Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Sunday, June 19, 2011

البن البرازيلي ..صلاح سالم


فتحة باب خشب بأزاز 
والرجل اليمين بتخش المكان 
أنتخة على كنبة حمرا 
هاند فري و اغاني جاز .. و كابيتشينو كراميل سكر زيادة
في كافيه البن البرازيلي (صلاح سالم)
ورقة وقلم والوحي نازل 
وقلمي بينهج من كتر الكتابة
مشاهد بتجري قدام عينيا
انماط للناس 
طبقات و طاقات
وهدومهم واجهة لبيئتهم
احساس غماقة الارستوقراط 
احساس بهيافة المتشبهين
واحساس بطبقة المثقفين 
ولون فنلة البرازيل .. بيقطعلي مود المكان
بار ..
الكبايات بتتزحلق عليه 
وتبوس شفايف الزباين 
وتنقل للكباية الاسرار
ومع كل غسلة بتتغسلها 
بتطهرها من الهموم 
والشمس بتطلع كل يوم
وترمي نورها على الازاز ..
وفتحة باب خشب بأزاز 
والرجل اليمين بتخش المكان
وانتخة على كنبة حمرا 
هاند فري واغاني جاز .. وكابتشينو كراميل سكر زيادة





Saturday, June 11, 2011

Thursday, June 9, 2011

شوكة و سكين


ما الحياة الا وجبة شهية 
يسليل لها لعاب الناظرين 
ينظر اليها المحروم منها 
ويقول يال حظي اللعين 
أناس تأكل بيدها وتلغوص في الصحون
واناس يأتي طبقها مزين للعيون
وشرب النبيذ لذة معه الهم يهون
تأخذ نصيبك وتشبع وتدفع الثمين
حتى ترضي غرور كرشك البدين
وترضي اطماع شكلك اما الحاقدين
وتقطع من نصيبهم بالشوكة والسكين

Wednesday, June 8, 2011

فنلة داخلية .. حبلص




فنلة داخلية .. محمية بنسور ونجوم مضوية
على كتف كت .. ومن الزنوب وقع وانحط
مناخيره اطول من بينوكيو .. بعقده عالغلابة نط
فاشل ساقط ثانوية
عااااار ..50 في المية
يركب ويدلدل رجليه عليا ؟؟؟
ويتضربله سلام ويتقاله باشا ؟؟
اومال يتقاللي ايه وانا 95 في المية
اه يا بلد "كانت " رتب ونسور .. حامية حرمية في قصور
ماشيين بيغموا الحمار  وبيسوقو الحنطور
والحمار مقهور !!!!
يا حبلص يا ابن مابلص .. ودان امك حتتملص
من شعب عمره ما حيخلص .. اهانة وتشفي في الدبور
يا ضابط هفية ومغرور
بكره حيبقى عليك الدور
وتعترف انك طرطور
وفنلة داخلية مقطعة


شاي بحليب


في مج ابيض 
وفي ركود الشاي
ويتلألأ اللون الذهبي في مناخ اسود
ويظهر صفاء الماء 
يعبر عن مذاق السكر 
الغارق في الاعماق 
والمتحلل في دوامة ملعقة نحاسية 
وبعد الهدوء الاستقرار
هطل على المج الاستعمار 
واخذ يأسر حبات الشاي وتصارعان على ملك القاع 
حتى يضيق باللبن الانفاس فيصعد الى اعلى
ليستنشق الاكسجين ويبدأ حملته للسيطرة 
ويقتل اللبن في الشاي السواد ويقتل الشاي في اللبن البياض
حتى يتعادل الخصمان ويستقل كل بمملكته 
وفي الوسط الحياد 
ثم تأتي قوات الشعبية ..متمثلة في الملعقة النحاسية
مرتدية عمة وجلباب .. 
وتأتي للصلح بين الاحباب ..
وبملعقة الايام يستمر التقليب
حتى يغلب اللون البني .. على الشاي بالحليب 

ثلاثين يوم تدوين



بعد مرور 8 ايام من شهر 6
 ..
قررت الدخول في حملة 30 يوم (الا 7 ايام تدوين ) على امل المواظبة 
لاني من اول الشهر مكتبتش غير تدوينة واحدة
وباقي 7 تدوينات ححشرهم معايا على مدار الايام اللي فاضلة 
 بسم الله توكلنا على الله  

Friday, June 3, 2011

عزيزة

داري وشي وعري جسمي ساعتها .. مابقاش مكسوف 
ولو شافتني كل الدنيا .. المهم انا عمري اشوف
 في عيوبي مابشوفش عيوب .. حتى ان كان الكون مقلوب 
ليه بتحكمو عالصورة حالتها وتهمشو شئ اسمه قلوب 
بتعشقو في السوبيا بياضها وتذمو سواد الخروب
وكل واحد ليه ستايلو والاتنين مافيهومش عيوب
>>
 ياللي مخاخكو ملفوفة في ملاية ..انا ديني مش تحت وصاية
ليه لازم اكون اخواني او وهابي .. دي رمز هداية ؟؟؟
انا مسلم وعليا كفاية
اخواني بأسلامه ذاللني .. يحرق يلعن .. طب مانا مسلم .. مين ده عشان يمثلني !!!؟؟؟ 
واذا كنت مش ماشي في هواه او حتى بعاتب على فكره 
 يحل لنفسه انه يكفرني .. ماهو واخد اسلامنا لحكره 
ولو اعترضت عليه شخصيا فابكده انا ضد الدين 
هيهيهيئ والنبي طيرو باللالين
 >>>
يا حضرات  السادة الاخوان 
ماتبقوش زي الالمان 
شايفين نفسكو ارقى سلالة 
واشجع ناس وانتو الثورة 
وبالنسبالكو الباقي جبان
>> 
والكلام  ليكو يا سلفيين 
مش سلفي يبقى انا ضد الدين ؟؟؟
طب ماحنا كلنا سلفيين 
بس بينا انتو مش معترفين 
وشايفيننا من الضالين 
وانكو انتو الوحيدين اللي عندكو اصل الدين 
وبقى بعضكو يحلى في عينه النفخة الكدابة 
ونازل في الباقي معايرة
ممكن ربك يرضى عليه ويخليك انتا حياتك طايرة 
ويوقفلك المراكب السايرة
...
يا عقول ما كفاية تقسيم 
واتناقشو بنفس صفية 
ماتوزعش على الناس تحريم
وتفرض عالكل سوء النية 
اتعودو ازاي تختلفو .. منغير ماتقوم التغليظة 
ولو اتغلبت في المناقشة بلاش تقلب الطرابيزة
علشان تطلع شكلك كسبان .. بدال ماتطلع بنفس عزيزة

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com