Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Wednesday, July 13, 2011

صباع الخير

بعد الاشارة الرائعة .. من الصوابع الطخينة ..والزعيق العنيف ... والطريقة الصادمة التي تذكرني بأفلام الاكشن 
 ورفع الحواجب اسوة بفريد شوقي وهو صغير ايام ما كان شبه حرامية السيما ..
اثبتلي موقف اللواء الفنجري .. جملة ان مافيش حاجة بتفضل على حالها ..
والاحترام ما بيدومش .. فا الايد اللي سلمت سلام عسكري للثوار .. هي هي نفس الايد اللي طلع منها صباع الخير .. الذي سيطرح على   مسيرة مصر الملتوية سلوك طريق الى الهلاك 
مش عارف اسرد الموضوع ازاي بس حسيت فعلا جملة حزالئوم لما كان بيقول .. انا حبيت احط التاتش بتاعي .. وتاتش المصري بسم الله ما شاء الله .. تاتش وود وكله ورود
فالمصري اعيزائي القارئين .. اعطى البعد الثالث للزيجزاج .. واثبت ان له كتله وحجم وابعاد .. وبعد رابع وهو بعد الزمن 
كان صاروخ الثورة المصرية منطلقا ببنزين 90 وكان طالع لفوق .. من الواضح ان حد وقفه بعد ما انطلق ب 5 ثواني وشال البنزين .. وحط بداله ماية ساقعة 
بينما ارى صاروخ تونس محلقا في الافق .. اقله مش بيحصل عندهم زينا ..
شفت خبر تونسي بيقول عمل لجنة تأسيسية لعمل دستور قلت ياسلااااام هي دي الناس اللي بتفهم .. حيعملو الدستور اللي حينتخبو على اساسه .. وبدأو بالعقد اللي على ماية بيضة عشان اللي يخون بعد كده يبقى الحق عليه ويستاهل ضرب الدزمة 
بينما بلدي الحبيبة .. قام المجلس العسكري .. العلامة .. بعمل استفتاء .. تسبب في فتاء .. للقوى الشعبية 
وزاد الطين بلة .. لما اتبعه بأعلان دستوري .. طب استفتيت ليه لما انتا حتعمل اعلان دستوري ؟؟؟؟
ولا هو ودنك منين يا جحا ؟؟
 وزادت الهجايص يوم بعد يوم .. الى ان ظهر التهجيص الكبير .. وهو سبع البرومبة  العيسوي الذي انزل نعي بأن الشرطة .. وزارة الداخلية ..رضي الله عنها .. قد توفيت الى رحمة الله يوم 28 يناير  .. ده على اساس ان القناصة اللي كانو بينشنو على دماغ الناس وامن الدولة دول من الكائنات الفضائية او انهم تبع وزارة الري .. 
وعلى اساس ايضا ان ابويا هو من فتح الباب للسجناء 
وان السبب ان مافيش شرطة كافية  وعدم نزولهم .. بأوامر .. ده كان على سبيل قمصة الشرطة اللي المفروض اننا نطبطب عليها !!!!
ونقولها معلش يا بطة .. انزلي 
و جاء تعبير صارخ في اذني .. ان كانت ثورة يناير .. " كارنافال " وحيرح لحاله .. وحيرجع الوضع للاول .. وكان التصريح ده ضمن سياق كلام .. لحزبي وطني .. اوي
وما اراه .. ان لما الشباب كانو قايدين المظاهرات والثورة كانو ناجحين جدااااااااااا .. ولما مسكها  الكبار والكهول واصحاب التعليم المضمحل .. تحولت حنطور ..بيركب عليه كل واحد شوية .. لحد ما الحصان شحر او ...... لا بلاش

واراء الناس غريبة .. ولسان حال كل واحد .. كأن رأيه هو الوحيد اللي صح والباقي اللي غلط .. حتى انا .. وتعليقا " الناس الناس " انا مش عارف هي " الناس " عايزة ايه ؟؟؟؟ وكأن الناس دول هو مش منهم  او كأنه كائن تاني .. او حرام عليهم المطالب اللي بيقولوها  او التهديد والترهيب بالمقولة .. كفاية بقا .. ويكأنه لما حيقول كفاية ل2 او 3 الشعب المصري كله حيسكت او دي بمثابة اشارة انهااء الاعتصام لما عم حزومبول ده او ابلة الناظرة دول يقول كفاية بقا فيخر لهم الكلللللللل ساجدا ويقول ياااااااه كفاية بقا
....
او بكلمة اخرى تثير حفيظتي وهي كلمة فوقوا .... وكأن حبوب هلوسة القذافي الشعب كله بيتناولها معادا الشخص ده .. او ان الناس كلها مغيبة معادا هو النبي الوحيد ومن يرى الحقيقة بوضوح ويطلب من الجميع ان .. يفقواا

ويظل الاسفلت المصري ملتويا زي الزيجزاج .. وتحتار العربية .. يا ترى ده يمين ولا ده شملة.. 
وبدال مالصاروخ يمشي في الخط المستقيم .. بردو مصر ليها التاتش بتاعها ومابتحبش تقلد .. يا واد يا شخصية .. وعاملين صاروخ بيرقص وبيطلع بسرعة سالب 10 سم لكل اسبوع ... 



Post a Comment

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com