Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Thursday, December 23, 2010

ضي القناديل



انا .. نبات بدون تربة .. جذور تستنشق النسيم .. تفلتر ماءا عذب في وسط ملوحة الاقاويل ..

انا .. ذئب حسن الخلاق ..عقد الصداقة مع الاغنام .. و ظن انه من قطيعها ..يحرسها في طريقها حتى وان خر قتيل..

انا .. مذنب يعبر الفضاء .. بدون انبوبة اوكسجين ..استحسنته جاذبية الارض.. فضمته الى احضانها.. وحرقته بغلافها ..فأصبح كالماء يسيل

انا .. عبد ذليل..

انا .. خزان مثقوب .. تسقط منه الحبوب ..كلما حمل على الاكتاف .. حتى يصل الى الميزان ..فيصبح صفر التكييل..

انا .. مسجون يعشق التكبيل ..كاره للحرية .. متنزه عن القمة .. في قائمة الحياة ارضى بالتذييل..

انا .. فاسق ربيب البارات .. تسكرني كؤوس الكلمات ..وبكحولها ..تنفجر مخيلتي ..وتشعل في رأسي الفتيل..

انا .. تابع للخليل ..محطم التماثيل ..ثائر على حالي باطل ..هادما لحق يميل..

انا الصبر الجميل

انا .. ذكر متلهف للأنثى .. فأذا وجدها يعجز عن التقبيل ..

انا .. وقت الاصيل .. احمرار الكون يغضبني في وقت الغروب .. فأقتله بسيف ليل ثقيل..

انا ..حبل للغسيل ..يختار ما ينشر عليه ..بسعة صدري حبل طويل ..

انا .. خائن وعميل .. فقد خنت نفسي لارضي اناس ليس لهم قيمة ..وغشي بصري عن من ليس له بديل..

انا.. عدم ..نفسه يبقى احمد زويل

انا ..اعمي ..منور طريقه ضي القناديل

Tuesday, December 21, 2010

شِبْشِب حَمّام.. العنف هو الحل

العنف هو الحل ... مدام الفنان بيتركن عالرف قدام بنطلون استرتش
:D

Thursday, December 9, 2010

اللي نعرفه ..عم حسني .. احسن ماللي مانعرفوش .. عم برادعي

انا نفسي اقتل اللي قال مثل " اللي نعرفه احسن ماللي مانعرفوش" لان دي مش الحقيقة اطلاقا
لو رحت لواحد قريبك من لحمك ودمك واشتريت منه سجادة
لازم حيبعهالك معيوبة عشان عارف انه مش حيتكلم .. على اساس ان التاني فاكر انه حيديله احسن حاجة
واحد صاحب ابويا راح سنة السعودية .. قريبه اللي كان قاعد عنده مش بيشغله التكييف ..
فا طبعا قاعد حيسيح من الحر اكمن قريبه بخيل عليه اوي ومش بيشغل التكييف الا لنفسه بس
وساعتها قاله ابويا (اللي مايعرفوش ) تبقا بل هدومك وحطها عليك السعوديين كانو بيعملو كده ايام مكانش في تكييف
...
للاسف مصر تلت ترباعها ماشية في السياسة بنظام اللي تعرفه احسن ماللي ماتعرفوش
وعشان كده البرادعي ده بخ من حياتنا .. على الرغم اني شايف انه ممكن يخيلنا بمشيئة الله حاجة قوية او علميا وادبيا
بس الجهل ماشاء الله مصاحبنا اوي ..وخصوصا الفلاحيين ..تحت منطلق اللي نعرفه احسن ماللي مانعرفوش
على الرغم انهم شايفين بعنيهم ..ان قلبي على ولدي انفطر وقلب ولدي عليا مازر فكر
:D
على رأي احمد مكي
...
بس احنا فعلا من عملكم سلط عليكم .. بس ده سلط بالقوي اوي
لان الناس عندنا جواها جبروت فظيع جوة مصر ...لما يطلع برة مصر بيحترم نفسه على الاخر ويبقا مداس للي مايسواش
مرة واحد مصري كان مدرس .. سب الدين لطالب في السعودية .. فاكر نفسه في مصر
البلد كلها هاجت على المدرس واباحو دمه
ومنجاش الا بأعجوبة بعد تدخل القنصلية المصرية
...
عندنا نظام انا حمشي غلط .. حتعترض عليا .. حزود وحعند .. واعلى ما في خيلك اركبه ..على الرغم ان اعلى ما في خيلك اركبه دي لو حللناها حنلاقيها عيب اوي اوي اوي
فيه نفس احساس سليمان الحلبي لما قعدوه على الخازوق
...
فا المفروض البرادعي يحكم مين ؟؟؟؟ شوية همج؟؟؟
الناس غايب عنها حاجة..حصلت لعاد وثمود وقوم لوط
ربنا بيقولك امشي عدل بدال ما جيبلك مصيبة تيجي وتشيلك .. لكن الجبروت اللي عندنا بقا تحدي لربنا
ومش راضيين نصلح نفسنا ومن سيئ الى اسوأ
في انتظار المصيبة

Thursday, December 2, 2010

خرافات ورا ياسطى

احلامي ورود بتتفتح في عش الدبابير
حياتهم كلها نمطية مافيهاش تغيير
في الدنيا نعيش ونموت فيها منغير تفكير
..
حياتي بدأت محشورة في صدر ال 90
فتحت عيوني عالدنيا وبسأل انا مين ؟؟
وانا ليه موجود في الدنيا دي ..هو انا موهوم؟؟
بأني ممكن اكون حاجة بين الناجحين
..
ياما عيني اتديقت بمناظر من ناس ساقطين
مش قصدي سقوط مستوى علمي لكن في سقوط مستوى تفكير
فاكرين الدنيا اتعملت ليهم وبتتمرمغ في تراب رجليهم
افكار ميتة عاشت بيهم وتحت التأثير جرة الحناطير
..
احنا الاقزام .. او بقا فاكرين اننا اقزام
عملنا جنازة على التعليم واحنا بأيدنا كسرنا الاقلام
واتربينا زمان وحكينا ان في عصرنا في حتة غول
اسمه امريكا له عرض وطول
خفنا من هيصة وزمبليطة .. شفنا خيال كبير عالحيطة
لكن حيقيقته طفل صغير .. بيشتغلنا وعامل افلام
شايف قدامه عقول بقرة
شايفنا بخ وعيال فقرة
في سوق الاقوام اسمنا نكرة
يرميلنا اشاعة في اول سكة
في اخر السكة تبقا يقين
ويدافع عنها ادمغة فاكرة
انها حاجة تخص الدين
وان كلمتهم يسنو السكاكين
وتبقا في وسطهم انتا المسكين
فاجر داعر وابوك زنديق
اهوج احمق ضل الطريق
مع انها في الاصل اشاعة
جابو البنزين جنب الكبريت
وجم اهلي وداسو عالولاعة
...
يا ناس يا عقلة ..الماسونية وهم كبير
اتمحك في كلام دينك علشان تشبع مالتخدير
ويكرهك في اصول بلدك .. في سكة تكفير الناس دلقك
بص لنفسك .. انتا عواطلي ولا ليك اهداف ولا شغلانة
حابس نفسك في كلام تخاريف اطرش زفة وعينك غفلانة
فاكر نفسك جندي لدينك .. فاكر ان البطولة اذاعة
انتا فشلت في كل سنينك .. ونظرية المؤامرة هي الشماعة
اللي تعلق عليها غبائك ..لانك ماشي ورا تخاريف
وبسببك انتا في بلدنا .. خرجنا برة التصنيف
بأننا نكون بلد الخرافات .. بعد ماكنا بلد التثقيف
...........
Ms3a_miso

Wednesday, December 1, 2010

طبق اليوم

احم احم .. انا واحد من الناس والدتي بتشتغل .. للاسف
لان شغلها ده زي اغلب الاسر المصرية مأثر على بطن الاسرة المصرية
اللي بتحب الاكل اكتر من السودوكو
الست بتشتغل .. ومعنديش اي وجهة نظر مضادة لده .. بس ده فيزيائيا اثر على المطبخ
بطبيعة الوقت والمجهود وكده
صحيح بقا كتير من الناس بيعتمدو على الاكل الجاهز
لكن في ناس لسة المطبخ اهو بيشم نفسه فيه
الاكل هو هو .. مش بيتغير اذ ربما يتبعتر ترتيبه على حسب المزاج لكن مايكونش فيه حاجة جديدة الا كل من 5الى 6 شهور
فا في مطبخنا المتواضع
لحمة محمرة ومكرونة ..او بطاطس محمرة
شوربة ورز .. ولو اتغير شكلها بيكون فتة
سمك ... اللي انا مبحبوش وغالبا بيكون يوميها مابكلهوش او باكله وانا متاذي
وغير في ترتيبك بالترتيب كده على مدار الاسبوع
اذ ربما تيجي فلتة في النص كده ..
ده غير ان الاكل دلوقتي بقا غير اكل زمان
وفي اطباق ياما ماتت وراحت مع اللي راحو
يعني انا اخر مرة كلت فيها بسارة كانت من 15 سنة تقريبا
الشكشوكة انقرضت من السفرة المصرية تماما
الكشك بقا حاجة مبهمة ..مين الكشك ده
العدس بجبة اندثر ..
حتى العدس الاصفر بقا شئ نادر ..ياسلام عليه وهو شوربة في الشتا
الفريك .. الناس دلوقتي بتعتبره اكل عصافير :D
...
لا ده في حاجة بقا .. كانو زمان بياكلو دمعة ..
وكانت الدمعة دي بيطلقوها على الصلصة اللي بتطبخ باللحمة او منغير
وبيحطو معاها توم .. للاسف
الاكلة دي اخر مرة كلها كانت عند ستي من 12 سنة
..
انا ملاحظ فعلا ان الاكل اتغير عن زمان
والنفس في الطبيخ بقا آلي او فيه شيئ من الميكانيكية
زمان كانو بيعتبروه موهبة وفن
وتلاقي ست البيت تعبانة في الطبق وكان بيتقال الطبيخ نفس
انما دلوقتي زي مابيقول محمد هنيدي .. ده نفس الديليفري :D
..

Wednesday, November 17, 2010

بلبل حيران



ممكن اكون انا في حد ذاتي متعصب لحلمي .. بس انا قررت لاول مرة افتح بوست مخصوص لاستعرض فيه فكرتي عن فيلم دخلته ..

الفيلم رائع .. للي بيفهم .. ممتع .. للي واعي .. ارض زراعية لعين الفنان ..حكمة .. لمتصيد العبرة

احب الاول اشيد بالتصوير التحفة .. والاخراج الممتاز المنسق ومهندس الديكور المجرم ابن التييييييييت اللي شد عيني طول الفيلم وخلاني مش قادر في مشهد واحد اقول ان اللقطة مش مصروف عليها

الاضاءة اللذيذة والالوان الصارخة في قلب الانسان ..

ممكن يكون ناس دخلو الفيلم ومعجبهمش .. حقول له انه انسان سطحي ..لان الفيلم بينلي طبيعة الانسان اللي مش عارف هو عايز ايه .. وحيران طول الوقت .. لدرجة ان ربنا لو حققله اللي هو عايزه عشان يرضيه .. بردو مش حيرضيه ..

والظالم بالنسبة للمظلوم .. مظلوم

بس الظالم بالنسبة للظالم مظلوم .. وفي الحلادي حيكون المظلومين هما اللي ظلمة

ومافيش حد على حق .. لان الصح والغلط نسبي ..


وعايز احيي مهندس الديكور واللي مختار الالوان تااااااني عشان مش قادر انساهم ..

الى الامام يا حلمي

Thursday, November 11, 2010

خيبتي المهاجرة



يا خيبتي نخي وطبطبي على حظي وقولي انك مهاجرة

ياما قعدتي على قلب فرحي وعششتي عشك وبقيتي قادرة

وموتي فيا روح النجاح وبتكتمي صوت الفلاح

وان يوم وصادف ولمحت ضي جي من بعيد

بيكون سراب و ولو حتى صادف بيكون مصادفة او حالة نادرة

..

ياخبتي حالف لاطلع عينك وفي اقرب حيطة ادفشك

لو انتي جارتي وباقية عالعشرة حزهأك واطفشك

ولو كتي محتلة حظي ؟؟ بالمحكمة راخد حقي واكرشك

لو انتي اصلا طيبة

وعن سوء حياتي منتيش مسئولة

يا اما اكون انا اللي نحس

ياما حياتي هي اللي حولة

لما تعوز تخش الجنة

نظرها يغشى و تخش النار وتعيش موحولة

لو كانت دي هي النظرية؟؟

من بكرة حصاحب دراكولا

عشان انا ياما زمان صاحبت ناس لابسين ملايكة

اتاريهم طلعو شياطين بيصحو فيك صفات مقتولة

يعني اكون كافي خيري شري

ولما اعرفهم اخد في الشر الجايزة الاولى

ولما اجي ابعد عنهم الاقي فنلة خيري مبلولة

..

نرجع تاني

..

ياخبتي انتي بقا ايه حكايتك ؟؟؟

خدتي عليا ومصحباني

ابعدي عني احسن حاكلك

وحوريكي الوش التاني

بقولك ايه .. ياتغوري من وشي ..

ياحسيبك و حغير عنواني ..

والله ده شئ لا يحتمل

ده تهريج

اروح اجيبلك عقد عمل

في الخليج ؟؟

اهو ... مش حارمك من حاجة

حتلاقي هناك الف كفيل

ولو خلصتي على نجحاتهم وحسيتي انك محتاجة

اطلعي اجري عالتوكيل

انما انا بالنسبالك منجم نضب منه النجاح

شجرة موز بالعافية بتطلع تفاح

سيبيني يجي 10 سنين حتيجي تلاقيني اخر فل

وبحن لايام الذل

وانا عن نفسي من دلوقتي حفضل مستني اي اشارة

قوليلي حسافر حطلع اجري واجبلك تذكرة الطيارة

من برايا زعلان اوي وبقول يا خسارة

لكن انا من جوايا بدعي في الهوا تنفجر الطيارة

وابدأ اعمل عهد سلام مع حياة مسالمة وحلوة

الاقي فيها الشجرة بتطرح

و الاقي اهلي بيا بتفرح

وبليتي بتلعب وبتشطح

و لحظي تغمز السنارة

....

محمد عبد المنعم عطية

Ms3a_miso

Thursday, November 4, 2010

احنا مصر .. مش مصرائيل ..

الناس اللي مبتحبش مصر .. بتبقا بتدور على اي سبب عشان يبررو بيه الحقد
حتى لو كان سبب مش مقنع
سؤال ؟؟؟؟
ليه لازم العسكري المصري هو اللي يعمل كل حاجة ؟؟؟
هو اللي يروح يحارب في اليمن والجزائر والكويت والعراق و سوريا واللي زاد وغطى فلسطين
وباقي الناس قاعدة تتفرج .. ولو اطول اني اشتمهم حشتمهم وحقول انهم " مش رجالة " حطو كلمة واحدة مكان الاقواس
ادخل اي فيديو على اليوتيوب واكتب فيه مصر
ولازم تلاقي حد من دول المغرب العربي .. كاتب عننا "مصرائيل " زي عوايدهم
على الرغم ان انا كممثل لمصر بلدي حاربت اسرائيل ..بينما المغرب العربي فيه يهود لحد انهاردا
ومعترفين بيها .. ومنهم محطوط نجمة داوود على علمهم .. وسايبينه
انا بحب دولة المغرب .. بس انا اللي استفزني
ان اكتر من واحد شفته على اليوتيوب ..
ممكن تقولو ان مش كله كدا .. بس اللي كده ده بيقول علينا كده ليه ؟؟؟؟؟؟؟
سوء تربية ولا سوء اخلاق ..وانا شخصيا لما بشوف حد كده بيغلي الدم في دماغي وممكن اعايره بفرنسا كلها
وافضل اشتم في اللي جايبينه
ولا احنا من كتر مابننتقد نفسينا .. اللي برة مصر افتكرو اننا طيشة ؟؟؟
وبيقولولنا الحاكم بتاعكو بيديكو على قفاكو
طب احنا بناخد على قفانا وبنثور وبنعترض و بنشتمه كمان ..لان الساكت عن الحق شيطان اخرس
انما هما في دولهم بيخدو على قفاهم وراضيين لحد ما قفاهم ورم من كتر الضرب
الفرق ايه ؟؟؟ اننا بنتكلم ؟؟؟
انما انتا بتتكلم عن دولتي ليه ؟؟؟ بتشتم رئيسي ليه ؟؟؟
هو يعني اللي حكمينك انبياء ؟؟؟
مهما العن كمان ..
...........................
واحد تاني بيرفعلي ضغطي .. اماراتي وعار على الاماراتيين
شفته على اليوتيوب بيهين كرامة المصري لانه بيشتغل في الخليج و بيعايره بالفلوس اللي بيديهاله
اقوله يا بجاحتك يا اخي .. هو مش بياخد حقه في تعمير بلد غير بلده
ده بدال ماتشكره تقوم تعايره
مش كفاية متغرب وبيسف التراب كمان تعايره
على اساس انك مين ؟؟؟؟؟ ولا هو تفاخر العرب بالانساب والاصول لسة مسلخش جلده منكم
مافيش انسان كامل ..
حضرتك بتعايرني .. متبص لمنظرك في المراية
شوف حالك والنفاق اللي ماليك
شوف حال رئيسك وحال دولتك
شوف في بلدك كام واحد مصري موقف بلدكم على رجلها
ومنغيره البلد تخرب
لان اصحاب البلد اقصى حاجة بيعملوها انهم يتاوبون
....
ناس معندهاش دم

Thursday, October 28, 2010

Thinking is a bad habit

سوط الرأي يعاقب جسدي
محبوس في قفص الاختلاف
وطيور مثلي تنعم بالحرية
كتب عليا التقيد .. تحت مسمى ممنوع المعصية
كلما تلفت اجد الكون غاضب علي
يقولون فلان قال وفلان قال
معلقا " وانا مال امي " ما اللي يقول يقول
لماذا اتسلسل في اراء غيري وان كان عددهم 500
كلهم طظ فش
لا تقدم لا تطور لا رقي لا حضارة
القبر ثم القبر
تدخل الدنيا وتخرج منها .. بمحصلة 0
ولكني اتفاعل وان كان بوجهة نظرهم بالسلب
فا مليون سالب اهون الى عقلي بموجب بدون يقين
..
صداع يلتهم رأسي.. مالاخر اترفعلي الضغط
الشعور بأن الجنون يطرق بابي
اتحدث الى نفسي بصوت عالي
رأسي تفيض بالردود وتصب النار على عقلي
بتحمر عيناي وازداد بالصداع الما
..
في عصري التفكير معصية
والمنطق من سبل الانحراف
والصداقة لا تجوز الا للاذقان
والنار تقترب والجنة تبتعد
وفتيات يتحشمن بالقماش
بدلا من ان يتحشمن بالاخلاق
واللون الاسود في زيهن كاختم النسر
حتى مافيش موضة
مهتديهم يفعل ولا يسأل
واذا اعترض على شئ
يكون اهوج معتوه مخنث
خارج الى الضلال
ويتوجب عليك ان تدعي له في الكومينت 15 مرة
عجبي يا ديني عجبي
عجبي على امة مات مربيها
فأذا ارتخى فاسقها
تصنم هاديها

Wednesday, October 20, 2010

هو مين العلماني ده ؟؟؟؟

هو من امتى كان للدين والسياسة ارتباط ببعض ؟؟؟

معنى كلمة سياسة اصلا .. هي علاقتك مع الدول الخارجية وطريقتك في التحكم في الداخل ...

يعني السياسة بتستهدف التجارة مع الدول التانية ..واذا طبقنا الشريعة الاسلامية .. حنلاقي ان التجارة مع اليهود حلال ..

بأعتبار ان النبي في حالة السلم .. او حتى في الهدنة في الحروب وهو متعارك معاهم كان بيتاجر معاهم

وبما ان مصر في حالة سلام معاهم فا عادي التجارة مع اليهود

ده رقم واحد ... رقم اتنين ان السياسة بتختص ببحث امور عالمية في البلد يعني زي وجود قوانين دولية جديدة عشان تحكم الدول كلها بتاعت العالم ..ودي بتطلب وجود ساسة في لمجتمع عشان منكونش منشقين عن العالم او متأخرين عنهم

في افكار ظهرت سياسية .. اتلزقت بالغصب في الدين ... مش عارف ايه العلاقة

يعني الفكر الليبرالي .. يقوم بفصل الدين عن الدولة كا سياسة .. وده اللي ماشية بيه مصر دلوقتي حتى السعودية

وكل البلاد العربية .. ماعدا السودان وموريتانيا .. وحد تاني مش فاكر مين

اساسا اساسا .. مين قال ان الدين والسياسة مرتبطين ببعض ؟؟؟ وخصوصا ان الناس عندنا فاكرة انك كل ماتعبد ربنا اكتر كل مافرصتك في الفوز تكتر

في حاجة اسمها الدين المعاملة .. يعني ربنا طلب منك انك تعبده .. بس 80% من القرآن بيحث على " الاخلاق " اللي هي غالبا كلمة على وشك الانقراض

والاخلاق دي لا مرتبطة لا بقران ولا بأنجيل ولا توراة .. دي مفاهيم عامة المفروض تبقا موجودة حتى عند اللي معندهمش دين

باعتبار كونهم بنيآدمين المفروض يخافو على بعض ومايعملوش حاجة غلط وحتى الجرايم

يعني مش المفروض اننا نقول على الليبرالي انه بيحارب الدين عشان يبعده عن السياسة .. لانه اصلا لما طلع الشعار ده مجابش التايهة

لان دي المفروض تكون حاجة مفهومة وتطبقة .. لان السياسة على لوحدة والدين كا عبادة حاجة لوحدها .. والاخلاق بتحكم الاتنين ..هي السبب في وجود الاتنين

لان القرآن لما نزل مش عشان بس يخلي الكفار يآمنو ... لا ده عشان يغرس الاخلاق في شخصيتهم اللي مقضياها سبهللة

الناس دلوقتي من المتزمتين .. وانا مصر على اللفظ ده .. بيعادو العلمانية والليبرالية منغير مايفهمو يعني ايه علماني ولا يعني ايه ليبرالي .. هو لقاه بيقولك الدين مالوش دعوة بالسياسة .. قالك ازاااااااااااي ده كفر

هو من امتى كان له علاقة ؟؟؟ يعني النبي كان بيعمل ايه ديني في السياسة ؟؟ هي التجارة من الشريعة ؟؟؟

حتى الاية الوحيدة اللي بتقول " واعدو لهم ماستطعتم من قوة ومن رباط الخيل ترهبون به عدو الله وعدوكم " كان قصدها الاحتراس

ايه السياسي في كده ؟؟؟؟

يعني انك طول مانتا ماسك للديب البندقية مش حيهجم عليك ولو ضربت طلقة في الهوا حيطلع يجري .. حتى ماقالكش اضرب عليه

لان بالطبع انتا مش المفروض تبدأ بالضرب .. لان الله لا يحب المعتدين

نيجي للموضوع بقا .. يعني ايه علماني .. المفروض انه نظام سياسي شبه الليبرالي بيأمر للفصل التام للدين عن الدولة

وطلع نفس الناس قالك ده كفر .. ودول ناس وحشة .. مايعرفوش ربنا ..انتا مين يا عم اسماعين ؟؟؟

اصلا هو نظام قايم على ربط العلم بالسياسة .. كا حاجة جديدة

زي التلاتة اللي كانو حيتشنقو .. واحد راهب مسيحي وواحد رجل قانون وواحد عالم

الراهب المسيحي قالهم الرب حيحميني .. فا الشفرة اللي كان المفروض تنزل على رقبته وقفت في النص

فا الناس خافت منه وقررو انهم مش حيعدموه ..

والرجل القانوني قال .. سيادة القانون حتحميني

فاجم ينزلو الشفرة .. مانزلتش ووقفت في نفس الحتة

لما جم يشنقو العالم .. قالهم يا جماعة في عقدة فوق في آلة الشنق فا شافوها .. فراحو فكينها .. وعدموه

الراجل ده كان يقدر يخبي .. بس امانته العلمية واخلاقه فرضت عليه ان يقول الحقيقة

مش معنى ابدا انك علماني انك ماتأمنش بربنا .. العلماني مش كافر ابدا ..من امتى اللي بيحس العلم بيكون كافر ؟؟

واللي صادف واحد بيقول انه علماني ومش مؤمن بربنا او بيشتم كتير ده من نفسه .. ده مش من نظام العلمانية ابدا

الاتراك علمانيين .. بس مقالوش احنا مش مسلمين

او مقالوش ان مافيش اله .. ده بيكون مجرد انعدام اخلاق .. او تكبر .. مالهوش اي دعوة بنظام سياسي او نيلة

شوفو زمان كان الناس بيقولو ايه على الديموقراطي اول ما ظهر ..وشوفو ازاي احنا بيتضحك علينا

http://www.youtube.com/watch?v=CFbRUAwgndo

Thursday, October 7, 2010

يوم تلاتين فبراير


تلاتين فبراير
يوم تاريخي .. لسة مجاش .. لاسم مصر
ولا فيه تحرير ولا استقلال ولا حتى نصر
ولا حتى صادفت وفوزنا فيه بكاس الامم
ولا صدرعفو للمسجونين من كل التهم
ولا وزرا دارو يوزعو عالشعب قصر
..
ده يوم عظيم
في كل الناس بتمشي في خط مستقيم
يوميها تنور الابتسامة على وش ناس مطحونين
مع انهم مطحونين لكنهم من جواهم مبسوطين
وبتبقا الشوارع هس
لا دوشة ولا خناق ولا كلكس
لامن اتوبيس ولا من مشروع ولا حتى تاكس
وكل الناس اعصابها بتكون ريلاكس
وبقت تليق علينا كلمة متحضرين
..
بقا للمصري قيمة وكرامته تخضني
تشوفه الدول التانية مالرهبة تنحني
عمره مايكون في الغربة مناخيره مكسورة
ولا تبقا شجرة حقوقه في الصحرا مبتورة
انا مصري بعقلي وكرامتي وياويل اللي يمسني
..
وبداية من اللحظة دي الشعب بطل كسل
بقا المصري في نشاطه بينبرنبو المثل
بقا نص الشعب فنان وبيلعب بالكلام
والنص التاني فارس وراكب عالعلام
وحصانه فالت لجامه وطاير للامام
..
يوميها في اختراعتنا قضينا على الكهربا
وخلاص مبقتش حاجة في حياتنا متربة
عمالة متدربة
بتحس انك منظم افكارك متقدرة
وهما بالنسبالك شعوب ومتأخرة
انتا بنص جهدك تطلع شئ محصلش
وهما مهما عملو .. مجهودهم كله ألش
عيش وصدق نجاحك نصيحة متجربة
..
بقا من صفات شعبي مافيش ظابط مرور
واتلغى من قواميسنا معنى كلمة طابور
وطيبة شعبي بتخلق في كل ضلمة نور
ولون الاسفلت وردي بتزينه الزهور
بتغير منا الطيور
عشان معنى الحرية مباقاش رمزه الطيور
بقا معنى الحرية المصري الصبور
...
آدي حكاية يوم اتأخر لسة مجاش
لابس شكل الاسطورة في ميكي او فلاش
تخاريف نوم خيال علمي حاجة زي الفوازير
شئ ميئوس منه ونوع من التحوير
يوم تاريخي لمصر ترتاح فيه الضماير
يوم لسة مجاش اسمه تلاتين فبراير
..
محمد عبد المنعم عطية

Tuesday, September 28, 2010

الحاسة السابعة



بالسم .. بالقتال .. لا بالسم .. لا بالقتال

:D

قد ايه انا بتمنى الدنيا تطور بسرعة .. او على الاقل انا .. واقدر اخترع حاجة تخليني مش اقرا افكار اللي قدامي .. ولكن احس اللي قدامي ده رأيه ايه فيا ؟؟؟

سؤال بيحيرني اوي

وبيخليني مش عارف حعمل ايه لو عرفت ان حد انا بحبه جدا مبينلي اني قدامه اشطة اوي وزي الفل .. وهو من ورايا بيقول كلام تاني

حعمل ايه يا ترى ؟؟؟

جايز احساس الانسان الغبي اللي فيا ده يطلع .. واروح مزعق بأعلى صوتي واروح قايل .. يووو يتفلقو .. يعني هما اللي عدلين اوي

وافضل اقول في داهية واسب والعن فيهم

وممكن اقول لا .. انا لازم اغير رأيهم فيا .. وده في الوقت الحالي مش هاممني اوي .. لاني بايع القضية ومخليها على الله

على الاقل دلوقتي

ربنا يصرفها بمعرفته

والحمد لله .. اني معنديش حد اعرفه " بيفكر بالصيني " الا الناس الصينيين اللي بيشيلو شنط ويطلعو للبيوت دول .. ودول انا اللي نفسي يعرفو رأيي انا فيهم ... يلا يلعن تيييييييت ده انتا لو مصري وطلعتلي البيت عشان تبيعلي كنت قتلتك

قطعتو عيش الغلابة الله يخربيوتكو .. ماعلينا

منكرش ان الواحد ممكن يعمل حاجات كتير اوي .. غير طبعا اراء الناس التانية

وممكن يتشتت اكتر ..

وممكن الحكاية دي تأثر في علاقته بصحابي

وتخليني اخسر ناس منهم .. وحتخليني احاول اني اتودد لناس تانية .. كانو اقصى حاجة بيعملوها انهم يبصولي من بعيد

او بيكون كلامي معاهم محدود .. وده لاني بحب القلوب الصافية .. الطيبة اللي مابتحسبهاش وبتفضل دايما مبسوطة .. ومنظمة .. وهمجية في التفكير بعض الاحيان .. احساس اسطوري اتلغى متهيألي اسمه ولاد البلد او معنى ذهب مع الريح اسمه ال"جدعنة" في ناس من صحابي عندهم الميزة دي وفي ناس من صحابي عندهم بس نص نص .. وناس معندهاش خالص

من الاخر بحب الصاحب اللي لو انا شرقت يقلق عليا ويتخض ووشه يجيب الوان .. ويبقا عايز يساعدني بأي طريقة

مش زي ما واحد عمل معايا .. شافني شرقان جدا وبكحكح و لو زودت كحة كمان كان ممكن السر الالهي يطلع معاها

وسابني زي الكلب ولا كأني حصلي حاجة

سبحان الله ..

الواحد لو كان فعلا مولود بيقرا القلوب .. كان زمانه احسن واحد في الدنيا ..

بس ارجع واقول كان ممكن يطمع اكتر من اللزوم ..وممكن واحد تاني يكتفي بأن يعرف طعم القلوب

نفسي اعرف طعم القلوب

بتمنى شيبسي تنزله في الاستفتاء اللي جي بتاعها

Tuesday, September 21, 2010

لون احمر

صوت اول شعلة تنطلق وسط الظلام

لتلمس شمعة ..لتنورغرفة يلونها اللون الاحمر

وتلك الاضاءة الخافتة التي تفتح الباب امام احساسك

ليتطاول على نظرتك المظلمة للحياة

وتحبسها من بين طموحاتك بأن تكون اسعد ليلة تقضيها في حياتك

وبينما تقترب الشعلة من الشمعة الثانية

تدرك ملامحها تتحسس خجل وجهها الذي يشوبه الجرأة المفرطة

وتنظر الى لمعة عينيها .. التي يرسمها قلم اسود داكن الظلال

وعندما تصل الشعلة الى الشمعة الاخيرة

يشع النور من وجهها .. لتفهم مقاصدها .. وتصل الى ذروة الاحساس

احساس يطوف بقوته حول اطراف اصابعك

ليتبعثر داخل كل شعرة يتصل بها جسدك

وتجد نفسك هائما تائها بين افكار قليلة واحاسيس عملاقة

وتكون حاجتك الى الشهوة مثل حاجة ظمآن غلبته الصحراء بسرابها

وتبتلع ريقك بصوبة

لتعلو حينها صوت الموسيقا .. وتمد يدك لتطلبها للرقص

تلمس يدها فتملكها وتصبحان حينها روح بين جسدين

تترنح مع ايقاع الحياة

لتتزن كلما مر الوقت .. ثم يحدث الانسجام التام

فتكسب ودها و تسيران على خطى ثابتة نحو عش كل ليلة

ليطفئ نور الحقيقة ويشتعل نور الخيال

Sunday, September 19, 2010

موضوع مالوش اسم

اللحظة دي بتجيلي كتير في حياتي
بسأل نفسي انا مين وليه وازاي وامتى
هو انا موجود ليه ؟؟؟ ربنا خلقني ليه ؟؟
هو في هدف من وجودي ؟؟ صحيح وما خلقت الانس والجن الا ليعبدون
بس ربنا مش محتاجلي في حاجة كده كده
انا موجود ليه بقا ؟؟؟
مش عارف اللي انا فيه ده اسميه ايه .. هل اسميه تحرر ولا تأمل ولا اسميه عدم ايمان
اذا كان في شيطان .. و كلمة " لو " بتفتح الباب قدام الشيطان
فا كلمة ليه .. بتهد الابواب اصلا
مش معنى كده انك ماتسألش
انا مش مقتنع بتاتا ان الاسلام دين تلقين .. اعمل كده يبقا هو كده .. خالص
سياسة الاسلام اصلا مبنية على التفكير .. ومن ثم التمرد
سيدنا ابراهيم .. من وجهة نظري في المرحلة دي هو البطل
هو الوحيد اللي شغل دماغه في وسط بقر .. مقدرش اوصفهم غير ب كده
ازاي انا الحجر هو اللي خالقني .. ؟؟؟ شئ مش مقنع تماما
يانهار ازرق !! ده انا ابويا اللي عمله بأيده .. ازاي انا اعبد حاجة معمولة بالايد اصلا ..
ولما حاجة ابويا اللي صنعها .. ازاي صنعت كل ده .. مدام الحاجة دي ضعيفة للدرجة دي
ولما يطلع ويقرر يدمر كل الالهة دي .. ويدي الفاس لكبيرهم ..ويقول للعقول اللي معاه دول بصو كبيرهم عمل ايه فيهم
وعشان هما عارفين ان كل ده نتش في نتش
قالو احنا حنعذبه .. بمنطق انه " كافر " منطق التكفير موجود منذ الانسان الاول
والخارج عن النظام لازم يكون غلطان بالنسبالنا حتى لو كان مين ولو كان صح حتى
احنا دلوقتي لو جالنا واحد وقالنا انتو اللي انتو بتعملوه ده غلط
اول تصرف حنعمله اننا نكفره ونحرقه ونولع فيه وكل الحاجات دي
زيك زي الناس اللي كانو قوم ابراهيم .. اتصرفت زيهم بالظبط هو هو نفس التصرف
فرقت ايه عنهم ؟؟؟؟؟؟ اسمك مسلم ؟؟؟
ماهو كان ممكن يكون اسمه اي حاجة .. المهم التصرف واحد
هو هو نفس الحكاية لما فكر عباس ابن فرناس انه يطير .. الراجل ده اتشتم لما طلع عين اللي جابوه
واحد طلع فكرة انه انا عايز اطير ... قالو عليه مجنون .. زي ما دلوقتي بنسمي اللي بيفكر مجنون .. كل العلماء عندنا مجانين ..
وكان لازم العالم ده في اي فيلم عربي يطلع تراللي .. عمره ماطلع انسان رزين ابدا
بداية بيوسف بيك وهبي الانسان الانوي النادر اللي كان بيقنع فؤاد المهندس انه ورقة
وغيره وغيره وغيره
بس مش صح ابدا .. عباس ابن فرناس كان عبقري في وسط شلة من الاغبية .. مقتنعين بحاجة اسمها "مسلمات " مافيش حاجة اسمها مسلمات
انتا كنت من كام سنة فاكر ان الارض مركز الكون .. وبعدين لقيت انك جاهل مش عارف حاجة اصل الارض دي مش مركز الكون ولا حاجة لان الكون ده انتا بالنسباله حاجة قد النمنمة
والارض كانو فاكرين انها مسطحة .. طلعت بيضاوية
واصلا احنا عايشين في عالم من التخاريف
ومافيش حاجة اسمها يقين .. الحاجة اللي انتا متيقن منها بس ان في حد خالق كل الكلام ده
باقي الحاجات دي ماتثقش فيها خالص اطلاقا
عادة اللي بيعمل حاجة غلط بيبقا عارف انه حيكون في النار
واللي عامل صح بيبقا احتمال يدخل الجنة على حسب نيته
طب اللي حاسس انه كان عادي لو مكنش اتخلق اصلا ده فين ؟؟؟
يعني انا بالنسبالي نار اشطة جنة اشطة .. لان ده قرار ربنا في الاخر مش قراري .. هو اللي بيحدد مش انا
صحيح انا بعمل .. بس هو صاحب القرار ..
ماهو احنا سمعنا كتير عن ناس تابت في اخر لحظة من حياتها وربنا بدل سيئاتها بحسنات
وناس قعدت تعبد ربنا طول حياتها وربنا متقبلش منها .. مش عشان هو فلوسه حرام ولا عشان اي حاجة .. هو بس عشان متخيل ان ربنا حيرحب بيه ويدخله الجنة على طول وبناءا على كده بيتفزلك على خلق الله
من وجهة نظري .. الاسلام دين اخلاقي .. دعى للتوحيد والاخلاق
بس
..
بتمنى اكون ماشي صح

Monday, September 13, 2010

سيب اللي يعيش الدور عليك يعيش

يعمل بظ في حياتك حد حاسس بحاجة مضيقاه .. ويقول لك
تعرف يا محمد ... اللي انتا عامله ده مش بطال ... طيب عادي .. بس ناقصه حاجة ..ويسيبك محتاس في الحاجة اللي ناقصة
او واحد " لذيذ " يجي يقولك ... انتا كان قصدك ايه من كذا اللي انتا عامله ده ... وتبقا انتا حاسس انك موضح انتا عاوز ايه
وهو يستهبل
او واحد بقا وده بيفقعهالي ... المرارة ... يقولك
هو انتا عملت دي ودي ودي ... تقوله اه ..
ويستنى اكتر حاجة انتا معملتش فيها حاجة ومتعبتش فيها .. ويقولك لا هي دي بس اللي عجباني
يا عم ماهو في مليون حاجة غيرهم حلوة ..لا هو يركز معاك في اكتر حاجة انتا مش عاملها .. عشان تعجبه
..
ولا حبيب قلبي اللي يقوللي ... في اضعف حاجة عاملها .. ياه انتا اتحسنت
؟؟؟
ماهو حاجة مالاتنين ... يا اما انا تفكيري يضربه بالدزمة
يا اما هو اللي حمار
..
بتضايق اوي بقا ..لما اكون تعبان في اغنية ولا حاجة .. ويجي سعادة البيه اللي عايز يرزع بصمته في قفا الاغنية
ويفضل يتريأ على اللي انا عامله ... يا وداااااااني
والمهم اني بكون عاملها كده يعني .. عاملهاله جميله ... وتعبان فيها شياكة
ومديها ستايل خاص بيها
وممكن يكون هو اقصى حد حيسمعهاله .. 10 تنفار في منتدى معفن
..
يا رب توب علينا من الحاجات دي
مفيش الواد الراجل اللي يحس بطعم الاغنية .. اللي يديني فكرة ماتخطرش على بالي
كلهم بتبقا حججهم فارغة بنت تييييييت ..لا مش راكبة معايا ؟؟؟ مش راكبة ازاي اومال انا بعمل ايه ده كله
واللي يتفلسف ويقولك لا دي برة المقام دي اوت اف تيون
يا راااااااجل ؟؟؟؟ ده على اساس ان وداني دي غطيان كازوزة ؟؟
ناس حمضانة
على رأي اعلان سبرايت
...
انا دلوقتي حعمل حاجة ..حسيب اللي يعيش الدور عليا يعيش
لا مش كده وبس ... ده انا حساعده كمان
ححسسه اني فاقد الثقة للحياة .. وحقوله ايه ده بجد عجبتك .. اصلي مش حاسس انها حلوة ... والكلمة دي بتسعده سعادة الدنيا
اشطة عيش
انفخ نفسك يا بطيئ .. ماطار طير وارتفع الا كما طار وقع
ومشربش الشاي اشرب ازوزة انا

رنتك باسم حضرتك اشرف حمدي الجامد اوي

Naweet ansaki m7md 3bdelmn3em 3attia

Friday, September 10, 2010

عايز اتجوز

اشمعنى هند صبري نطقت برغبة غادة عبد العال
انا كمان كا ولد بقول انا عايز اتجوز ..
كفاية كده بقا .. وبنشر على حبل غسيلي افكاري بالمفتشر
انا عايز اتجوز ..
البنات بالنسبالي احلام ...
ومش اي حاجة الواحد يعجب بيها .. المفروض
ماهو صح جواز الصالونات ده ماينفعش
لاني كان ممكن يبقا كل همي اني اتنقل مابين الصالونات وفي الاخر .. الموضوع فشنك
ابقا استفدت ايه ؟؟
لازم الجواز يكون فيه شئ من الرومانسية .. على الرغم ان انا مش رومانسي
واحساس من الخوف
خوف من الحياة .. المشاكل
المسئولية .. العروسة كمان نفسها
خوف من يوم الصدمة ..
اللي المفروض فيه يتحدد مصير الامة .. يا العزة .. يا تبقا عزة
المفروض
كا ولد من اولاد الايام دي .. يعني معنديش خبرة بمعاكسة بنات .. للاسف
لان دي حاجة كويسة على فكرة .. ده اللي بيعاكس بنات ده يا جرأته يا سعده يا هناه
حاجة من الاخر يعني ..
ولا يا ولا
انا مقضيها حليني شوية .. يعني تمشي زي ما تمشي .. في بنات اشطة مافيش بردو راضي
بس يجيلك احساس كده .. الله ؟؟؟ طب هو انا حفضل كده؟؟؟
مش حجرب احساس الكلام عالنت والتليفون لحد الصبح
والست بتاعت المحمول تقوللي لقد نفذ رصيدكم .. اللي عمري ما سمعتها الحمد لله
من كتر المكالمات معاها .. هذه المجهولة بنت المجهولة
سعات بندم اني مش في المجمع
يعني مافيش بنات وكده .. على اساس ان المجمع البنات فيه اسهل مالسندوتشات
جايز اه مش متخيل اليوم ده اشاسا ...
اني ابقا مشي في الشارع وساحب في ايدي واحدة
مسئولة مني .. اكون خايف من نظرات الناس ليها
واكون غبي اوي وانا ماشي معاها .. اللي بصلها بعنيه افقعهاله .. يع شكلي غبي جدا
غبي برخصة يعني ...بس اهو مش مهم شكلي انا المهم ال.. ؟؟!!! مش عارف
جايز اكون انا دلوقتي اناني حبتين .. مش بني غير نفسي وبس ..
بس هي كمان للاسف لازم تبنيني معاها لما تكون معايا ..
مش انانية بس مش مستعد اتنازل عن حلم .. خالص .. حتى لو ابوها رفضني عشان السبب ده ..
المزيكا بالنسبالي مش حرام اطلاقا ..
اطلاقا .. اطلاقا
وانا بعملها وعارف .. الناس بتبص للمزيكا من منظور هلس ومسخرة وعقد وكلاكيع
هي مش كده .. انا مبنكرش ان في حاجات كده وبلاوي موجودة .. بس ايه اللي يضمنلك انك في شغلانتك مافيش واحد حرامي؟؟؟
ما هي هي
والموسيقا مش حرام خااااالص
معندهمش فكرة ازاي الوحد بيتعب عشان يصمم صوت .. عشان يطلع حاجة ترضي 5 انفار على الاقل .. حاجة صعبة جدا
زي ما ربنا خالق مهندسين للهندسة انا مش معترف اني واحد منهم .. خالق بردو ناس للمزيكا ..
ودول زي دول مافرقوش عني حاجة .. خالص
وانا عارف مش عارف فلان قال ايه وانا مستعد اجيبلك كتب .. الكلام ده سمعته 100000 مرة .. وطظ في كل الكلام ده كله
كل دول ناس مش بتفهم .. وانا مش مستعد ابني افكاري على اراء واحد تاني .. وانا فين بقا مش المفروض لما اجرب حاجة غلط .. اندم واعيط واقول لا انا عملت حاجة غلط .. مفتكرش اني بعد ماعزف اغنية لسيد درويش او للاخوان رحباني او بيتهوفن اني بعيط ندما بالعكس ده انا ممكن اعيط تأثرا في ابداع شخص .. اتأثر اكتر واقول تسلم الدماغ اللي استقبلت الوحي الالهي
مش مستعد ابدا اسيب واحدة عشان ابوها يقوللي الموسيقا حرام ابعد عنها
يقوللي انتا ماشي في سكة ضلال وابعد عنها
انا مش ماشي في سكة ضلال .. بس حبعد عنها
لاني مش حقدر اقنعه .. لان رفض انه يفكر اصلا
جايز بطلع من موضوع لموضوع ... بس هو هو نفس الموضوع .. انا خايف اواجه اليوم ده ساعتها حعمل ايه ..
اختار حبيبتي ولا حبيبتي
يا اما اتجنن يا اما اتجنن
...
يا اما اعتزل الحياة الزوجية من اصله
...
لاني مش حلاقي حد جنبي .. وانا مش واخد الموضوع لعب ..الموسيقا بالنسبالي علم وحياة .. ماتقلش في وجهة نظري اهمية عن اختراع الكهربا .. وزيها زي اللغة.. انا بتعلم لغة .. بس انا مش بتكلمها .. انا بعزفها .. بنسجها من روحي .. واحساسي وافكاري
جايز مبفكرش الا في نفسي .. بس لاني مش لاقي حد تاني افكر فيه
او افكر على شانه
وحتى لو لقيتها ماوعدهاش اني اكون ليها على طول ..
لازم حياتي كلها قدام الصومعة ..الكمبيوتر والاورج والجيتار والمايك .. واذا غيرت وضعيتي يبقا ماسك في ايدي قلم عشان اكتب شعر او اغنية .. واذا غيرت حالتي ححاول الحنها واغنيها زي ما المفروض تتغنى
حياة ممتها ..بتنحت فيها افكار .. مسجون وخطوط ايده في كل حيطة في زنزانته .. وفرحان اوي عشان هو اللي عمل كل ده ..
حتى لو كان الوحي مش منه لكن ربنا بيوريني قدرته في دماغي في عقلي
في احساسي في ابداعي في تفكيري ... الفن طاقة .. والمرأة طاقة
وفي كل منهما جمال .. الفن جمال مستديم .. والمرأة جمال فاني ..
ولكن جمال المرأة المستديم .. في اخلاصها ووفاءها
واذا قبح احساس المرأة قبح جمالها
..ولا يبقا الا جمال الفن
والله جميل يحب الجمال
ومبدع الجمال
اللهم هب لي جزء مني .. لا اجد فيه تعبا ..جمالها في داخلها ينضح على خارجها ..آية في تفكيرها ..
كانت الست الوالدة من كام يوم بتقوللي عالموضوع ده .. سمعتها قعدت اضحك
.. مش مستوعب ان انا عايزة تخطبلي
لاني في نظر نفسي لسة صغير .. عيل
وجايز لو بقا عندي 50 سنة افضل باصص لنفسي نفس البصة
مش احساس بالفراغ او تقليل لنفسي
احساس ان انا مش بيتغير فيا حاجة .. يعني لو مبصتش في المراية لمدة 20 سنة وبصيت بعدها ممكن معرفش نفسي
من كتر منا ممكن محسش اني كبير او مش مصدق
منتظرين مني اني افتح بيت واتجوز واخلف واشتغل ؟؟؟
انا ؟؟؟
انتو بتكلموني انا ؟؟؟
؟؟
كباية المية الساقعة بالنسبالي انجاز تاريخي ..
طلبت من ابويا وامي قبل كده كتير .. اني ابعد عنهم لفترة .. اعتمد على نفسي في بيتي .. امارس سياسة المفاجئة ..
بس خايفين عليا الا اتجنن ..
بس احساسي بالجوع هو اللي حيقومني عشان اعمل لنفسي حاجة ..لكن انا لاقي دلع .. قشطة ابو بلاش كتر منه
حد يلاقي دلع وميتدلعش .. بس انا عارف كويس اوي اني لو انا لوحدي حعمل كل ده .. جايز ممكن اهمل نفسي اوي
تلاقوني شكلي مبهدل شوية بس اشطة ..
بس عايش وعايش كويس كمان .. بس مش بفكر في نفسي .. فما بالكو لو احدة معايا
مش عارف مش متخيل ...
بحس بدربكة ي دماغي من كتر منا مش متخيل الموضوع
مش نفس احساس ان انا قاعد في تكييف في الاستوديو بتاعي وقدامي واحدة بصوت ممتاز بتفني
وبتشكر في شغلي الجامد اللي حيعملها نقلة في حياتها الفنية ..
وتديني المبلغ التمام ..عشان اشتري برامج اكتر واوزع اكتر ..
اف ..
ياترى شكلي عامل ازاي كمان 10 سنين ؟؟
حعيش ولا لا ؟؟
حكون حبيت ولا لا
طب متجوز ؟؟
طب خلفت ولا لسة شوية ؟؟
اشتغلت ؟؟
طب ايه ؟؟؟
ولا مافيش حاجة وعواطلي وزي خيبيتها ؟؟
انتا مين يا عم اسماعين ؟؟
..
انا دلوقتي .. عايز احب
وعايز اتجوز
10/09/2010
Ms3a_miso

Thursday, September 9, 2010

happy k7k

عيد عيد عيد عيد .. يعني كحك وسكر سنترافيش ..يعني لكمة وكرش كبير
تدوق كحكاية بملبن تقول اه .. اما ادوق اللي بعجوة بقا .. تخلصهم تقول لما ادوق الغريبة ام نص لوزة محمصة من فوق ..
وتخلص كام واحدة بتدوب في البق ..وتقول ياه لما ادوق حاجة مختلفة .. ويا حبذا اذا كانت قرص او بسكوت ..
على الرغم ان الحاجات دي تركيبها السيكلوجي والفسكلوجي و الل لوجي ..واحد .. وان كل ده في الاول في الاخر عجينة
بس لكل واحدة منهم احساس وبيحمل في ماغك ذكرى.. وتفضل تملا بطنك بالذكريات لحد ماتوصل لانتخة العيد
يعني انتخة عالكنبة وتشوف نفس المسرحيات هي هي
بس انقردت بالنسبالي معاني حلوة في العيد .. يعني اخر واحد من قرايبي زوته كان يعني حاجة قريبة لتسع سنين كده
كان الواحد لسة صغطط بقا و بيروح لناس هو اصلا مابيحبهمش عشان العدية
نوع من اذلال النفس يعني .. واتحول العيد بالنسبالي لمناسبة سيئة لما كبرت
اولا انا مابحبش العيد عشان كمية العيال السيس اللي بيبقو في الشوارع .. وزحمة ومليطة وزروطة ..
وبتلاقي العيال فيه ضاربين الحبل .. وخصوصا العايال السيس .. والجيل الاوفر .. بيبقا مستخسر الفلوس تقريبا في بيلزق شعره كله
وبتلاقي انثى السيس بردو اللي في غالب الاحيان بيعاكسها .. ويصفرلها .. ويقولها والنبي عسل ..
وهي تقوله ماشي يا طحينة .. ويغمسو في السكة مع بعض
بتكون في الغالب لابسة .. هدوم فوقها هدوم فوقها هدوم .. وكل حاجة ستايل مختلف تماما .. وفوق دماغها التاج العيدي .. وده عبارة عن .. كاسكتة لميع .. زي بتاعت التكوسة ..بتلبسها كل عيد هي هي
والمناظر دي بتبقا في العيد مليانة فحت ..
مافيش احساس القرايب .. اللي زمان ..كانو على طول بيدوقو بعض الكحك .. يعني عيلة 3 افراد اب وام وابن يروحو عند طنط سعاد او ايا كان اسمها
وتروح الحجة سعاد مدوقة اللي جاينلها الكحك .. بتاعها اللي هي عملاه بأيدها وياسلام لو كان وحش .. محدش يقدر يقولها حاجة
ويفضلو في نفاق وهما مبتسمين الكحك حلو الكحك حلو
والواد طبعا يلهف العدية .. اللي على ايامي .. كانت من الناس المتريشة 20 ومن الناس النص نص 10او اللي بتواجه ازمة اقتصدية والناس الأيحة 5
ويقوله انزل العب مع مش عارف مين يا حبيبي عشان يتفسحو .. والشارع ينبت عيال بتحدف نفسها قدام العربيات .. وكمية كلاكسات تعكنني
ومافيش حاجة تخنقني في الدنيا في اسكندرية اللي بيكون اغلبها هادي الا منطقة واحدة ... دولة بحري
بحري دي عبارة عن دولة .. انا واحد من شعبها .. فاضية طول السنة ..اشبه بميامي اي حاجة في الدنيا ساحلية جميلة .. بالنخل اللي محطوط فيها ده .. ومنظر البحر واشطة ...
كل ده بيتلوث في فصل الصيف واي عيد ..ليه اسكندرية كلها بتتجمع في بحري في العيد ؟.؟؟؟ وباقي اسكندرية بتبقا فضية .. في الاغلب مش بيبقا فيها غير بتوع بحري بس اللي خارجين
بس بتبقا بالنسبالي 3 تيام في البيت .. اغلب الاحيان ..
ومابلمسش من حلاوة العيد غير صفاء ابو العسود وهي بتقول يا سلاااام
:D
عيد برادعي عليكو
happy k7k :D

Thursday, September 2, 2010

علم المملكة الاسرائيلية

في البداية بوضح حالنا كا عرب دلوقتي .. وفي مصر تحديدا الفرقة وعدم المبالاة مهما بنحس الالم مبقاش خلاص بيوجع .. جتتنا نحست خلاص .. لحد ماتيجي المملكة .. بس المملكة دي مش حتلاقي نيل .. المملكة دي مش حيبقا في علمهم غير لون واحد ازرق هو لون الفرات .. انما النيل .. باي باي

...

لحظة بكا ولحظة وضوح .. سبوت الاضاءة في وش الجروح

صرخة الم في الليل بتكتم اصوات بتفرح ..تصبح تنوح

وخالتي ناعسة فوق السطوح .. بتنشر همومها وعايزة تبوح

بهم طالها ..لله سؤالها .. ؟؟ دعوة بتسكن .. ودعوة تروح

..

دنيا وقاعدة في الناس تدوس .. راكبة في غرورها دكر الطاوس

دنيا بتدي بدال الفلوس .. فرحة تغطي صوت الكابوس

توهم صاحبها ..اللي يصاحبها .. خمرة بتلطش عقل ملحوس

ضلمة ومافيش الا فانوس ..اخره يضوي اوضة جلوس

مساحتها اد خرم الابرة

في وسط الزبالة الامل مكنوس

ازاي تعوز بين الزبالة حد يعرف معنى الحلاوة

عمدة في راسه وكل همة .. انه ينزل يلم الاتاوة

هو الكبير وفوق الغلاوة .. والناس قدام القانون تتساوى

طب قولولي في شرع مين ؟؟

بقا فيكو نفس تقولو عايشين ؟؟

بأي امارة لما الاشارة تكون من صوباع اتخن تخين

والواد الرفيع عليه الطاعة جعان وبلاؤه يشوف البضاعة

ويديها بأيده لعدو بسكين

و صوت ضميره بيهز كبته .. سيف الحقيقة بيبتر رقبته

يا ناس يا عقل يا بنيآدمين

بقا الحي يبقا مش لاقي ماية .. وتدورو تسقو الميتين

....

طفل عيان نفسه يخف ..وعياه في شريط عمره بيسف

والايام عنده ساقية وبتلف .. بس مابتدورش عشان ماية

بتدور بعذاب واهات ووجع

تسقي في اراضي ببذور بتشف

بتشف حقيقة متغطية .. حيجيلها في يوم وتطرح محصول

ياما تطرح احباط وتموت

يا تبني الاخضر في الارض يطول

بس حيبقا نص المحصول ..يابس علشان جفت مية

من ارض خيرنا اللي ياما غيرنا

رسم خريطة مملكته على حس خيرها

وبس مايعرفش ان النيل.. حبة يشيلو منه المية

وحيبقا علمهم بدل خطين .. بخط ازرق واحد بس

علم الجهالة ومملكة النحس .. علم التخلف والرجعية

علم المملكة الاسرائيلية

...

محمد عبد المنعم عطية

Ms3a_miso

Saturday, August 21, 2010

حمرا .. وبتنور

حمرا.. وبتنور
اشارة مرور من الغموض
توقف طموحي وتحبسه ..عن انه يعدي الحدود
والحسرة تيجي لحد عندي
وانا بشوف غيري بيعدي
ملاكي كان او بقا تاكسي
مع انه في السكة العكسي
وحظوظه في تياره سايرة
وعربيتي لساها دايرة
لاكنها واقفة مكانها
مع انه مش هو مكانها
غصب و مفرود على امكانها
وكلاكسات هارية ودانها
من عربيات زيي انا واقفة
روحها في مناخرها ومتناكفة
....
لو كان فيكي يأشارة عدل ..تمشي كله وتوقفيه
بشرط يبقا في نفس الزمان
لكن الاشارجي يا اشارة ندل .. نايم في كشكه ببراءة في عينيه
ماقولش عليه الا حيوان
قاعد يتحكم في البشر
وباء للعزيمة واتنشر
خلص بنزين من عربيتي اللي كانت من ثواني دايرة
كانت عروسة حلوة جميلة .. دلوقتي بقت ارض وبايرة
امراض في الزرع الطالع
مش قادر تعدل في الشوارع؟؟
حتعمل ايه في المزلأأأأنات؟؟
لا صح .. مكانك هو المأزلانات ..
وان ماصحتش من صوت الاطورات
ضميرك اللي حيصحيك
الا الوزير يتغرغر بيك
يحبسك ولا حينفيك
لا ياراجل لا سمح الله
مش خوف ابدا على حلم الناس
انما وجودك في وش احلامي ..تقفيل وش بقا وخلاص
احباط بكلمة لون احمر
عصف ذهني بيتدمر
زي ماتكون جيت بالجومة
بتمسحلي تعبي وتتأمر
...
نفسي اعرف يا حظوظ على ايه
حرماني وتتحكمي فيا
خايفة من صوتي لا يعلى عليه؟؟
دمرتي ذوقي وشوهتي عنيا
عن كل حاجة كانت حلوة
..
لا الاجنبي احسن مني ولا ناقص ضلع من ضلوعي
بالعكس انا احسن منه .. اقله عمره ماداق جوعي
ولا عاش صبر زي مانا ماصبرت
على هم تقيل ياما استحملت
لكن هو 0 في شمال
فافي ومان وافكاره اومليت
..
ابوس ايدكو انسو ماضينا .. حاضرنا امة منهارة
عمر ما حيحصل حاجة .. لو كسرنا الاشارة
علشان بقدام نتبرك
لكن لو فضلنا ندعي ربنا للصبح ان ترابيزة تتحرك
احلف بالله ماحتتحرك .. غير لما مخك يتحرك
انك تكون مبدع فنان
ويسلم الناس من شرك
وساعتها بس حتطور
وتقول للي عدا قبليك
عديت
حمرا .. وبتنور
........................
محمد عبد المنعم عطية
Ms3a_miso

Saturday, July 31, 2010

محتوم...قصدي مختوم على قفاه

كا نسناس .. مصري .. من نفس نبت الارض .. الصفرا ... لان معندناش لون اخضر دلوقتي
وبما ان ارضنا صفرا ... فا ممكن تفكرنا ..بالبيض ..اللي احنا عايشين فيه والزلال .. قصدي الذل ...
اللي بنعيش فيه كل يوم .. لدرجة احم احم .. لزجة
وفي اخر النهار يرجع لبيته .. وينام زي البهيمة اللي متعلقة عند الجزار من عرقوبها....وهكذا وهكذا كل يوم ..روتين ... روتين .. روتين وكأن الموضوع عامل فعلا زي كارتون مازنجر ...هي هي نفس الحلقة .. بس بيغير الوحش ..
على رأي جورج عزمي
بس الفرق هنا ان الوحش مش بيتغير الوحش ثابت كل يوم ... والمرة دي الوحش محدش بيخاف منه
... لانه اصلا مابيخوفش... هو وحش ممل بس
بس حلاوتة في لحظة القبض اللي لا تتعدى 10 دقايق .. وما يترتب عليها بعد كده..بس
وبعدين ارجع تاني لنفس الوحش ... اللي بيمص دمك .. بأسم الشغل الممل اللي مش بيتغير ..شريط حياتك وبيلف .... يارب مافيش مرة الشريط ده يسف ؟؟؟؟؟؟او الهيد يتحرق ونرتاح
شريط حياتنا كلنا وش واحد ... زي شريط الفيديو .. هو هو نفس الوش .. ومدته 24 ساعة
منهم متوسط 4 ساعات نوم .. بيكون الشريط فيها في اكتر اللحظات سعادة ... الا لو شايفين كوابيس ... مترتبة على نهار شريطكم
انا سخسيا .. شريطي بيبدأ بكمبيوتر .. وبينتهي بكمبيوتر ... وفي النص بردو كمبيوتر .. ده نمط حيات الواد الويرليس
عمرك بيتسرق منك ... وانتا بردو مش بتعمل حاجة ..الدنيا تتشال وتتهبد من حواليك .. فوق دماغك كمان وانتا ولا انتا هنا
مع ذلك في ناس عارفة هي بتعمل ايه ..وواصلة لهدفها...نصيحتي ليك دلوقتي ماتبقاش مشتت بين احلامك
وحتلاقي كل ايامك كلها بتضيع مع الكمبيوتر ... زيي .. مابين كتابة .. او تدوير على فرصة لكتابة اغنية
او كتابة على مصراوي.. او على البلوج بتاعي... او التدوير على اغنية الحنها .. او اوزع لحد ..او تنزيل برامج تساعدني في مشواري... او شغل هندسة .. وتكليم صحابي ... ويعدي اليوم ... وانا معملتش حاجة وبلاقي فعلا وقتي بيتسرق مني
وبردو معملتش حاجة
نصيحة ماتبقاش زيي .. اشتغل على حاجة واحدة " بس " واعملها واسعا وراها ...
ماتشتتش نفسك بأحلام كتيريا تكون قدها ... يا تفكك منها
محمد عبد المنعم عطية
Ms3a_miso

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com