loop No1

Be5 3aleko de loopaya kont 3amelha wa ana btdarb 3la el tawzee3

72oo2 el tb3 ma7fouza

Ms3a_miso

mouhammed salah 3abdulmon3em Attiya

http://www.megaupload.com/?d=DVH4LT63

austria vs Brazil

كنت امبارح بفكر في موضوع يهمني ويخصني واستشرت فيه ربنا
فا فوجئت بحلم غريب الشكل والمنظر
واظاهر اني كنت مش متغطي كويس
ولا ايه كان مضمون هذا الحلم ما يلي حلمت خير اللهم اجعله خير ان قال ايه
....منتخب النمسا بيلاعب منتخب البرازيل
بس شتان بين النمسا بتاعت دلوقتي والبرازيل بتاعت دلوقتي
واللي انا حلمت بيهم
وكانت المباراة حامية الوطيس
وكانت النمسا بلبسها غير المعهود اللي انا شفته في الحلم
وهو التيشيرت الابيض وفيه خطوط سودة مقلمة بأبيض على الكتف والشورت الاسود (مع انها بتلبس دلوقتي احمر
وكانت البرازيل ترتدي الفنلة الصفراء المشهورة
والشورت الابيض
عادتا المباراة بتبتدي من اولها انما في الحلم بتاعي ابتدت من نصها
وابتدت من شوطة من لاعب من النمسا وكانت شوطة صاروخية
وشالها لاعب من البرازيل بغرابة
والكاميرا كانت ورا الجول ومش مركزة عالكورة
و مع ان بدالي ان الكورة اتشالت من اللاعب البرازيلي
الا ان الجول دخل واتحسب للنمسا بصعوبة كبيرة اوي
بس كانت النمسا في المباراة دي رمز القوة
والبرازيل رمز الضعف
وبعد كده حصل تغيير في منتخب البرازيل وفي التبديل نزل لاعب....تخين(سمين
؟؟؟؟؟؟؟؟؟؟؟؟؟؟ هما المدربين اتعمو ولا ايه
وكان اللاعب التخين ده تخين جدا
ومش قادر يجري
وهو بيجري وقع في الارض على ركبته واديه الاتنين على الارض
راح لاعب النمسا احتفالا بالهدف راح راكب على لاعب البرازيل كأنه راكب على حصان
وصحيت من النوم!!!!!
بس هو انا ايه اللي خلاني احلم بالنمسا بالزات
وليه مش مصر مثلا
على اساس ان الامم الافريقية شغالة
وازاي النمسا اصلا تغلب البرازيل ده البرازيل تقطع النمسا
طب هو في لاعب كورة قدم تخين
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وان كان كده يبقا مدرب البرازيل ينزله وهو مغلوب؟؟؟؟
ازاي ينزل لاعب قليل الحيلة وهو مغلوب
ونتيجة لكدة اتركب واتعمل حصان
حد عنده تفسير؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
علما بأني ماليش علاقة بالكورة

طارق دياب و عبد الناصر

من كام يوم كده واكيد كل مصري عارف الموضوع ده
استاز طارق دياب كان بيتكلم بعد فوز مصر على نيجيريا
كان نادر السيد بيتكلم بعد الماتش عادي مواطن فرحان بفوز بلده (ولو حتى كان واحد من بلاد الهمولولو كان حيقول كده ) قال
مبروك لمصر والشعب العربي كله بفوز مصر
طارق دياب سمع الكلمة دي زعل وراح قايل لنادر السيد
لا تتحدث على العروبة انتا ليك مصر بس انتا تتكلم عن مصر عن اوروبا مالكش دعوة بالعرب
وكابتن نادر السيد بأخلاق الفرسان كان بيتكلم راح قايله
اكيد كل تونسي فرحان ان مصر كسبت
راح قايله بردو اتكلم على مصر بس
المباراة اللي بعدها
نادر السيد بعد ما الناس قالوله انتا سكتله ليه
راح قايل على قناة الجزيرة ان الناس في مصر زعلانة من كابتن طارق دياب
فا طارق دياب اتحرج وراح قايل الحقيقة اللي هي مالهاش علاقة بالكورة
وهي كما يلي
"اي عروبة العروبة انتهت بموت عبد الناصر (اللي هو من سنة 1956 ....ونحن الان في عام 2010 فارق حاجة و60 سنة...يعني فارق جيلين من الناس) ما علينا
الكثير من الناس يكرهون مصر ولا اقول كلهم
لنراجع اعمال عبد الناصر الذي يعشقه العرب الذين يكرهون مصر
1- قام عبد الناصر بعد دخول اليهود الى ارض فلسطين ببعث قوات مصرية تدافع عن فلسطين (وترك مصر ضعيفة بدون جنود) دي واحدة
2- قام ببعث قوات لتجاهد في اليمن عند حدوث الثورة (وكان ذلك في وقت قريبا من الاولى وترك مصر ضعيفة) دي تانية
3- بعت قوات للجزائر لتشارك في تحريرها من فرنسا (وترك مصر اضعف واضعف) دي تالتة
وكان سبب في دة قلة اموال مصر وبندور نشحت في الشوارع ولان الحاكم ينظر للخارج ولا ينظر للداخر
انتشر وتفحش الفساد في مصر (وكلكم تسمعو عن افلام مصر في الوقت اللي بعده منها احنا بتوع الاتوبيس والكرنك وغيرها) من الحاجات اللي كانت بتجسد الفساد في الوقت ده
ونتيجة لكده حس عبد الناصر بغلطته وقرر يحاول يخلي مصر احسن
4- قام بتأميم قناة السويس عشان تجيبلنا فلوس وتقطع الفلوس عن اوربا اللي كانت محتلانا في شركاتنا
5- بناء السد العالي
واللي بسببه اتجمع العدوان الثلاثي على مصر وكأنهم وصايا علينا مع ان النيل مش بيعدي في ارضهم ولا بيديهم من خيره
ومع ذلك حاربناهم
6 - اتحدنا مع سوريا وحاربنا اسرائيل في الجولان
7 -عشان كنا مفككين جت اسرائيل واحتلت سينا اللي هيا في ارضنا
وجت النكسة(اللي هي في عهد عبد الناصر) اللي هو بيحبه العرب
فمااااااااااااااااااااااتت مصر
وماتت العروبة ....على رأي طارق دياب
بس عارفين لولا موت عبد الناصر لما حل الخير
جاء رجل لا ينهزم ...احسن من عبد الناصر مليون مرة
جه مسك الحكم فجأة وقال لشعب مصر
ادعولي وساعدوني
احنا داخلين على ايام صعبة
اول ما مسك بدأ منسوب اقتصاد مصر يبدأ بالتصاعد
(لانه رجل خير) والله كان عظيم
كان لاغي من دماغة ان ما اخذ بالقوة لا يسترد الا بالقوة

لانه اوجد قانون جديد
وهو "ما اخذ بالقوة لا يسترد بغير الحكمة" وكان بيكلم اسرائيل
وحاربهم وانتصر بشكل يشرف كل العرب ورجعت مصر وكل شبر فيها
وبعد ما خلص مصر قال كفايانا حروب احنا تعبنا
يلا بينا نعمل معاهدة سلام
اعتبر العرب المعاهدة دي يعني اتفاق من مصر مع اسرائيل( مع اننا بنكره اسرائيل اكتر من كرهنا للشيطان ) نفسه
بس محطوش في دماغهم ان الرسول عليه الصلاة والسلام كان بيعمل معاهدات سلام مع اليهود على الرغم انهم حاولو يقتلوه
معنى كده ايه؟؟؟؟؟؟؟؟ ان الرسول كان خاين؟؟؟؟؟؟؟؟؟؟
لا معنى كده ان الرسول كان حكيم
عارف ايه عنده وايه مش عنده
حيحارب امتى ويسلم امتى
امتى يشد الحبل وامتى يرخيه
نظرة العرب اللي مابيحبوش مصر لمصر ...انها واجب عليها ان تحارب لتدافع عن جيرانها (مع انها ممكن تقول زي الباقي وانا مالي) وحتفضل البلاد مش متحررة بردو
ولازم احنا اللي نكون السيف ونكون فينا اكتر ناس بنتقتل حتى نرضي العرب الذين يكرهون مصر
ولكن دعو الزرع يطرح حتى لا يموت البستان
فأذا قطفت كل الورود
فتصبح صحراءا جرداء
سبحان الله على الرغم ان العرب معاهم فلوس كتير
يضيعونها في المعمار وشراء اللاعبين للدوري المحلي
بدلا من وضعها لتحرير ارض العرب
وبعد ذلك يلومون مصر
اما العرب الذين يحبون مصر
فلهم كل التقدير مني مووووووووووووووووووووواه (بوسة مني ليكم)
Ms3a_miso

خط استمرارها

دوم ..تا تك دوم..تاتك

قلبي يدقدق داخل خندق نابض داخله كتلة دم

عصر القوة عدى اوانه ومافيش هوا من كتر الشم

قلبي ضعيف ويا قلة حيلته لو بأديا كنت قتلته

علشان يخلص من تسميمه

في زمني هوانا بان تجسيمه

بعد مكان رمز الشفافية سوّد فرق بياض الفم

اممممممم ...اه

اصل القصبة شايفة الذل...شايلة ورافعة كل التقل

اما عصيرها بان لمصيرها وملو الشوب ده نخب الغلب

غلب مسنة شايلة اكياسها..بعد مالمت كل خضارها

وبعد ما مات خط استمرارها...عرفت ان الغلب ده صعب

نفّخ عفّر...احرق كفّر

رطب قلبك بسيجارتين...ولع واحرق في البساتين

والله اخرك في البساتين ...وترابك مغروس في الطين

علشان انتا هجرت نصايحك.. وخليت نفسك مالضالين

شكلك عامل ايه دلوقتي بعد ماقتلك النيكوتين

عندك نفعك؟؟؟ بعد ماوجعك؟؟؟

قلبك فارش ريشه وطار وسابق اسرع هوا تيار

حالف الف يمين ماهو راجع بعد ما حل كل دمار

عايزه يرجع يبقا تصالحه

وتحققله كل مصلحه

تسيبه في بيته وعزه وماله

تسيبه يفرح برزق عياله

وان مرت سجارة على باله

زمرله وفكره بدمارها

وتقطع صوت خط استمرارها

Ms3a_miso

يا شر اشتر

اختياري للاسم ده للموضوع ...مش عشان سرد وانما لملأ عقدة عندي من حرف الره :S

اللي انا الدغ فيها ولاني مش بعرف اقوله واللي غالبا بيطلع كده(يا شو اشتو)...ايه مستكترين عليا اكتبه

معروف عندنا ان الشر وحش

ومفهوم الشر طبعا في الافلام القديمة مش هو اللي انا اقصده

لان الشر في الافلام القديمة كان بيخلي الواحد يضحك لانه في الغالب بيتجسد في حرامية السيما او في الشخصية اللي في فيلم سمارة

اللي هما عندهم حاجب مرفوع وحاجب لأ وواخدين بشلة في وشهم وشكلهم عجر ومش بيضحكو ابدا

بينما كان مفهومهم عن البوليس هو الشاويش عطية

واختيار الشاويش عطية كا بوليس اختيار تحفة لان واحد لازم يخوف الحرامية اللي هما في الغالب حرامية السيما لازم يكون

حرامي سيما اكتر منهم

المهم نرجع لمرجوعنا

الشر موجود في كل وقت والغريبة ان نفس الشر ده ممكن يطلع من اشخاص طيبة جدا بقصد او منغير قصد

والشخص الطيب ممكن يكون مخلط مابين كده كده ابيض واسود زي تكس القاهرة

ممكن الواحد يساهم في حادثة ويعمل فعل سئ جدا بس يكون ربنا هو اللي محركه عشان يعمل كده لسبب من الاتنين يا اما يكون ابتلاء

وربنا عايز شوفه حيعمل ايه

او يكون الشئ السئ ده سبب لاتنين عشان يتجوزو على سبيل المثال

وبعد مايفوق بعد مدة حيقول لنفسه هو انا عملت كده ازاي وازاي انا كنت ببص لواحدة زي دي

مع انها ممكن ماتكونش فتاة احلامه لانها ممكن تكون ببساطة شكلها مايعجبهوش او وحش

وساعتها حيحمد ربنا انه اطلطش في عقله وعمل كده عشان تكون مش من نصيبه

مثال تاني

كان من فترة عندي في البيت كانو بيتكلمو ازاي الناس كانت زمان طيبة مش زي دلوقتي

تحت رعاية حملة الكبار " قول للزمان ارجع يا زمان" اللي بيتحايلو عليه بقالهم 200 انه يرجع وهو مش سائل فيهم

لانه عارف انهم ناس بكاشة وانه لو رجع كانو حيعملو نفس اللي هما عملوه لانه عشان يرجع هما لازم يصغرو ومافيش حد عنده 20 سنه يبقا عنده احترافية وخبرات 100 في ال100

نرجع لمرجوعنا تاني

كانو بيقولو ازاي الناس دلوقتي بقت وحشة وكده وقال موقف دلوقتي حصل وهو ان واحد راجل كبير شوية متجوز واحدة والراجل ده كان عامل عملية القلب المفتوح وعنده حاجات بايظة في قلبه وكده يعني والدكتور محرج عليه الزعل

واكمن مراته ست بت تيت ماصدقت فضلت تنكد عليه لحد ما شغطه اترفع والتعب زاد عليه

وماكتفتش بكده لا دي طردتة من الشقة بتاعته وقالتله روح اقعد عند اهلك خليهم يراعوك

وعشان الراجل ده طيب ومش بتاع مشاكل سابلها البيت ومشي

ولما الحالة اتدهورت بيه ومات مراته محضرتش العزا ..... لا تعليق

وكل ده عشان تاخد البشقة وحاجاته اللي في البيت بالبلطجة

وعلى الرغم اني معرفش مين الراجل ده انما صعب عليا

ومش فاهم ازاي انسانة متعلمة ومثقفة تعمل كده فيه

تحت اي بند من الرحمة والشفقة

وعلى النقيض ... في واحد في البيت اللي قدامنا مراته عندها شلل في رجليها وكان الراجل ده على طول بيصرف عليها وبيوديها جلسات علاج طبيعي وكده ...كتر خيره

بس على الماشي انا مش موافق على موضوع ان زمان لازم يكون هو الحلو والجديد هو اللي وحش

لان زي ما دلوقتي بيسرقو مجوهرات وفلوس

زمان كانو بيسرقو فراخ الوالي

والسرقة مابتتجزأش مهما الختلفت المادة

دلوقتي الناس بيتموت في القطر

زمان كانو الناس بيموت تحت ترماي شبرا

زمان كانت الوسيله البسكلتات دلوقتي العربيات

الحالة مابتختلفش انما الاداة هي اللي بتطور

في موقف كمان على الشر ده عايز احكيهولكم....

كنت في يوم خارج من بيتنا زي كل يوم ....عادي

اجزاء من اللي بتحصل من يومي بتيجي في خيالي وانا بقفل باب الشارع...عادي

بس كان اللي بيجيلي المرادي كان بيقوللي سواق مشروع و جنيه وربع ونازل مالمشروع وانا مكشر..مش عادي

فا رحت قافل الباب...

وطالع اركب من عالبحر

وبوقف مشروع... وبشاور وبركب(ويارتني ما ركبت) المهم

بديله جنيه على اساس اني رايح سان ستيفانو...

فا لقيته بيقوللي جنيه وربع

رحت قايله ماشي وطلعت 5 جنيه عشان مكنش معايا فكة

ورحت قايله بس على فكره هي بجني مش جني وربع

راح قايلي لاهي بجني وربع

رحت قايله انا يافندم كل يوم بركب بجني...

لقيته بيرد عليا بتناحة وبأبتسامة غلسة لا انا كمان دي سكتي كل يوم وبجني وربع

المهم اني كنت بقول على الناس اللي بتتعارك على ربع جني في المشروع دول ناس هيفا ونانسي وروبي

المهم كلمة مني على كلمة مني رمينا لبعض الفلوس في وش بعض وقاللي انزل رحت نازل

ورازع الباب ...طراااااااااااااخ..مؤثرات صوتية

راح نازللي وعايز يضربني ....لقيت دولاب طويل عريض

نازل عليا

وبيقول الواد ده قليل الادب ولازم يتضرب

وانا واقفله بقا كده ..ماهو انتو عارفنني لا بهش ولا بنش

وماليش في الخناق بتاع الصيع ده اصلا

المهم ولاد الحلال اللي كانو وقفين جنبنا جم وحاشوه عني...

:D

:D

:D

الحمدلله انهم خدوه دا كان عمارة سبع تدوار واقفة قدامي

انا افتكر الجملة الوحيدة اللي قلتهاله في المشروع وانا في وعيي

انا على طول وانا راجع بركب بجني على طووووووول(ولما بروح 95 % بدفع جني) ورحت قايله

انهي بلد دي اللي بروح فيها بجني وربع وبرجع بجني

على اساس ان الطريق نقص حتة يعني

المهم انا استفدت من الحكاية دي حاجات كتير

اولا لما تقابل بلطجي اديله كل اللي في جيبك

ثانيا كبر دماغك وهجص تعيش يابو الريش

تالت حاجة كان المفروض اطلع الموبايل واعمل نفسي بتكلم واقول الو سيادتك اديني العقيد عباس ابن فرناس حتى لو ليك قريب سيكيورتي ولا حتى عسكري نفر

وشوية واقول الو ايوا يا عمي واحكي الحكاية واقول نمرة الميكروباص وشوية واشخط في السواق واقوله بطاقتك يلا

وحبة شتايم من المتنقية وفي الاخر حكون انا الكسبان على الاقل معنويا وهو من نفسه حيجي يقول سامحني يا باشا

انا الغلطان وحيوصلك على حسابه

:D

انا بهزر على فكرة اوعة حد يعمل كده

:D

Ms3a_miso

احلامي واحلامي

ممكن يكون طموحي كبير والكل شايف اني طموح اوي اوي وممكن يكون في ناس جواها بتقول هو (مسعا) بيفكر في ايه
ياااااااااااه دي كلمة كبيرة اوي ...بفكر في ايه
احلامي ممكن تكون تتعد على الصوابع بس في داخلها كلها مصاعب ممكن مايقدرش واحد يجمعها كلها مع بعض
وانا صغير (فلاش باك والدنيا رمادي ) امي كانت بتقوللي " انا حاسة انك حتكون حاجة كبيرة اوي " ياااااااااه الكلمة دي ممكن تكون الحاجة الوحيدة اللي فاكرها من طفولتي من وانا عندي 5 او 6 سنين تقريبا بخلاف التلت صفعات اللي تلقاها خدي في حياتي
هي دي طفولتي صحاب وجملة وتلت اقلام
ويمكن لو فكرت امي بالجملة دي حتقعد تضحك لانها هي كمان فاكرها اوي
ولما سألتها قبل كده " ماما انتي قلتيلي الجملة دي ليه؟؟؟؟" راحت قايلالي " محمد انتا كنت زمان وانتا صغير بتعمل من حاجات صغيرة ممكن تكون ملهاش دعوة باللعب اصلا حاجات ممكن يتلعب بيها ... قلتلها وده يعني ايه راحت قايلالي كنت مبتكر
مش عارف لحد النهاردا الجملة دي محفورة في نفوخي معرفش ليه مع ان ممكن واحد تاني لو اتقالتله يا اما مايفهمهاش يا اما مايفتكرهاش يا اما ينفضلها اصلا
جايز في طفولتي ممكن اكون كنت باخد حاجات اعمل بيها لعبي او بتخيل اني بكلم حد وبمثل معاه مثلا واحدة اتقتلت وانا كنت بدافع عنها لحد ماتتقتل ولحظة اما تتقتل اقعد اعيط مثلا " مش عارف كنت عيل مجنون" يمكن جايز كان نفسي اكون ممثل وانا صغير ممكن اكون اكتر طفل اتفرج على افلام وهو صغير اكمن كانو ابويا وامي كان شغلهم بعيد عن بيتي وده خلاهم يودوني مدرسة قريبة من شغلهم
وكنت لما اروح من المدرسة كنت بقعد عند ستي لحد الساعة اربعة تقريبا او خمسة كل يوم يعني كنت بقعد عندها اكتر ما بقعد مع ابويا وامي
او بالاحرى كنت بقعد مع التلفزيون اكتر ما بقعد مع ابويا او امي وستي كمان
بس اللي خلاني اتخلى عن الحلم ده اني الدغ....للاسف ودي حاجة مسببالي مشكلة لحد انهاردا
وانا في خامسة ابتدائي ابن خالتي احمد كان جايب اورج جديد غير اللي كان عنده لان القديم كان صغير اوي اوي 2.5 اكتاف فا لما جاب ال5 اوكتاف اداني الاورج الصغير ومن هنا بدأت اتجه بنظري للمزيكا واشوفها حاجة حلوة
فا حاولت مع نفسي شوية بس كنت مش عارف اتحرك
فا راحت امي جايبالي مدرسة المزيكا الي معاها في المدرسة ميس هند ودي كانت مزة جامدة جدا ويمكن هي اللي اتطبعت في مخيلتي لحد انهاردا انها تكون فتاة احلامي المهم علمتني حوالي سنة الا شوية وبعدين اتجوزت وسافرت دبي
بس انا كنت ساعتها بعافر في العزف
فا كملت مع نفسي في محاولة لتجميع معلومات كتير في المزيكا واني اجيب اي نوتة تقع عيني عليها او اسمع اي اغنية واعزفها وبقيت بجمع كتب مزيكا وهكذا
بس عمري ما كان حلمي اني اكون عازف بارع يعني او اني اطلع على مسرح واعزف على الرغم انها حاجة بتشدني اوي وساعات بسأل نفسي حتعمل ايه لو انتا فوق بتعزف على المسرح !!!!
الحاجة اللي بعديها اللي عملتها لما كنت في اولى اعدادي كنا ركبنا الدش ايام ما كان الدش له قيمة وكان في قناة سبيس تون وطبعا كأي طفل عنده حرمان طفولة من التليفزيون المصري فا كنت بقعد طول النهار على القناة فا كنت بسأل نفسي هي شخصيات الكرتون دي بتترسم ازاي؟؟؟؟ ومن هنا قررت اني اجيب كراسة رسم وارسم فا كنت بثبت الصورة وبفضل ارسم لحد ما قدرت اطوع ايدي كويس
بس الموضوع ده مافضلش معايا كتير هما سنتين ونص بالظبط وبعدين الاعدادية اكلتني وكان ضغط اللي حواليا بقا لازم تجيب مجموع كويس فا العادة دي بدأت تسحب ايدها مني واحدة واحدة لحد ما بطلت ارسم
وقعدت لحد صيف تانية ثانوي مش بعمل حاجة في حياتي غير اني بعزف وقليل جدا كمان
وكانت اول محاولة ليا اني اكتب اغنية فا كتبت حاجة كده كانت رديئة جدا في المعاني
بس كانت موزونة تمام الوزن اهم حاجة كانت بالنسبالي فا كتبت اللي بعدها واللي بعدها وفضلت اكتب لحد انهاردا
وبعدين معرفتي بالمزيكا خلتني احاول الحن ولحنت فعلا حاجات قوية وبمقامات مختلفة ولسة بلحن لحد انهاردا
وعرفتي بالمزيكا بردو مع التأليف الموسيقي والتلحين والكمبيوتر ساعدتني على التوزيع ولسة بعمل كدة لحد انهاردا

يمكن طولت في الموضوع شوية في سرد الماضي بس الموضوع بدأ من هنا:
نفسي جدا اكون الملحن رقم واحد في الوطن العربي
نفسي اكون احسن شاعر غنائي في مصر
نفسي ابقا احسن موزع موسيقي في العالم ( يمكن دي واسعة شوية)
نفسي اكون صحفي او بمعنى اصح كاتب ساخرلدرجة اني بجهز طول مانا عايش او على قد ما اكبر لكتاب محتفظ بأسمه لنفسي
نفسي اكون معماري شاطر
نفسي ابقا مدرس جرافيك ومطلوب عالميا
نفسي اكون مخرج سينمائي على الرغم اني ماسعيتش ليها خااااااااالص بس عندي احساس اني لو اتحطيت في المجال ده حسد
للاسف نفسي ابقا ممثل (على الرغم من اللدغة بردو)
كان نفسي يكون صوتي حلو (ده مايمنعش اني صوتي يجي منه يعني ) على الرغم من اللدغة بردو :D
نفسي اتجوز واحدة طيبة تخاف عليا وتحبني تكون جنبي واكون جنبها
نفسي اخلف طفل قبل ما يشيل اسمي اسمه يتشال من قبلي واشوفه احسن واحد في الدنيا
نفسي ربنا سبحانه وتعالا يكون راضي عني وابويا وامي يفتخرو بيا
نفسي اكون جريئ ومخافش
نفسي اثق في نفسي
نفسي ماتذلش قدام حد نفسي افضل قوي
نفسي بعد ما اموت الناس تفتكرني
نفسي اشوف الانبيا كلهم
نفسي اشوف ربنا سبحانه وتعالا
بعد كده مايهمنيش ادخل جنة او نار

شفتو انا قنوع ازاي :D:D

الجن الياباني

جالي الاسم كده في لحظة صفا بعد ما شفت في اليوتيوب فيديو عن اليابان والغريبة انه فيديو كان عن العمارة في العالم وتطورها وده عشان شفت ازاي شفت ان اللوحات المضيئة في الشوارع والاماكن العامة بتنور حياتهم اكتر من لمض الشارع....
اليابان بدأت تطورها من اول ما الامريكان ولاد الامريكان ما ضربو هيروشيما ونكازاكي واللي سببها مات الكتير وحصل تشوهات في الاجنة لمدة سنين طويلة
واللي حصل في الحادثة دي ان طيار امريكاني كان رايح في مهمة لليابان والظباط بتوعه قالوله ارمي الحاجات اللي معاك دي واجري.. واكمن السواق كان طيب ومايعرفش ان اللي معاه ده نووي حيموت بيه ناس اللي حصل ان الطيار ده لما شاف اللي حصل لليابان ...اتجنن
ومن هنا بدأ (ين) يتحول الى (جن) ....في كل حاجة اقتصاد وعلم وفنون ودولة وقوى عالمية ..وعلى الرغم من اللي عملته فيهم امريكا
الا انهم دلوقتي بيموتو في حاجة اسمها امريكا وبيدوبو في تراب امريكا .. لدرجة ان في ناس من امريكا لما شافو حب اليابانيين ليهم بدأو يعلمو الياباني في الجامعات
البلد دي اثبتت بشكل قوي اوي اوي
ان القوة مش بالامكانيات زي ما البشوات اللي عندنا ما بيقولو .لان اليابان بدأت من لا شئ من حبة تراب واجنة مشوهين الى عمالقة اسيا وقريبا رواد العالم
مين كان يصدق ان الراجل القصير ابو عنين ضيقه ده ممكن يسود العالم ....بالعلم ....اليابان اولا عبارة عن حبة جزر الناس قالو يلا بينا ننضم على بعض ونعمل دولة وكلنا نعرف الياباني بانه الراجل القصير ابو عنين ضيقة وبيوت هرمية منحنية الشكل من فوق ( ده قبل العمليه) انما بعد العملية اليابان ام ناطحات سحاب محلقة في الفضاء الوردي ...متهيألي المباني دي من علوها هي اللي خرمت الاوزون

لو عملنا رصد لحالة الياباني قبل وبعد
في العمل ...قبل الحادثة كان بيشتغل شغلانتين والباقي تحصيل حاصل يا اما كان شغال في صيد السمك ودي المهنة الرئيسية والمهنة اللي بعد كده هي زراعة الارز ...............دلوقتي بقا الياباني وبلا فخر من اعظم رجال اعمال في العالم واحد من احسن المصممين المعماريين ياباني وهو تاداو اندرو والشغل في البنوك والاستثمار ورسم الكارتون والجرافيك وصناعة الكمبيوتر والمواد السلكية واللاسلكية والتفوق الالكتروني حتى على امريكا اللي هما كانو بيضربوهم وفرحانيين ان اليابانيين دول خوبوءات
ده لدرجة الكارتون هما اللي مسيطرين عليه منذ طفولتي المشردة المحقق كونان وابطال الديجيتال وبوكيمون من ايام ما كنت مسخوط في رابعة ابتدائي
والعقدة دي تأصلت حتى في جيل التمانينات حيث الانتقال من عصر ماما نجوة وبقلظ وبرنامج عروستي الى عصر مازنجر وجرندايزر

وكله بقا الا العربيات اللي مالية الشوارع بجميع انواعها . واحنا لغاية انهاردا متمسكين بالحنطور وبنقول عليه تراث .. انا نفسي نتخلص من الكلمة دي الحاجة مهما قدمت وحافظت عليها حتعمل بيها ايه دي وصلت عندنا لحد المرض النفسي فعلا
زي الناس اللي مش بيتخلصو من الحاجة زي الراجل اللي مش بيتخلص من علبة السجاير بعد ما بيخلصها وعنده اوضة مليانة كراكيب
لانه خايف يفرط في حاجة
وده لان في اعتقادنا ان الفراعنة لما جم عملو تاريخ يجب علينا احنا الاحتفاظ بيه فا لازم احنا في حضارتنا المعاصرة الاحتفاظ بحاجاتنا عشان تقعد للجيل اللي بعدنا
مبدأيا الفراعنة مكانوش بيفكرو في كده هما كان بيفكرو في الحاجة على اساس انهم كده كده ميتين ميتين خلاص يبقا اعمل لدنياك كأنك تعيش ابدا واعمل لاخرتك كأنك تموت غدا .. وبعدين الفراعنة مكنش عندهم حد يقلدوه زي ماحنا بنحاول نقلدهم

انا ليا واحد صحبي كان على طول عالام اس ان على طول حاطط صور فراعنة وكان منبهر بيهم ابهار اعجاز
لما شاف الناس اللي برة بيفكرو ازاي في كل فتفوتة نسي حاجة اسمها فراعنة وبطل يتكلم عنهم اصلا لان فعلا ماينفعش حد يمشي وهو باصص وراه .. اكيد حتخبطه عربية معمولة في اليابان
لان التاريخ فعلا عشان نتعظ منه ونعرف راسنا من رجلينا مش عشان نقلده
وكل يوم بيتثبتلنا ان احنا متخلفين جدا ... لما ناس الفراعنة اللي هما من سبع تلاف سنة كانو متقدمين عنهم مش مكسوفين من نفسنا واحنا متذيلين الترتيب الآدمي في القرن الواحد والعشرين الميلادي
!!!!!!

Ms3a_miso