Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Thursday, February 25, 2010

؟؟؟؟؟؟؟؟؟؟؟؟؟؟؟؟؟


تخيل معايا ان الدنيا كلها مش حباك.....ممكن تعمل ايه ساعتها؟؟؟
هل حتحاول تقنعهم بيك ؟؟؟؟....ولا حتقول وانا مالي اللي يرضى بيا يرضى واللي مايرضاش يشرب مالبحر
طب انتا حتبص لنفسك ازاي؟؟؟ على انك صح ولا غلط؟؟؟؟
يعني هل حتشك في نفسك انك بتتصرف غلط عشان كده الناس مش حباك؟؟؟؟ ولا حتقول انا مافيش حاجة بعملها غلط وكل دي ضغائن واحقاد ؟؟؟
طب بلاش دي
حاول تتخيل معايا ان واحدة انتا بتحبها اوي وبتتكلم معاها وفي وقت مانتا حتقولها انك بتحبها تطلع بتحب صحبك وبتعشقه
طب بلاش
تخيل انك بتلعب بوتيل مع الناس الرزلة اللي بتلعب معاهم كل مرة واللي بيسألوك نفس السؤال "انتا حبيت كام مرة" وساعتها انتا حتحور وتنخع وتقول انا حبيت 5 مرات ...عشان الحسد ...في حين انك ممكن ماتكن كلمت بنت الا لو سألتك وانتا ماشي في الشارع الساعة كام

كام مرة عدى الراجل الرخم بتاع التسجيل اللي بيعدي في الحواري المصرية ومشغل الاغنية العاطفية "ياني ياني ياني ..مش حعمل كده تاني" اللي هي تبع سلسلة المغنيين الشعبيين اللي صحو الصبح ملقوش نفسيتهم.....والظاهرة دي طلعت بعد اغنية "عبده والشيطان" على طول

امتى اخر مرة حسيت فيها انك انسان؟؟؟؟؟لا سؤال اوجه منه,,,امتى اخر مرة سألت نفسة حيحصل ايه لو شديت الفيشة؟
بمعنى
هو احنا مخلوقين؟؟؟؟ مسألتش نفسك قبل كده ...هو انتا حقيقه؟؟؟؟ يعني موجود ؟؟؟ولا انا ممكن اكون من عالم من صنع خيالي والدنيا اصلا مش موجودة
طب ليه انا مش شايف نفسي؟؟؟
طب هو محدش فيكو بيحس انه عاش في اللحظة دي من حياته قبل كده ...او شافها قبل كده قبل مايعملها
وبعدين يحس ان اللي هو بيعمله ده شافه قبل كده وهو بيعمله؟؟؟؟؟؟؟؟ فاهمين؟؟؟؟
طب على رأي احمد عيد "هو موبايل ليلى علوي كارت ولا خط؟؟؟؟؟؟؟؟
ايه اللي حيحصل يعني لو الحياة مش كوك زيرو؟؟؟؟؟؟؟؟ يعني مافيش حاجة ماللي في الاعلان حصلت؟؟؟؟

ليه محدش عمل مسرح بحق ربنا غير محمد صبحي؟؟؟؟؟؟؟
ليه دايما اسرائيل بتدخل مسابقات في التصميم الصناعي ومصر لا؟؟؟؟؟؟
واللي مايعرفش التصميم الصناعي دي تبقا كارثة لوحدها .....التصميم الصناعي انك تتناول حاجة معينه في الحياة موجودة فالنفترض انها كباية....وعايز
تطورها وتصلحها وتخليها مالهاش عيوب بأنك تبتكر فيها كتيييييييييير اوي ...وتدخل مسابقة بالكلام ده وتفوز بيها

كان حلمي وانا صغير اني اكون رئيس جمهورية في وقت من الاوقات لما كنت في ابتدائي لدرجة اني مكنتش بعمل حاجة في حياتي غير اني برسم خريطة للعالم العربي
وبفكر ازاي اقدر اضم العالم العربي لمملكتي
هي دي تعتبر ايه؟؟؟؟ نزعة غزو وشر وحب تملك؟؟؟؟؟؟؟
هو مافيش مرة كده يجي ابوتريكة او حتى جدو في السياسة؟؟؟؟
انا بحلم باللحظة اللي ندي فيها المعونة لامريكا

Wednesday, February 17, 2010

عايز اتكلم


مش عارف بس انا عايز افضفض.... من بعد اسبوعين ليا في الكلية بتاعتي
وكنا لسة داخلين الكلية....

مكنتش اعرف حد غير كاف كان ساعتها مش صاحبي اوي

انما مكانش ليا حد مصاحبه اصلا كنت لوحدي تماااااااااااما
وده اكتر احساس بحبه
ناس بيبصولها على انها نكد او يأس او احباط !!!!
بس انا شايفها مملكة
وانتا ملكها والمتحكم في سيرها
كأنك عايش في بيت وبتفرشه
ممكن يكون البيت ده مكركب ومش هادف لحاجة
وومكن يكون بناء ودايما بتحاول انك تكون احسن

بعد اسبوعين من الدراسة والوحدة
قالو المعيدين اللي عندنا احنا عاملين حاجة اسمها بلوج ..وكنت ساعتها اول مرة اعرف الاسم ده
فعملوه وقالو عايزنكو تقولو رأيكو بصراحة في الكلية وفينا
انا سمعت كلمة الصراحة ودي كلمة مستفزة اوي
فا رحت كاتب اول موضوع يتعلق بالكلية بعيدا عن الدراسة

رأيي في المعيدين

وقلت رأيي فيهم بصراحة الحلو والوحش .. واعتبروني جريئ
وانا اليوم اللي صباحية ما كتبت الموضوع والاقي ردود فعل من اول ما دخلت الكلية
اللي يقوللي انتا حتتنفخ واللي يقوللي دا انتا حتترفع " بالضمة المقدرة" والل يقول واللي يقوول
وانا كل ده كان بيخوفني زيادة
احيه بعد اسبوعين حترفد من الكلية امال عبال ماكمل خامس سنة حعمل ايه
وفي وسط ده كله كان في واحد كان بيبصلي اوي معرفش ايه البصة دي ؟؟؟ لحد دلوقتي مش عارف اترجم البصة دي
زي ماتكون كده فرح
وشوية شوية بقينا صحاب ....معرفش ازاي
استريحنا لبعض اوي حسيت اني لقيت واحد اكتر من اخويا
وكنت بحبه جدا
نقعد عالبحر كتيييييييييير اوي ونفضفض لبعض في كل حاجة
العيشة الكلية البنات الهموم العقد الكلاكيع
طرق المعاملة من الناس اللي حوالينا
زي اي اتنين صحاب
بس اكتر حاجة كانت بتدايقني فيه ساعتها انه كان بيقول انه بيعرف يغني
وده مش صح
لان الغنا حاجة .. واللي كنت بسمعه ده كان حاجة تانية
ولما احاول انصحه مايغنيش بكل بساطة يقول نفس الجملة اللي حافظها عشان يرد على الناس
هو انتا متخصص في المزيكا؟؟...وعلى الرغم ان المزيكا معايا من صغري وودني شاربة منها لحد ما طفحت
الا اني كنت بسكت
بس اصلا الحكاية مش محتاجة متخصص ... لان الجمهور مش متخصص
ولا يهمه المقام اللي انتا بتغنيه ده ايه ولا بيستقر عند الدو ولا عند الريه
ولما زهقت من تكرار نفس الجملة كل مرة قلتله انا بعزف بقالي كذا وبعمل اغاني وكدا

فا بدأ يقتنع بكلامي من جواه بس المرة دي بجملة تاني.... ماهو اصل صوتي عايز يتدرب ولما اتدرب حعمل المشعارف ايه

بس الصح هو ان
الصوت الوحش وحش حتى لو دربه بني خزاعة
والصوت الحلو حلو حتى لو طالع من بلاعة

قلنا مااااااااااشي تدريب تدريب مافيش مشكلة... بس اصلا التدريب مش بيخلق صوت حلو
التدريب بيوسع مجال الصوت بيقلل الذبذبة ويحسن المخارج ويقلل النشاز ....بس مش بيعمل صوت
ازاي مستني عربية تشتغل منغير مفتاح

عدينا الموضوع ده ...قلنا طب ماشي
راح قايل بعد كده لا انا الناس بتقول عليا بغني انجليزي احلى من العربي
لحد هنا وستوووووووووب.... لا يغني الانجليزي الا الانجليزي
عمر ما واحد هندوسي مايأم مسلم في الصلا
استحالة
حتى لو الهندوسي ده عمل قرد
وكل الناس فاهمة ان الانجليزي ده حاجة سهلة انها تتغنى....ده عليهم عرب تمخول النافوخ
وبيتعاملو بكوردات في مصر مش بيتعاملو بيها اساسا
فا نوع من انواع التشجيع وعدم تكسير المأآآآآديف قلت ماشي وماله
ظهر بعد كده نوع من انواع المجاراة او وضع الراس بالراس
تخيل ان صاحبك يتحول بقدرة قادر انه واحد عايز يبقا احسن منك وخلاص
لااااا ومش كده وبس ده كمان ينصحك ويعمل نفسه واعظ عشان يتنطط عليك
والاقتناع بسياسة الاكتساب بس بطريقة هبلة وتغييييييظ
فالنفترض ان انا قلت كلمة وانا بدردش معاه الاقيه بعديها بتلت تيام
بيكلمني باللي انا كنت بنصحه بيه على اساس ان الكلمة دي طالعه منه هو
...........
بالزمة اقول ايه لا مش كده وبس
الكلمة اللي كانت بتفرسني بقا وتخليني اتجنن
"حاول تطور نفسك" طب وحضرتك نبي يعني؟؟؟؟
لا تنطق عن الهوى مثلا
نازل من السما بأجنحة مش بتغلط
خلاص مدام كده يبقا تحط مداس في بقك وتتكتم

في يوم من ذوات الايام اتمخولت في عقلي وكان بيكلمني
وقاللي ميسو انا عملت اغنية وعايزك تسمعها
انا من جوايا فرحت وقلت وريني ايه الاغنية دي
اداني كلام ....استفذني فنيا وحسيت ان ممكن يتجمل ويطلع منه حاجة
على الرغم ان الكلام ده مكانش مترتب ومكانش واضح في اختيار كوبليه معين
وكان مسمعهولي بشئ لا يمت بكلمة لحن بصلة من اول الاغنية لاخرها بنفس التيمة

عدلتهاله في الكلام ونظمتها وعملتلها كوبليهات وكلام من عندي
ورحت قاعد مع نفسي وقلت طب دي ممكن تتلحن ازاي
واحدة واحدة ولقيتني دخلت في الجو وطلعت لحن ضاع الحب
بعد ما خلصتها رحت مسمعهاله عجبته....
على الرغم اني كان ممكن لو كنت انسان من جوايا بالشتيمة اللي شتمهالي في اخر يوم ليا معاه
مكنتش عملت الاغنية دي اصلا وكنت قلتله على الهبل اللي كان معمول ده حلو وخلاص

عملتها وقاللي انه حيغنيها ....اخ بدأت المشاكل ..... يا حج اس ماتسيب حدتاني صوته حلو يغنيها
ابدااااااااااااااااااااا راسه والف سيف
ممممم
اتورط ورحت عاملهاله ووزعتها ....طب دلوقتي انا عامل اغنيه والمفروض اني اخد حقها يعني دي افكار طالعة في الشغل
مرضيش لانه متعشم فيا على اني صاحبه للاسف
بس الشغل اصلا مافيهوش صحاب
وده رزق يعني
ولا انا حفضل طول عمري اجامل؟؟؟؟؟؟
مرضيش يدفع ولا حتى 10 جنيه
ومع ذلك قلت ماشي حوزعهاله بس على قد فلوسه اللي مدفعهاش
وبعد ما خلصتها ..بصراحة استخسرت الاغنية فيه لان كان لازم اي حد تاني يغنيها غيره
ومكانش راضي حد يغنيها غيره
عل الرغم انه وهو بيسجل معايا في بيتي كان بيغلط كتييييييييييييييير اوي اوي اوي اوي
والمصيبة ان ودنه كمان مش حاسة بالغلط ده
طب قلت انتا مش عاوز حد يغنيها ياعم وبتغلط كتير
حغني الحتت اللي انتا بتغلط فيها
على اساس ان انا اللي ملحنها واكتر واحد حاسس باللحن
فا مرضيش
طب ممكن انزل الاغنية بصوتي زي ما باقي الملحنيين بيعملو
زي تامر علي على سبيل المثال كل الاغاني اللي ملحنها للناس
مغنيها بصوته ليثبت حقه فيها
وانا بصراحة خدت الحكاية دي بتفاؤل
كل اغنية الحنها لحد انزلها بصوتي في صفحتي الخاصة عالفيس بوك
حتى لو الصفحة دي مافيهاش حد
بس بردو هو مرديش
على الرغم ان الاغنية دي لحني ملكي
احساسي انا
شغلي
بتتحكم كمان في شغلي
وكمان عشان مايحصلش مقارنة مابيني وبينه
على الرغم اني انا الدغ اصلا ...... خايف من واحد الدغ؟؟؟؟؟؟؟؟؟؟؟؟
ده المفروض اصلا الناس تتريأ عليا لما تسمعنى
فاتخانقنا خناقة لرب السما وحلفت ماكلمه تاني
لدرجة ان في ناس صحابنا اتدخلو بس الصح اني احسن اني معرفهوش تاني

ما علينا
قبلها ....قاللي انه عايز يجيب جيتار ودخل الموضوع في دماغه اوي عشان الجيتار اللي عندي في البيت
قلت ماشي يا مرحبا
ورحت معاه جبت الجيتار ونقيتهوله
راح قايللي انه عايز يتعلم عليه فاقلتله كده
احسن حاجة نروح نتعلم في الكونسر فاتوار
فا فعلا رحنا حجزنا هناك
وانا اصلا كنت بتدرب اورج هناك فا رجلي واخدة على المكان
وقابلنا الاستاز حسام الشافعي واتفقنا معاه وفعلا رحنا شهرين اتدربنا
ودخل رمضان وقربت الدراسة وماينفعش نخلط بين هم الدراسة اللي واكله كل الوقت
وبين الهواية

فا قعدت انا وهو (والله اعلم اذا كان بيروح من ورايا ولا لا اصلا ) على العموم مش فارقة كتير ربنا يسهله
على الرغم انها تبقا حركة في منتهى الندالة
المهم حتى في المشاريع بتاعت الكلية
بحس جدا انه بيبصلي في الدرجة وقت ما اجيب اعلى منه
وبلاقيه يلف على الدكاترة عايز يعلا بأي طريقة
على الرغم ان درجته بتبقا عادية يعني
وناس كتير جيباها
انما لو هو جايب اعلى مني بحس بنظرة شماتة بطرييييييييييييييييييييقة
حتى لو درجته اعلى مني بس وحشة بردو... طب عايز ايه؟؟؟
انا مقياسك مثلا؟؟؟؟؟
انا اللي بيفرح على اساسي او بيزعل على اساسي
؟؟؟؟
وبعدين لا له دعوة لا بالغنا ولا التأليف ولا التلحين....بيحشر نفسه ليه وخلاص؟؟؟؟
بيزاحمني وخلاص؟؟؟؟؟

اخر مرة اتخانقت معاه من كام يوم عشان كان بيغلس عليا في بلوج الكلية
بقصد تحطيم المعنويات وخلاص
والحكاية دي اكتشفتها بنفسي
في تحت كل موضوع زي اللي انا كاتبهم تحت دول
حلو وشغال وفكسان
كانوع من ابداء الرأي
وده شئ مايضايقش
ده زوق وممكن الحاجة ماتعجبش كل الناس
بس انك تشوف واحد كل ماحد يعملك حلو
يجي هو ويحط فكسان
كذا مرة ورا بعض
تتدايق
طب هو بيحبطني ليه؟؟؟؟
مش عايزني اكتب تاني؟؟؟؟؟
طب ماهو كان بيكتب بردو بس كان بيكتب عشان يتقال انه بيكتب زيي في البلوج
ولما يأس بطل يكتب خااااااااااااااااااااالص
طب كتب ليه مالاول؟؟؟
ففففففف حاجة تغيظ
اخر حاجة بقا رحت كاشفه في البلوج بتاع الكلية بس منغير ماعلن عن شخصيته حفاظا على صورته بردو
وكتبت اصبر على جارك السو يا يرحل ياتجيله داهية
واذا دعتك قدرتك على ظلم الناس فتذكر قدرة الله عليك
ولو هو اصلا يعرف يكتب ربع اللي انا بعمله يوريني نفسه
...
يوميها بالليل ... لقيته حينزل اغنيه على الرغم انه معملش حاجة من مده طويله اوووووووووووووي
آدي حركة مكشوفة
انا قلت اهو فرج من عند ربنا اديه حينشغل بنفسه ويحل عني
ورحت كاتبله كده اخيرا حتنشغل بحاجة عني
راح باعتلي رسالة وقاللي ايه اللي بتقوله ده قال يعني مش عارف
فا قلتله عالحكاية
راح قايللي واشعرفك انه انا
رحت قايله ومين بيحبني غيرك
راح قايللي على فكرة انتا كده حتخسر كتير ...
وعنده حق انا فعلا خسرت كتير ...خسرت صاحبي عشان يحل محله واحد عايز يخنقني
لاني كل ماروح في حتة الاقيه قدامي
وكأنه قدر محتوم لايمكن الهروب منه
فا علق على الجملة دي قاللي
" حقلدك على ايه يعني انتا اصلا مافيكش حاجة عدله...انا بكرة حوريك مواهبي وانا اتعلم من صحاب العلم احسن من اتعلم منك .. لانك انتا انسان معقد ومريض نفسيا ومكتئب ..وبتدور على ناس عشان تحس انهم مش سيبينك في حالك"
يوميها موصفتهوش غير بحاجة
لانه كان على الرغم من كده دمه خفيف

"افعى تمتلك حس الدعابة "
احب اشكره على كل الشتيمة اللي شتمهالي
واحب اقوله يا خسارة صاحب كان اكتر من اخ
على الرغم انه مش حيسمعني ولا حيقرا الكلام ده
بس اهو بفش غلي وخلاص

واهلا بعصر الراحة والسلام

Monday, February 15, 2010

افعى تمتلك حس الدعابة


حبري خلص من سن جاف
دمي نشف وبديت اخاف
خوفي واصل للسحاب
داير يخبط على كل باب

قومو افتحو قومو افتحو
اترعبو واوعو تفرحو
اصل الفرح فدان طرح
وانتو الفرح مافرقش عنكو مالعذاب

قلمي نضب منه الرصاص
فدادين زهقت مالامتصاص
فاضت بكل بطنها
بقت صحرا وكله انتهى
والدور بقا عاللي بقا
ونزع من قلبي الاختصاص

بقا تفتكر ان الشيطان حاول مرة يهتدي؟؟؟
نازل كلام رافض سلام في ودن ركعي السجدي
عمره ما وسوس لبت سمرة
غاوية الزنا وفي ايدها خمرة
اصل الشيطان ده ياما طاف
قبلما يبدأ انحراف
رافع براسه جوالين زلط
وفي قلبه بدّل صح بغلط
وحقده غلغل من ابونا
وماهمه من ربي السخط

افعى دارت في منتجع
فا كل سايح لبلده رجع
خايف من شر الاذية
من افعى كبرى وشرانية
مش مالغبات والحتة دية
افعى الاناس ... لدغتها
اضعاف الافاعي العادية

كله حس مالافاعي
جو الرعب والكآبة
بس ممكن الافاعي
تملك حس الدعابة
وبيها تصطاد الفريسة
غالية كانت او رخيصة
ياه على بنيآدمين ...تموت حسرة الغرابة

حبري خلص من سن جاف




Ms3a_miso


Tuesday, February 9, 2010




يمكن يا حلوة بغمض عنيا علي حسن اهلك وانا جوة ارضك
لكن وانا برة اراضيكي مبانمش الليل واشتاق لحضنك
بعيا بيكي و بشتاق لريحتك .. حتى اغانيكي تشوقني اروحلك
في كل لحظة ليكي عظمة وبتمنى اكون ثانية في مراحلك

نفسي اشوفك اجمل عروسة في احلى كوشة مشرفة
ونفسي اغنيلك في فرحك ويوميها تكوني متشرفة
و في حب... ناسك عارفة قيمتك
يحموكي ديما حافظين كرامتك

مسيري ارجعلك يا بلدي
صابر وامتى اليوم يعدي
رسمك في قلبي الوان تلاتة
ابيض واسود وورد بلدي


Friday, February 5, 2010

معاناة مخدة



راجع ياه كان يومي طويل .... والنوم كابس وبيطنطط
جسمي اتهد .. يا كترة وجعه ... رجلي بترعش ضهري مأرط
سريري وحشني وانا لو شفته حاخده في حضني واقعد اعيط
ياه يا سريري كتر خيري اني وصلت لغاية عندك
مهانش عليا انام في الصالة واسيبك في الاوضة لوحدك
يابني دي عشرة دامت 10 يجي من اول متر اتخيط

عيني راحت عالم تاني ...لكن نفسي... حاسة بنفسي
انا مسجون قضبان حبساني ملط وهجت مني ملابسي
المحكمة مملية اخرها ..حتى هدومي كتر خيرها
جت على شان تترافع عني قبل الحمرة ما تبقا كبيرها
حاجب نادا وقال محكمة ...صوته واصل سابع سما
جلجل قلبي...... هز مفاصلي
و المستشارين دخلولي القاعة..ودخل القاضي و كله باصصلي

داخلة مخدة لابسة الاسود ..كهلة وباين السن عليها
راحت داعية حسبك ربي بكل طاقتها ورافعة اديها
وانا مستغرب من دعواتها وراحت فايضة من حكايتها
قالت ظالم مايع خاين عشر سنين مستحملة أرفه
يحلم حلم اقول اه وماله شايلة الحلم في قلبي وساكتة
حتى كابوسه مشيلهولي بقا دي اسمها الخنقة البحتة

فكر دماغة مخرب اصلي زيه زي الشعب المصري
يقتل يحرق يدعق يسرق غرضه اساسي تلوث بصري
اشي تفكير في فلان وفلان
وشي غيرة في قلبه وحرقان
عايز يوصل ..مهمن يحصل
لو وزنو قلبه بأفيال سواد قلبه يهد الاوزان
رافص الحسنى.. حالف لايدوسنا
يمص فلوسنا
على شان يوصل اعلى مكان
بقا دوة يبقا انسان؟؟؟
لا ده كتيرة عليه حيوان
يمكن بشتم ..احسن ماكتم
بفضح سره بالمجان
مانا مطلعة على تفكيره...عقله الباطن كتر خيره
بيحكيلي اول ماينام
اصل الغلط كان فوق طاقته واخينا بكل غلطة حركته
يبقا حلال فيه الاعدام...يبقا حلال فيه الاعدام

Ms3a_miso

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com