " قبل كده راحت قايلالي ده قانون نزل "الشهر ده " قلتلها اعمل ايه انا دلوقتي انتي قولتيلي اني اجي قبل الشهر ما يخلص .. قالتلي اه انا قلتلك كده بس انا مش حقدر اعملك حاجة وحتدفع الفلوس كاملة الشهر ده 

استسلمت وقلت فوضت امري لله ودفعت ال 230 بتوع الشهر .. الشهر الماضي من الان 
وفور دفعي المبلغ قمت بطلب تخفيض السرعة عن طريق الانترنت من يوم 30 يونيه الى 10 يوليو .. وتم قبول الطلب بالفعل وانتقل قيد التنفيذ يوم 17 في انتظار تقليل السرعة .. في انتظاره .. في انتظاره .. لم يتم تقليل السرعة .. واتى يوم الشهر الجديد يوم 23 تاريخ بعثي بهذه الرسالة اليكم والذي من المنتظر تقليل السرعة الفعلي فيه الى 1 ميجا .. وهو تاريخ بداية استحقاق شهر جديد مع الشركة .. 
فوجئت بعد تغير السرعة ..
اتصلت برقم خدمة العملاء 16333 ... فرد احد الموظفين .. وبعد اطلاعه على البيانات اخبرني بأنه يعتذر عن خطأ عدم تقليل السرعة وانه خطأ من عندهم ..وقال لي انه حان دفعك للشهر الجديد .. بثمن 230 جنيه .. فعندما ثورت عليه وقلت له ماذنبي انا في هذا انه خطأكم قال لي هناك حل وسط .. حضرتك تدفع 230 جنيه وانا عملت لحضرتك طلب تخفيض السرعة .. وفرق الفلوس حضرتك حيتحط في حسابك للشهر اللي بعده وكلها يومين عمل وسرعتك تتعدل ل 1 ميجا بتاريخ 26/7/2012 قولتله ماشي قاللي بس لازم حضرتك تدفع النهاردا .. قولتله حاضر .. من عينيا ..

رحت في تمام الساعة التاسعة والنصف الي الفرع الموزع وكانت في استقبالي موظفة اخرى تدعى نشوى .. قلت لها رقم تليفوني وقلت لها اود تقليل السرعة .. انا جي ادفع اهو الشهر الجديد وعايز اقلل السرعة قبل شهر كامل .. " اهو عداني العيب وازح كمان .. اخبرتني انه من شهر .. تم تنزيل قانون جديد .. ماينفعش اللي في العرض اللي انا فيه "بس" انهم يقللو سرعتهم ...... رحت قايلها انا الكلام ده ماتقاليش قبل كده ولما كلمت 16333 بشأن الموضوع مقاليش كده وده اصل المركز الرئيسي اللي انتو تابعيين ليه ..راحت قايلالي لأ ده موظف مش فاهم حاجة .. ماينفعش حضرتك تغير سرعة قبل 23/12/2012 وحتفضل تدفع 230 جنيه .. القانون نزل من شهر .. قولتلها طب ازاي القانون ده يتنفذ بأثر رجعي .. قالتلي القانون ده نازل للعرض بتاعكم بس ...
وانا اراهنكم حروح يوم 23/11/2012 حيقولولي نزل قانون جديد ولازم تفضل تدفع نفس المبلغ لحد سنة 2027 
ولما اتنرفزت قولتلها عايز الغي التعاقد .. قالتلي ماينفعش حضرتك تلغي التعاقد قبل سنة من تاريخ التعاقد ......... انا اتعمل عليا كماشة 
والكلام ده مش ليا انا بس لكل اللي مشتركين في نفس العرض ده
فيييييييييييين حماية المستهلك  

Wednesday, June 27, 2012

إن الفراغ لقاتلي



إن الفراغ لقاتلي .. 
عدو سلمت له نفسي واستسلمت 
وصلت لنهاية مطاف معلوم 
وشردت في طيات المجهول 
قطار طالما طار على قضبان الماضي 
حتى وجد نفسه يطيح من القمة متجها الى القاع
لا يوجد تحته الا الفراغ
أهو خاضع لقانون القصور الذاتي؟
وسيأتي عليه الوقت ليتوقف تماما ؟؟
دون نجاح .. دون طموح 
ام ربما تنبض فيه من جديد الروح 
كرة على منحدر 
وقعت تحت رحمة قوة الاحتكاك 
كبحت قوامها
 فأنتقلت من تكبر السادة الى شوق العبيد
تستنجد بأي شيئ جديد 
روتين .. لعين
ليس له دين
أمل سجين
يعد الايام تلو السنين
عدّاء فقد الامل في اللحاق بمن سبقوه 
سباح ضل الشطئان
فقتله الاستسلام
الظلام

Friday, May 25, 2012

الامل الغير مرغوب فيه

انه في يوم 25/5/2012
نكسة بطعم الامل الغير مرغوب فيه 
اكتب الان تسجيلا للحاضر عسى ان يكون شوكة في حلق المستقبل .. 
وان يراه جيل يأتي من بعدي فالتاريخ لا يوجد من يدافع عنه فدائما ما يكون جميع الاراء المستقبلية منافية للحقيقة وقت حدوثها 
....
 يحكى ان .. 5 ابطال قصة قصيرة .. وبطل قصة طويلة ..يراقب من بعيد
هؤلاء الخمسة هم : 
محمد مرسي مرشح الاخوان : وجد نفسه في السباق بالصدفة بعد استبعاد خيرت الشاطر ونزوله كا " استبن "لو خيرت الشاطر فرقع
حمدين صباحي : مناضل ثوري طامح للعلو والمزيد .. لديه من الافكار والمبادئ والعبارات البراقة والتأييد الجماهيري الكبير
عبد المنعم ابو الفتوح : الولد العاق الذي خرج عن طوع مرشد جماعة الاخوان .. وقرر ترشيح نفسه ليكون المرشح المطاطي الذي يسع الجميع .. 
عمرو موسى : ديك رومي متعجرف مغتر محسوب على النظام السابق لا يرى وزنا لاحد غير نفسه فقط
احمد شفيق : اخر رئيس وزراء لمصر دام وجوده شهر تقريبا .. وقع خلالها موقعة الجمل المشهورة ولديه بعض عبارات الاستفزاز الشعبي .. انا قتلت واتقتلت .. و حجيب للثوار بنبوني في ميدان التحرير .. و يوصف بأنه الرجل الخارق 

 في اول انتخابات في مصر بعد الثورة .. يتم وصفها بالنزيهة .. 
خلال الانتخابات الاولية للخارج ..
جائت النتائج كالتالي .. تقدم محمد مرسي مرشح الاخوان 
شئ متوقع مرشح اخوان لازم اغلبية هما بيعرفو ازاي يحشدو اغلبية كويس اوي 
في المركز الثاني عبد المنعم ابو الفتوح 
الثورة تنتصر في مرشحها الذهبي الاول الذي يجمع حوله الكثير 
في المركز الثالث حمدين صباحي 
اشتراكي ثوري مميز واضح الاتجاهات .. مابيحاولش يجامل حد عشان ياخد صوته 
المركز الرابع عمرو موسى 
اشطة عارفين انه حيكون ليه تأثير كبير اوي 
وفي ذيل المتقدمين .. احمد شفيق .. الفلول 
الحمدلله 

........................................................................
تخطئ الثورة 
ويضع الكل مصلحته الشخصية فوق كل اعتبار .. والاغترار بالمناصب والنشوة بالثورة والتأييد 
وبعد الاطمئنان تماما ... مستحيل يقدر عمرو موسى يفوز على ابو الفتوح او مرسي .. هما دول المرشحين اللي ممكن يقفو في وش الفلول عمرو موسى اللي حياخد بالتأكيد اغلبية 
.....
في وسط انقسام ثوري 
مابين الااخوان .. خائنين العهود .. المنفردين والمغتريين بالسلطة .. ومع ذلك بيلعب بيهم المجلس العسكري ومش بيوصلهم لبر محدد
ومابين انقسام واضح في اخر اسبوع في الانتخابات في مصر مابين ابو الفتوح مرشح الثورة .. وصباحي مرشح الثورة اوي 
وتقدم صباحي في معظم استفتاءات دولة الفيسبوك المخيبة الامال على ارض الواقع دائما 
..........................................................
وتأتي لحظة الحسم بعد الانتخاب ومرور اول لحظات فرز الصناديق 
في احباط مشيييييييييييييييييييييين للجميع ولا احد يصدق وحالة من الاكتئاب 
تظهر المؤشرات الاولية مثل سابقتها في الخرج على الترتيب .. في اول ساعة فرز 
ثم يبدأ تراجع عبد المنعم ابو الفتوح وحدة وحدة
وتقدم شفيق
وتقدم مرسي 
تقدم شفيق
تقدم مرسي 
مرسي مرسي مرسي مرسي
...هو الاول واحد طرفي الاعادة لا محالة 
تقدم شفيق تقدم شفيييق
صباحي ابو الفتوح
صباحي شفيق فتوح
ليتعادل صباحي وابو الفتوح .. برصيد 18% للاثنين 
ويعتليهم شفيق بفارق كبييير .. في اول ايام الفرز
........
في اليوم الثاني .. يثبت مستوى مرسي بنسبة 24الى 26 % في المقدمة 
ويليه بتقدم رهيييييييييييييب ولا احد يلعم من اين اتت كل هذه الملايين من الاصوات ..
لاحمد شفيق برصيد 23% ليناطح الاخوان .. ودي حاجة صعبة جدااااااااااااااا
وينعدم الامل .. ويبدأ الناس في السب 
شعب همجي بيختار اللي بيقتلوه 
شعب منيل يعني احنا قمنا بالثورة ليه من اساسه لما شفيق يرجع تاني بعد ما وقعناه 
وينجح صباحي من التحرر من التعادل مع ابو الفتوح .. الذي قلل من احتمال فوز صباحي تماما ... ولولا ابو الفتوح بأمانة " وانا ممن صوتو لابو الفتوح " لكان الفوز لصباحي لا محالة 
 الاسكندرية والقاهرة وبورسعيد وكفر الشيخ اصواتهم لحمدين صباحي ليجعلوه ينافس 

بشده وبعده ابو الفتوح بلا فلول تماما

ادهش الجميع اداء صباحي الممتاز فكان الحصان الاسود .. تحت شعار واحد مننا
وتحول هذا الشعار في اخر ساعتين من الفرز الى .. املنا كلنا .. فالكل كان يدعي يارب حمدين صباحي يحصل على المركز التاني 
والكل يدعو.. ولكن لا امل ...
فكيف لاحمد شفيق الرجل الخارق .. بعدما قدم اعضاء مجلس الشعب قانون العزل السياسي " متأخرا " فنجح في  تخطيه لتأخرهم 
وغبائهم 
"فكان المجلس ذو اغلبية من الاخوان والسلفيين وليس الثوريين الاصليين فلو كان من الثوريين اصل لكان قانون العزل قد تم عمله من اول جلسة " ولكن الغباء لا دين له 
بعد ما نجح الفريق شفيق من تخطيه والنجاح للعودة للسباق الرئاسي بعد مشهد درامي 
يجي دلوقتي وماينجحش ... يبقا بطل الفيلم ازاي .. دي حتى القفلة تبقا وحشة 
والمدهش حالة الصمممممممممممممت التي لاحقت عمرو موسة من بعد ال"خازوق " الذي تلقاه بعد غروره الكبير اوي 
فقد قال لابو الفتوح " من الافضل ان تنسحب لصالحي " وقال على شفيق كده كمان بالاضافة الى حرب ضارية 
وكلام على ان شفيق لو فاز حتقوم ثورات ضده وحروب كلامية كبيرة اوي 
وقال عن صباحي " ده لو شمها " .. اهو شمها يا خويا وكان حياخدها لولا اصوات ابو الفتوح 
انا مش بلوم ابو الفتوح ولا مؤيديه اللي انا منهم .. كل الاراء كانت بتقول ممكن ابو الفتوح ينافس على التاني جدا جدا 
ولا بلوم على مؤيدين صباحي مهاجمة ابو الفتوح بدال من الدعوة الرقيقة 
انا بلوم الاتنين في نوع من الغباء السياسي في عدم التوحد ...
 قالها البطل القصة الطويلة المراقب من بعيد "محمد البرادعي " الذي هاجمه طوب الارض 
ده خاين ده عميل ده مايعرفش حاجة عن مصر .. ده جبان وبيهرب من الانتخابات عشان كده بينسحب 
للمعلومات ..
البرادعي طالب بالدستور اولا .. 
ورغم ذلك صوت الجميع 74% لصالح التعديلات الدستورية وليس انشاء دستور جديد 
قال لابد من عمل دستور اولا لعمل العزل السياسي اولا .. لان لو كان مبارك نزل الانتخابات انهاردا كان فاز ب 90% دائما التغيير لا يصدر الا من 10% مش دايما الاغلبية صح 
ونتيجة لنعم للتعديلات الدستورية قعدنا سنة كملة بدون ستور .. وببرلمان منقوص الصلاحيات 
ولا جديد 
الدستور اولا يا بلد مافيهاش دكر ... حكمة قالها راجل "بيتهته" في بلد الكل اصبح فيها

 بيعرف يتكلم 

او عامل نفسه بيعرف يتكلم 

يوم الانتخابات سافر البرادعي بعد ما قال لابد لصباحي وابو الفتوح ان يتحدو ..

فلم يصغي احد

فخسر الاثنين 
..
لتصبح جولة الاعادة مابين محمد مرسي .. المغلوب على امره 
و احمد شفيق .. الفلول المتصدر النتيجة بتأييد الفلول واعداء الثورة والفلاحيين الذين لم تصل اليهم رياح التغيير بعد 

اسوأ النتائج اليوم 
ضاعت الثورة بأيدينا 
واليوم يأتي الاخوان بعدما اقترب شفيق جدا جدا من الفوز عليهم 
ليتسولو اصوات معارضيهم من الثوار الذين خانوهم من قبل كثيرا 
تحت مسمى الثورة وانقذو الثورة 
ولكن كليهما سيئ
مرسي هو الامل الغير مرغوب فيه
من الافضل ابتزاز الاخوان لانهم لا يحفظون عهد 
او الوقوف على الحياد لان كل النتائج تؤدي الى ثورة جديدة 

Wednesday, May 9, 2012

اسكندرية العصر الخسيس

صورة نادرة لقذف مكتب البريد بشارع السبع بنات
*مصدر الصورة * جروب الاسكندرية زمان
مدينة بلا داعي
حركة بناء وهدم فوق المستفزة
تذكرني بقذف الاسكندرية عند الاحتلال البريطاني لمصر 
  سمحت لي الصدفة البحتة في طريقي الى شقتي ب "فيكتوريا" بعد وقت طوييييييل .. وقد تبدل الحال كثيرا عنها منذ حينها ... 
مرورا بشارع ابي قير .. الذي اصابني بصدمة حضارية من "المليطة " اللي حصلت فيه 
اصبح كالمرأة المشوهة التي تظن ان وضع بعض المساحيق الملونة بألوان ليس لها علاقة ببعضها سوف يقلل سوء منظرها او سيمحو عنها قبحها او يزيد جمالها المنعدم
 ...منظر شارع ابو قير من اوله .. لو رجعنا بنظرنا الى ساعة الزهور وقسم باب شرق ايواااا هو ده شارع ابو قير اللي انا اعرفه .. شارع متسع ... متواضع في الارتفاعات على الصفين 
ثم تمضي قليلا لتبدأ الكارثة  في التدرج 
كنت احسب الموضوع هينا .. اهو قصر .. قصرين .. تلاتة حيتهدو ... بس العملية قلبت قلة ادب 
و قلة الادب دي بمنطق شعب همجي .. اتعود على المليطة والبظوطة .. فا بيلحقو يخلصو قلة ادب قبل ما تتمسك البلد من جديد
انتهازية وسوء سلوك تحت مسمى الربح ... كنت اتمنى في هذه اللحظة ان اكون من اعضاء هيئة للحفاظ على التراث ..بس مش بأدب وانذارات .. بكرابيج ومسدسات

اختلفت الاسكندرية كثيرا ... لقد مررت بحوالي 9 قصور مهدومة تماما ..وطالع مكانها عمارات قبيحة الصنعة ..
وما خفي كان اعظم 
وما اعتقدش الموضوع يتحل ب 100 وقفة احتجاجية 
بسأل نفسي هو امتى تسونامي يجتاح اسكندرية 
ساعتها حيكون هدم القصور والفلل دي مع بقية العمارات التى تنتمي لفصائل علب الكبريت ذات الشبابيك سيكون شئ من عند الله .. الله جاب الله خد الله عليه العوض .. ونسيب المدينة على المحارة يمكن حد تاني يعمل عليها حضارة ويطلعونا من تحت البحر ويتفرجو علينا ويقولو دول ناس كانو بيسكنو اسكندرية من 1300 سنة وبوظو شكلها 
ومكانوش بيقدرو حتى آدمية الانسان 
يا امم .. عمارة 23 دور بتطل على شارع وحيد 6 متر ... في شرع مين ده يا عمدة  
نحن شعب بلا ضمير .. همنا على كرشنا وعلى جيبنا وبس انما انشالله حتى نعوف في ال ... مش مهم .. المهم ان الباشا والهانم عايشين في مكان كويس .. والناس اللي عاملينلهم عمارات سكنية يعيشو في اي هبل مش مهم .. ويارت الهبل ده رخيص ..
objection
يا رب افرجها من عندك ... 

Monday, April 30, 2012

ترام الرمل


على ايقاع طيران ترام اسكندرية الزرقا .. و في استأذانها لسماح السكون بباطنها في المحطة .. اشخاص تموت قصتهم بخروجهم منها و بداخلها اشخاص يولدون
على رصيف محطة بولكلي امام ابو ربيع  شاب وفتاة في عمر التعليم الثانوي يحملون طعامهم وهم يمضغون بضعة لقيمات منه
وتخطو خطواتهم المرتبكة لصعود الترام اثناء استعدادها للرحيل لاستقبال زوار اخرين على محطة اخرى وتوديع اخرين
وقد تهربا اليوم من دراستهما لقضاء يوم ممتع سويا بعيدا عن الدراسة المملة وبعيدا عن الاهل وفي تحدي واضح لعيون الاخرين
وها هو رجل مسن بطارية عمره غير قابلة للشحن ..فقد اكتفى .. ينظر اليهما ويقول في غيرة و حزن .. جيل منيل بايظ .. وهو يحدث صديق عمله المحال على المعاش هو الاخر في اتجاه طريقهما الى قهوتهما المفضلة في محطة الرمل .. واثناء قراءة الاخير لجرائده القومية التي تربى عليها ولا يثق الا بها .. ويقول لصديقه " طبعا جيل بايظ وحيودوا البلد دي في داهية متسرعين وطايشين .. مش دول اللي ركبو الاخوان فوقينا ..جيل فسدان .. هما مايستاهلوش ده ذنب مبارك
واذا بشاب ثوري داخل الجيش المصري وهو مرتديا ملابس ملكية يستشيط غيظا لهذا الكلام قائلا .. ايه الكلام اللي بتقوله ده يا استاذ هو مش اللي اختار الاخوان دول الناس وكانو فكرينهم بيحلو وبيربطو وهما اللي وحلونا الوحلة دي ايه علاقة شباب الثورة بالموضوع هما لسة حكمو عشان تحاسبهم ..
في رد متهكم من الرجل ذو جريدة .. و انتا بقا من بتوع شباب الثورة اللي سايحين في الميادين ومش لاقيين بيت يلمهم
في رد الشاب .. لا انا من ضباط الجيش ..
في رد العجوز .. اااااه عشان كده مش متضايق من الاخوان .. طب ماحنا بنقول كده عشان الجيش وربنا يخليلنا المشير
وفي رد الشاب بداخل نفسه ولا يبدي اي رد فعل .. المشير اه .. ابن ال ........ ولا بلاش
وتمضي المحطات تلو الاخرى وفي المحطة التالية ينزل الشاب والفتاة الثانويين وتصعد فتاة اقل ما يقال عنها انها تستحق رمز ابو الفتوح .. الفرس .. مرتدية الفيزون القابض على نصفها السفلي كالطفل المتدلي من شباك بالدور الثاني عشر ومتمسك بيد تريد ان تنقذه من السقوط
واذا بالشاب في النزول تهرول عينيه نحوها وهي صاعدة من نفس مكان نزوله ويشتم رائحة البرفان الغالي ذو الرائحة المثيرة ..
ويظل ينظر وهو ينزل وحتى تجلس ويراقبها من الشباك وهو على رصيف المحطة بعد النزول كا برادة الحديد المنجذب لمغناطيس
فيتعثر ويمضي في طريقه مع فتاته الثانوية
وتبدأ الفتاة المثيرة بالجلوس وقد جلست امام شاب ثلاثيني لم يجد الى الرزق باب .. فهو خريج جامعي لكلية ليس لها اي داعِ للوجود
 يبدأ يومه بالبحث عن عمل يوميا بزيه ال formal وقد اشتكى حذائه من كثرة السعي واذ به يتفاجئ بهذه الفتاه المثيرة تجلس امامه
مباشرة فيستثار و يبدأ كأي شاب خجول يتمنى ان يتعرف على فتاة في مثل هذا الجمال .. ان يفعل ما يفعله اي شاب صغير في درس خصوصي  "ومعاه بنات " انه " يبعت نظرات " ويتفحص في خجل وينظر الى وجهها .. وهي بالنسبالها لانها تعلم انها جميلة وبذلك تتعالا اكثر واكثر ل" ترسم نفسها "امام الاخرين .. تبدأ بالنظر بتعالي وتخرج هواء من فمها ببطئ .. " قال يعني مخنوقة "
واذا بصوت ارتطام معدنين ببعض يفصل احساسه برجل بقميص رمادي يبصله ويقول له .. تذاكر
وفي وسط الزحام اطفال مزوغين من الكمسري يقفون في اخر الترام عند الباب ويمنعونه من الانغلاق ويبثقون على الناس من الشباك و الباب .............. وكل هذا العالم الغير مبالي يصب في مصلحة لرجل اصلع شاذ يتحرش بطفل في خلسة من الجميع لتدور السنين ويصبح هو الاخر ..
وتصل الترام الى المحطة الاخيرة ويتبدل مكان السائق وتدور الدائرة وتختلف الوجوه والاسامي ولا تختلف صفات الشخصيات
لا تتم

Tuesday, March 20, 2012

دستور خالي الدسم



هو المجتمع ايه غير شوية طبقات فوق بعضها 
 لو اختزلنا الطبقات دي كلها في طبقة واحدة او طبقتين .. معنى كده ان باقي الطبقات الغير ممثلة ما هي الا طبقات هامشية لا تستحق حتى النظر اليها او مراعاتها 
ومش لازم تكون اقليات بالمعنى السياسي الضيق الافق بس ... لا بالعكس .. ممكن تكون طبقات ممثلين عن ذوي الاعاقة او اصحاب امراض التوحد .. او حتى المساجين واصحاب الديانات الاخرى واطفال الشوارع وغيرها .. 
يعني ايه دستور 
كلمة دستور بتفكرني بمعنى الدولة المدنية 
اللي ملهاش خط واضح مأثر عليها 
هي بالظبط زي مركز الدايرة .... على بعد متساوي من جميع النقاط اللانهائية المماسة للدايرة دي 
ماتظلمش حد فيها ولا تجور على حق اختها غير خاضعة لاغلبية من الاساس 
لان بكل بساطة بضرب مثال لوضع مصر الحالي ..ليه حزب زي الحرية والعدالة او النور هما الاغلبية في البرلمان ..
لسبب واحد بس ..هو ان تم دخول هذه الاحزاب مرتين .. يعني تم التصويت عليها في الفردي والقوائم ايضا 
وبكده اللي يدخل يدي صوته شروة واحدة لحزب بعينه .. فردي وقوائم وبكده يكونو هما الاغلبية الكاسحة على حسب الشعبية 
وبناءا عليه .. كتييييييييييير اوي حيتم تهميشهم من المجتمع لانهم غير ممثلين في البرلمان 

نفترض جدلا .. ان تم وضع الدستور خلاص بأكسحية وعدم احترام اقلية من حزب الحرية والعدالة 
وحطو مادة في الدستور خاصة بأن مصر دولة برلمانية .. او حتى شبه رئاسية 
وحطو مادة في الدستور تنص على نفس المادة الجائت بيهم كأغلبية .. اللي هي ان الاحزاب تنتخب في مجلس الشعب في الفردي والقوائم .. تاني .. 
اللي حيحصل ساعتها بعد التهميش ده كله .. ومع تراكم اخطاء من الاخوان .. حنسمع .. الشعب يريد اسقاط الاخوان .. ونفس الناس اللي انتخبتهم .. من 10 سنين هي هي الناس اللي حتثور ضدهم ..وبناءا عليه حندوس ري ستارت .. ونعمل دستور تاني 
طب فرض جدلا ..
انهم نصو على ان الانتخابات مجلس الشعب الاحزاب فقط في القوائم ومستقلين فردي .. ساعتها حتحصل مشكلة تانية ..
هي ان الاخوان ساعتها مش حيكونو اغلبية خالص .. لان مش حيكون فيه اغلبية خاااالص زي اللي احنا حاسين بيه و"كان المفرض ده اللي يحصل عشان هما اللي يعملو الدستور ويكون 50% ويخلصونا " 
المهم وساعتها بقا .. حيكون الدستور اللي اتحط مش مناسب للمجلس الجديد .. وحتسجل اعتراضات من النواب وبناءا عليه .. حيتلغى الدستور ده ويطلع دستور جديد يتوافق مع التوازن الصحيح ..
...........
سؤال بقا .. مييييين العبقري ابن العبقري .. اللي اتاح فرصة اصلا لمجلس الشعب انه هو اللي يعمل الدستور ؟؟؟؟؟ المفروض مجلس الشعب يصوت ويحكم الدستور بس مايكونش هو اللي بيعمل مواده ... 
وبعدين يا ناس يا كفرة تسيبو فقهاء دستوريين زي الورد وتقعدو انتو تلغوصو في الدستور لوحدكو 
لا وايه كمان .. انتو اللي تختارو ال 50 % اللي مش من الاحزاب ؟؟؟ تفتكرو احزاب دينية حتصوت بأغلبية وتستغل ديكتاتورية الاغلبية عشان حتجيب مين احمد زويل ؟؟؟ 

اي حاجة تخضع لديكتاتورية الاغلبية .. موااااااااااااافق .. إلا الدستور ... دستور من طرف واحد من غير باقي طوائف المجتمع يعني من الاخر دستور خالي الدسم 

Tuesday, February 7, 2012

11/2/2012 Twix وقف لحظة


للتاريخ ..
ثورة قامت .. ومقامتش..او بمعنى اخر سحبو الكرسي من تحت منها لما جت تقعد ... فا وقعت .. وعضمها اتكسر 
... لاول مرة في مصر .. حصريا 
رئيس سابق محدش اختاره قامت ضده ثورة .. معزز مكرم في سريره واوكسيجينه بمحلوله بنضارت شمسه.. وربنا موقفله مدير سجن زي رياض المنفلوطي يرشله الزنازين ويبيض الزنانة ويجهزها لتشريفة فخامته في سجنه الخاص 
وابناء رئيس سابق .. محدش اختاره ..ووزير داخليته كلبه المدلل يتم ضرب لهم تعظيم سلام من قيادات ورتب اقل منه وكأنه لسه في السلطة 
ونجد اشياء كثيرة تتم بدون سبب 
مماطلة في المحاكمة .. بدون سبب 
احداث دموية .. بدون سبب 
تأيد للمجلس العسكري من الاخوان والسلفيين .. بدون سبب .. وهما نفسهم لو فكرو شوية حيلاقو ان تأيدهم ليهم بدون اي سبب 
.. وان كان فيه سبب فهو عنداَ في اللي بيقولو رحيل المجلس العسكري لا اكثر ولا اقل

المجلس العسكري ده .. اللي معرفش اصلا هو دوره ايه في الحياة .. بسأل نفسي هو عمل ايه عشان يحمي البلد دي ؟؟؟!!!! هل عمل شرطة جديدة غير تابعة للداخلية .. يلبسهم لبس محايد .. انشالله لبس راقصين باليه .. وينزلهم الشارع ويمارسو سلطتهم كشرطة جديدة ليست ذات ماضي اسود ولا تصفية حسابات مع ثوار 

هل المجلس العسكري قام بحل سحري في الاقتصاد ؟؟؟ انا نسيت حتى ان الجنزوري رئيس وزرا .. وبقول لنفسي .. دانا كنت بشوف عصام شرف اكتر منه .. 

ثورة 25 يناير .. ليست ثورة ..
لوكانت ثورة فعلا .. كان زمان كل القيادات دي من الحزب الوطني والمجلس العسكري تم عزلهم سياسيا و قياديا ومحاكمتهم في ميعاد اقصاه شهر ....قضاء عادل .. ده بيخليني بسأل نفسي .. هو عمر بن الخطاب كان بيحكم في قضايا في كام سنة .. وياترى كانت الجلسة بتتأجل ولا لا 

اسلوبنا اسلوب غبي .. وتقليد اعمى لشكل الغرب الشيك .. اسلوب المحاماه القذر .. في مساندة الجاني وكل الادلة ضده والرشاوي وتزوير الحقائق واللف والدوران 
الى القضاة المترددين 
الي القيادات اللي ماتعرفش لالف من كوز الدرة 

لو كانت دي ثورة لكان الحكام ثوريين .. ومعتقدش ان طنطاوي ثوري عشان ينفذ مطالب الثورة ...
بمعنى اصح .. تبقو قبلوني

اثبت الاخوان و السلفيين بالنسبالي وده رأيي الشخصي ..
انهم اقل حاجة تتقال عنهم .. رافضي الرأي الاخر ودة باين جدا من جلسة تاريخ انهاردا "07/02/2012" و متعصبيين ضد اي رأي اخر 
وده كان باين جدا من الغوغائية في رفض الحديث للنائب محمد ابو حامد ..

...............
في النهاية خطابي للمستقبل ....احنا اسفين يا من اتى من بعدنا .. احنا معرفناش نحافظ على ثورتنا .. جايز تدعو علينا وتقولو انتو خربتو مصر بعد كده .. بس لو فعلا انتو عايشين في وقتنا حتعرفو ازاي احنا اتضحك علينا 
تحياتي لجروب .. البس عشان خارجين

Friday, January 13, 2012

الوطن الصلصالي


اشتم فيكي رائحة الخير وما فيكي بالخير بادي
مرض الروتين هشهش عظامك فغدوتي اعدى الاعادي
مع انك كنتي بلادي 
وفيكي بلادي 
بلدي ليست ابدا بالضرورة محض وطن ولدت فيه
كلمة وطن نور عزة بكل كياني افتديه
.. 
ركن احبه .. اجلس اليه كلما ضاقت بي صدور العبادِ
فهو وطني
فكرة لطالما اعجبت بها وهرولت لاحققها بشتى الايادي
فهي وطني
ضوء احب التقيه 
عقل امارس العيب فيه 
حب التعلم لي وطن وقت الفراغ اسكنت فيه 
جسد ولدت واموت فيه 
هو وطني 
..
وطن احبه ليس اغنية اغنيها بعد كأس الامم .. يا امم 
وطن شريف لا يقبل تزيف ولا الرشاوي وتلفيق التهم
وطن فيه الانسان اسمى معاني التضحية
رئيسها لا يجيئ بالتذكية 
 .. وطن يؤمن بالتعددية.. البايولوجية 
وطن خالي من البلطجية 
وطن خالي مالعنطزة .. والنرجسية
احشائي تعمل من اجله واخر همهم  الحوافز التشجيعية
...
من قال ان التبعية شئ جيد 
الزهر عباد الشمس .. ولا يوجد للشمس سيد
اريد ان اكون حرا مثلها 
الارض في نظري ممتلكها 
بدون حدود ولا فيزا 
امتلك ارضا .. ببريزة
اعيش وحدي في كون نفسي 
ابنيه وبفكري اشيد
..
وطن يبدأ من صفرالصحاري 
اذا هطل المطر فيه يصرف و لا يسد المجاري
وطن يهدم ويبنى على نظافة 
فيه الاعالي ساكني القرافة 
سواسية في الحقوق والابداع 
وطن مختلف الايقاع 
من القمة وحتى القاع 
يسمع سيطه في شتى البقاع 
اساساته مدقوقة في خيالي المعماري 
..
وطن بعقلي وقلبي افتديه 
وطن خيالي منحوت فيه

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com