Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Thursday, June 17, 2010

كوافير حريمي




انا النهاردا قررت اني اسيب كل الحاجات اللي انا بعملها في حياتي
وقررت اني اتفرغ لشغلانتي اللي انا كان نفسي اشتغلها وانا صغير
وهي اني اكون كوافير حريمي
فقررت اني ارمح بخيالي شوية عشان اشبع عقدة النقص اللي عندي اني مش كوافير حريمي
تعرفو انها شغلانة تحفة اوي بمعنى الكلمة ..فككو من التظبيط ومعاملة الجنس اللطيف
اكيد لو كنت كوافير حريمي كنت حبقى ناجح اوي ..
لاني كنت حعمل شغلي بضمييييييييييييير
ياما بيورد عليا من اشكال والوان .. بس ببقا في قمة السعادة لو اللي انا بهرش في راسها دي
كانت حلوة ..يا سلام دانا ساعتها بطول على قد ماقدر في الوقت مش بعيد تقعد عندي 3 ساعات
وساعة ما يكون عندي وحدة وحشة وقاعد شغال في راسها ..بكون مش على بعضي عايز اخلص بقا
وبكروتها وبعملها تسريحة اي كلام واخرها معايا 5 دقايق

في يوم كانت عندي عروسة وانا بكون قمة السعادة ساعتها لان اخر واحد بيلمس شعرها في حياة العذوبية
بيكون انا
:D
بعد ما العروسة مشت وجم اهلها يزفوها عشان يودوها الفرح كانت الساعة 11 فا قعدت ساعتين وبعدين لقيت الرجل خفت
على المحل .. فاقلت اقفل وانا بشد السيشوار من الفيشة .. حصل ماس
ولقيت السيشوار بيطلع دخان
انا بعد ورجعت لورا ...
لقيت طلعلي عفريت من السيشوار قاللي طلباتك ايه
واكمني انا بتفرج على افلام كتير
فا كنت متوقع حاجة زي دي فا ماتخضيتش
قاللي طلباتك ايه يا مونبيه...قلتله بنت حلو وشاليه
راح قايللي ان كان على الشاليه اجيبهولك في مارينا قريبه وبسعر كويس
لكن البنت ...لا يمكن طول مانا عايش
فا اتضحلي بعد كده ان العفريت ده كان عازب وفاته قطر الجواز ومافيش جنية راضية تعبره
ومنفسن منهم اوي
وانا من المناظر اللي بشوفها في المحل عندي مش قادر الصراحة
كلمة مني كلمة منه اتخانقنا
اخر ما غلب معايا .. قاللي طب انا حثبتلك اثبات السنين
فا انا قلتله .. اشطة تنين
.. فا راح قايللي مش انتا كوافير حريمي ..قلتله اه ..قاللي انا حخلي صوابعك دي لما تلمس اي واحدة من زباينك
حتقرا افكارها ..صوابعك اللي سبب سعدك هي اللي حتعرفك قيميتهم
فا فعلا عمل كده..
تاني يوم جيت بفتح المحل.. وبمارس شغلي عادي وكلي شوق ولوعة افهم اللي بيفكر فيه زبايني
...
دخلت اول زبونة ودي كانت يا سلام حلوة اوي اوي بقا.. حاجة ولا يا ولا
بنوتة حاجة بتاعة 26 سنة كده وعاملة هايلايت اصفر في شعرها ومعاها قطة سيامي حنكوشة منكوشة
فا قلت ايوا هي دي فوتات احلامي اللي بتمناها
اول ما مديت ايدي على شعرها ..سمعتها بتقول جوة نفسها: يارب يعمللي شعري المرادي حلو بقا
كل مرة بيعملهولي وحش .....انا قلت عادي ده رأيها...بعد كده لقيتها طلعت الموبايل
قالت الو ..ايوا ازيك يا سماح ..ايه اخبارك.. ايه عاملة ايه .. وازي الواد ايمن لسه بيبعتلك الرسايل اياها
...انا شلت ايدي بسرعة احسن اسمع الرسايل اياها..وبعدين مديت ايدي تاني بحذر ..عشان اسمع الرسايل اياها
:D
راحت قايلالها بعد كده اشطة يا حبيبتي ربنا يهنيكو ببعض
..اول ما قفلت السكة راحت قايلة في نفسها..اه يا بنت ال.... مش ده ايمن اللي كان بيجري ورايا طول النهار
بقا عشان صحبتي تيجي بسهولة وتاخد مني " واحد من صحابي" ايه ده..طب والله لانا لاطشة منها الواد وائل
انا بقول لنفسي .. يانهار اسود ايه البنيآدمة دي ..دي ماتتعاشرش
خلصتها بسرعة بعد ماعرضت قدامي تاريخ حياتها اللي زي العسل
..قلت لنفسي مش كل البنات كده.. اكيد يعني مش حيبقو زي الولاد
...
دخلت واحدة غريبة اوي متوترة ..فا بدأت المس شعرها..ربع ساعة عدت وهي مافكرتش في حاجة
يا سلام ملاك يا خواتي .. دانا كدت افقد الثقة في البنات كلها
عدت الربع ساعة ..ولقيتها نطقت بحرف ال أ بتقطيع
وراحت قايله بسرعة ... انجز بقا يا بقف عايزة الحق اخد الجرعة
!!!!!!
جرررررررررررررعة؟؟؟؟؟؟؟ ينهار اسود .. دانا قلت عليكي محترمة
..
التالتة دي كنت بكرهها وهي اصلا وحشة..قلت ماتحكمش بالشكل .اكيد دي داخلها حلو
لمست راسها .. لقيتها بتبص جنبها على واجهة المحل الازاز ..وبتشوف البنات اللي رايحة واللي جاية
وهاتك يا شتيمة في اي واحدة حلوة معدية
انا قلت بلا نيلة ..يعني انتي اللي حتطلعي عدلة
..
عدى اليوم و دماغ تشيلني ودماغ تحطني .. و مافيش ولا واحدة عدلة ..
وفضلت مستني
ومستني والافكار كلها بتجري في دماغي
اكتشفت ان العفريت ده كان عنده حق
البنت بطبيعتها
نمرودة .. في الدنيا انا ومافيش بعدي ..انا اللي اعمل كل حاجة وانا الصح
البنات بتنفسن من بعضها تنييييين
جايز الولاد ينفسنو في الشغل..لكن البنات في كل حاجة حتى في الشكل
زهقت من الافكار والاحلام والكوافير الحريمي
والدماغ الحية... ونعود اللي الحاجات اللي مابتفكرش
الزلط والرمل والخرسانة المسلحة

مش عايز بنت تزعل مني.... انا بحلم بس

قشطة تنين
:D
Ms3a_miso

2 comments:

غادة said...

7elw el 5ayal el wase3 , nice post :)

Mohammed Salaheldeen said...

rabna ygbor b5atrek :D :D ... kwaes enha 3gabetk :D

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com