حفل توقيع كتاب حياتي

بعد 8 ايام من كتابة الموضوع ده .. حكون بدأت عشرية جديدة من حياتي ..وهي العشرية التالتة..بيقولو ان من كانت طفلوته سعيده فان شبابه سعيد وشيخوخته سعيدة..وانا عشريتي الاولى اول سطر انكتب فيها كان اثناء مبارة نهائي كأس العالم 90 كانت مبارة حامية اوي مابين المانيا والارجنتين ..واللي فازت فيها المانيا بكاس العالم ...
تاريخ 9 / 7 /1990
تاريخ فيه 999 و 7 و 1 و 0
برجي السرطان ..بس سرطان علاقته بالماء مش لطيفة .. عشان كده انا عندي فوبيا من المية ..وكذلك الاماكن المرتفعة ..والمراجيح
:D
واي حاجة بتمشي على اربع رجليين :D
اول عشرية كانت سمتها الشحططة...مابين فكتوريا اللي بيتي كان فيها ..وبحري اللي كانت فيها مدرساتي ..7 سنين شحططة من حضانة
لحد ما ربنا الحمد لله فرجها علينا وعزلنا رحنا بحري جنب الشغل بتاع ابويا وامي..بعد كده..
فترة كانت كلها ابتكارات باللعب...لان على ايامها لا كنت بكتب ولا عندي اي خلفية بالموسيقا..فا كنت بحاول اعمل من اي اشياء بسيطة لعب ليا ..مثلا اتخيل ان اتنين بيحاولو يقتلوني وانا بهرب منهم..وكانو بيضربوني بيعدموني العافية ..وانا كنت بتضرب ..مش اللي بضرب..وملة السرير اللي اتكسرت شاهدة على كلامي من كتر الرمي عليها .. مانا مش حقع على الارض بقا ..وكانت نتيجة استخدام اي حاجة .. حتى الايشاربات بتوع اي انثى عندنا " كنت بقلد هوجان ماتفهومش غلط" اني جالي بسببها تنية ..
بس كان في لحظات تحدي .. لما بتعارك مع اي حد اكبر مننا في السن معانا في المدرسة واحس اني انا عفي عليه..بحس ان هوجان جاب نتيجة
وعلى ذكر هوجان .. كان في واحد جارنا كان مسميني هوجان ..عشان كان بابا راجع من السعودية معاه شرايط فيديو "اللي انقرض ده"
لتسجيلات الحذيفي في مكة وشرايط هوجان ..وشريط فرح ابويا وامي اللي انا سجلت عليه
:D
كان في مارينج .. اللي انقرض بردو :D
بس كانت تشوب فترة طفولتي اوقات عياط زي اي طفل .. وفترات ماما سامية وجريندايزر ..اللي انا مش فاكرهم خالص..بس انا بديت احس اني نجيت من التخلف ده ..مع ظهور البوكيمون ..وباور رينجر ...كانت قمة سعادتي ببوكيمون ده هلامية
....................
فترة العشرية التانية..العشرية التنية كانت فترة حلوة وانا بحبها اوي بقا ..مع 10 سنين عزلنا وسكنا في بحري ..شقة كلها ريحة بوية ومش مفروشة ..فاكر الريحة لحد انهاردا...شهرين وجبنا كمبيوتر ..وكانت فرحتي كبيرة اوي .. كان بابا عايز يجني عليا ويستولي عليه .. بحجة الشغل عليه .. بس ايامها الكمبيوتر مابيعرفش" يكح" في حاجة .... ومشوها يكح.. كانت فرحتي كبيرة بقا بفيفا 98 اللي فيها مصر ...ايام غريبة اصلا وناس مابتعرفش تلعب ...بس كنت بعمل حاجة بقا ..كنت عامل مكتبة لعيبة اي اس لعيب سمعته في حياتي اعمله في فريقه
واعلى الباور على الاخر ..غالبا كل الفرق عملتلها كده .. بالاضافة اني كنت بدخل كاس عالم بأي فرق عربي ..المهم كلهم كده ..ولازم اوصل للنهائي بفريق عربي ..
فترة انتقالية تانية ...جبنا الدش والرسيفر ..والحمدلله ربنا نجانا من القناة التانية ..وجالي اشباع طفولي من سبيس توون .. اول يوم جبته
كانت الحلقة التانية من ابطال الديجيتال 1 اول عرض....جالي ابهااااااااااااااااااااااااااار.. انا كانت القناة التانية عملالي تخلف ..
وسلام دانك بعد كده .. كان سبب اني اتدرب باسكت .. والكورة لسة عندي لحد النهاردا فوق الدولاب ...
بدأت فترة اولى اعدادي .. ومعرفش ايه الشطارة اللي نزلت عليا مرة واحدة دي ..لقيت نفسي بطلع من اوائل الفصل
مع اني كنت في سنة رابعة ابتدائي كنت حسقط ...وكانت ايام غم ومش بعرف ارد على اي سؤال
جايز العدد القليل في الفصل هو اللي كان محسسني بكياني..وصاحبت مدرسين اعدادي .. على الرغم اني كنت بترعب من مدرسين ابتدائي
لاني كنت بتعذب مش بتضرب ...جهل ... المهم عدت ايام ودخلت فصل المتفوقين في تانية وتالتة ..تانية كنت مش باجي شوية ..تالتة ماشافوش وشي خالص..خلصت اعدادي وجيت ادخل ثانوية..والدتي ... محمد ادخل راس التين يا محمد ...لا يا ماما انا حدخل الانفوشي .. انا كل العيال اللي مكنتش بطيقها دخلت المدرسة دي ..وانا مش عايز ابقا معاهم ..يابني اسمع لامي ... لا .. حدخل الانفوشي يعني حدخل الانفوشي
وكان احسن قرار اخدته في حياتي .. قالولي مدرسة صيع والعيال منحرفة وبتشد كلة .. انا قلت ابدا حدخلها وكلي فخر
احسن مدرسين موجودين فيها فعلا .. باقي المناطق مدرسينها فافي اوي ..اولى ثانوي كانت فترة الكحرطة بالنسبالي ..جيل بقا وحركات
قبل كده كنت معفن وضارب شعري على جنب وكان منظري زي الكورة الشراب .. عارفين الشب المجتهد اوي اوي اوي ده
اولى ثانوي طلعت من جلدي ..وبقيت شخصية تانية ..قابلت استاذ عدنان بتاع الفرنساوي ..كان راجل جبار في منتهى الاخلاق ...
اول كلامي معاه كان بخناقة ..انتهت بكلمة منه انتو اتحدفتو علينا من انهي داهية
وانتهت بمصالحة منه ليا كنت ضارب بوز جامد اوي بعد الكلام ده ولما جه يصالحني رحت مزعقله هداني بقا
وبقينا صحاب يعني ..كل ماشوفه دلوقتي اسلم عليه بقا وكده بس بقالي فترة كبيرة ماشفتهوش ...بس في فترة بقا في تانية ثانوي
كنت مش عارف فيها الالف من كوز الدرة فراح قايللي محمد انتا ايه اللي جرالك انتا خبت ولا ايه .. من ساعتها بدأت اتعدل بقا:D
..
تانية ثانوي بعد فترة معاناة مع الدروس وبعد معرفتي بأستاز ايمن فراج اللي سهل علينا الحفظ والدش بالاغاني .. كان بيحفظنا العربي بالنغمة ولحد انهاردا انا الحاجات دي حافظها .. انهاردا نتيجة الثانوية العامة ..تانية ثانوي ..ونازل ادور عاللي هببته في الامتحان مع صاحبي.. عند سنترال كان بيشوف النتيجة ..اول مدخلت لقيت واحد جاب 65 .. انا قلت يالهوووووي ايه الرقم ده ..بقيت بقا كل شوية اسمع ارقام منيلة...رحت قايل لصاحبي تعالا بينا نمشي من هنا....مارضيش .. المهم .. جبت 91.7..والرقم ده الحمدلله اني جبته عشان انا لو كنت جبت 95 مثلا كان زماني رخيت مرخية سودة زي واحد كان مش صحبي اوي وكان زماني نزلت ل 85 ومافيش كلية محترمة ترضى بيا
...قلت للناس اللي حواليا اني جبت 85 عشان النق وكده...حتى قرايبي ...
تالتة كانت سنة سودة ومنيلة بنيلة ...سنة كآآآآآآآآآآآآآآآآآآآبة في حيات كل بيت ..مش حخوض فيها كتير كان كلها عدم ثقة في النفس وعدم مذاكرة واحساس بأستهتار ومش فاهم ومش عامل .. في الاخر الحمدلله دخلت كليتنا دي....بمعجزة..
وادينا عايشين لحد مانكتب سيرة العشرية الرابعة ان انكتبلنا عمر
في العشر سنين دول حياتي اتملت بحاجات على ذكر سبيس تون .. كان في برنامج اسمه كيف ترسم الكرتون .. علمني ازاي امسك قلم
وتعبيرات الوش والحاجات دي ..وبعدين بدأت في اي كارتون اثبت الصورة وارسم ..مرة على مرة ..بقيت رسمي اتحسن اوي ..
وبدات اعمل كراسات رسم كتير ولحد انهاردا عندي 7 كراسات رسم سكيتشات كبيرة اوي في الدولاب ..لاني دلوقتي للاسف مش برسم
بس الله اعلم .. جايز يجي اليوم اللي احتاجه فيها وارجعلها
المزيكا اتولدت قبل الرسم المزيكا اتولدت مع ولادة الدش ..عششت فيا بقا واديني دلوقتي اهه شغال فيها بعمل اغاني وكده ..
وحبي للمزيكا مش مجرد هواية حبي للمزيكا بعتبرة احتراف
زي قدري و داوود في الفوتوشوب
زي بيتر في الراينو
زي الملايكة اما تشوفها
... الموضوع مش مجرد سطحية بالتعامل مع المزيكا وشهرة والكلام ده .. لا لا لا فكسان
والناس باصة للمزيكا على انها....
.. ولا بلاش...خلينا سكتين احسن...اما الكتابة فاتولدت في تانية ثانوي ..قبل كده مكنتش بفكر اكتب حاجة .. على الرغم اني اول حاجة كتبتها خالص كان عندي 7 سنين
ولما فكرت اكتب .. كتبت وصيتي
بس وادينا بطلع حاجات اهه محطوطة في كتابي اللي بتمنى انه يخلص بقا ويطلع للنور ...واشوفله اي دور نشر تكون معاه
..التوزيع حكايته حكاية بس مش حقولها
ولا التلحين ..خليهم ليا
بس انا عندي الات موسيقية في البيت اورج وجيتار .. عمري مافكرت الاحتراف في عزفهم ...متهيألي ولا حفكر .. لانه ببساطة مش طموحي وانا مابحلمش بحاجة مش فيا ولا بتاعتي .. زي غيري
واعزروني لو سمعتوني بغني قبل كده .. بالنسبالي الغنا وسيلة وليست غاية .. انها بالنسبالي مش حاجة حلوة ..لاني منفسن من المطربين
علشان بياخدو اسمنا وتعبنا وبيتنسب ليهم .. وتيجي تسأل مين اللي ملحن اغنية وهي عاملة ايه دلوقت.. حيقولو عمرو دياب اللي ملحنها
على الرغم ان ده تعب عصام كاريكا...وانضف حاجة عملها كمان ..بس متسجلة بأسم زواق الوش
تورتة الشكولاتة اسمها تورتة شكولاتة علشان على وشها شكولاتة...وهي عاملة ايه دلوقت اسمها اغنية عمرو علشان عمرو اللي بغنيها
..هو مش ذنبه انما ذنب الناس
بس احنا طلعنا من الموضوع نتمنى .نسخة عشرية تالتة سعيدة واحلى من العشرية التانية ... ربنا كريم يا عبد الكريم
وحرجع اكمل العشرية التانية لما التالتة بأذن الله تعدي

بس خلاص

Ms3a_miso