Pages

ماتقربش من حاجاتي لاتروح ورا الشمس وحلسوعك

ماتقربش من حاجاتي لاتروح ورا الشمس وحلسوعك

Saturday, November 19, 2011

ماما امريكا

تحليلي الشخصي لل 60 سنة اللي فاتت من عمر البلد
وبعد الغدر ب محمد نجيب واللي ناس كتير اوي ماتعرفهوش وممكن مايكونوش سمعو عنه اصلا 
مع انه لو كان حكم مصر كان تاريخ مصر اتغير 180 درجة 
.....
كان ياما كان .. كان في انقلاب عسكري حصل علي الانقلاب العسكري اللي عمله محمد نجيب واعوانه 
وهذا الانقلاب على الانقلاب قام به محبوب اغلب الجماهير .. جمال عبد الناصر ..
ومجلس قيادة الانقلاب .. عبد الحكيم عامر .. والسادات .. وغيره كتير 
وحكم عبد الناصر .. الديكتاتور الاشتراكي ..
وكان من قراراته ترقية عبد الحكيم عامر وتنطيطه على كل الاقدمية وتوليه الجيش 
وتحول المسار الاقتصادي من مصر من البارد الى الساخن مرة واحدة .. التحول المباشر من رأس المالية المفرطة الى الاشتراكية الغامقة
كان في الوقت ده الروس كانو في الرمق الاخير 
وكان عبد الناصر مناصر ليهم .. وده اللي اغضب ماما امريكا 
عبد الناصر كان واقف مع الحلقة الاضعف ..وعشان كده مسلكش
التطور الطبيعي للامبراطورية الناصرية هي التقدم بشدددددددددة 
عبد الناصر هو فعلا اول واحد وانا اشهدله بكده اسس نظريات الشركات في مصر 
شركات في كل حاجة 
نسيج وبترول ومقاولات وكل حاجة 
وكانت بالفعل الشركات دي بتدي انتاج رهيب فوق الوصف 
بس للاسف .. عبد الناصر عمل غلطة 
وهي خلى الكل سواسية 
فا الكل فقير .. ومافيش اغنيا .. وبالتالي مافيش فلوس.. فامحدش حيشتري ..
فا تترطرط البضاعة في المخازن ..نعمل فيها ايه نعمل فيها ايه ... طب ما فكرة .. مانصدرها بره 
ها ها ها ها 
عندك يا حلو .. مش انتا اشتراكي .. ضد اسرائيل وامريكا وتبع روسيا 
آدي دقني لو حد اشترى منك حاجة 
ودي كانت احدى الضربات لعبد الناصر ..مع ان الراجل ده عمل اول عربية مصرية .. حاجة احنا مابنعملهاش دلوقتي 
ومع سياسيات عبد الناصر المشتتة على العرب .. وعدم الالتفات لمصر .. بالاضافة للظلم والاعتقالات للمعارضين 
سقطت الامبراطورية العربية قبل ان تنشأ 
وجاء من بعده السادات ليتحمل الهزيمة ..
وكان الناس بيضحكو عليه .. ويستهزأو بيه قبل 73 
وكان بيكتم على الموضوع .. حنحارب .. مش حنحارب .. لغاية ما ضرب فجأة 
و اتحقق النصر 
وساعتها قلب السادات الطرابيزة .. ومديلهم ايده .. مش خيانة .. لكن ذكاء .. عارف انه حيحصله زي عبد الناصر 
عشان كده قرر بدال ما امريكا تنغص عليه عيشته .. وتعتبره عدو هو يقنعها انها صديقة .. وان دولته بقت رأس مالية
وعمل ما يسمى بالانفتاح .. كان ايه معالمه الله اعلم .. بس المهم يقنعهم انه رأس مالي 
واستمر . .. واستمر .. لحد الاغتيال 
وجه مصيبتنا الكبيرة 
اللي قرر يكمل طريق السادات في التعالم مع امريكا كحليف .. وصديق ..وبناءا عليه ارتفع مستوى معيشتنا شوية ..
عشان صاحب العو .. واللي يصاحب العو .. لازم يشوف في الضلمة ضو 
وضاعت اسباب تقدم عبد الناصر .. حتى شركاته اتباعت او اتقفلت او اتخصخصت 
الخصخصة دي كانت اكبر ضربة للاقتصاد اصلا
وتحولنا من دولة منتجة بتعرج .. لدولة مستهلكة بتريل .. او دولة مدمنة .. مستنية الجرعة اللي بتفوقها
..............................................
اتسائل 
مين من بين الرؤساء القادمين حيطبق ايه وليه 
انا شخصيا شايف البعض بطريقة .. قد تكون مش فيهم .. او فيهم  .. بس ده رأيي
حبدأ بالابجدية : اولا احمد شفيق 
بعد ما قرر يرشح نفسه .. معرفتش غير اننا على وشك سياسة متتالية او متكررة لسياسة مبارك والسادات .. في تباعة امريكا .. دون انتاج او ان تصبح دولة رائدة .. متهيألي انها حتكون امتداد لسياسة يالا ومشيها .. والعودة لايام الوزير البيه 
...............
ثانيا العوا .. العوا قد يكون مصلح .. بس مش بالقدر الكافي خاااااااااااالص ..حيكون واخد موقف الحياد .. منها خلقنا واليها نعود .. لحد مايخلص فترته ويمشي 
ثالثا حازم صلاح ابو اسماعيل .. لو اتكلمنا عنه بموضوعة ومع سياسة السلفية .. بالنظر للسعودية ... السعودية حليفة لامريكا جدااااااااااااااااااااااااااااااااااااااا فلوسها كلها امريكاني .. فا بالتالي مش امريكا اللي تقف ضد حازم صلاح ...بالعكس دي حتأيده .. الا .. لو اتك على سر الغضب .. اسرائيل .. 
قد يكون حازم مصلح .. انا على يقين انه حيصلح مفاهيم متشقلبة عندنا .. بس حيفرض علينا بردو مفاهيم متشقلبة عن السلفية 
يعني متهيألي حبة على حبة حيكون الحاكم مدى الحياة.. ومافيش احزاب .. وممكن يكون مافيش انتخابات مع التطور ده .. اصلا حننتخب مين ماهو مافيش احزاب .. غير كده اكبر كارثة في الدنيا .. الخروج عن الحاكم وحنرجع تاني لسياسة الخوارج وممنوع الاعتراض .. وحيستخدم الحد في تطبيق شرع الله .. مع الحد من وجود معارضين بردو ..قد يكون كل الكلام ده مش في عصر حازم .. بس حيكون هو البداية لظهور الكلام ده فيما بعده 
كان محمد علي كويس ... بس فاروق من احفاده 
رابعا : عبد المنعم ابو الفتوح : وجهة نظري انه الاحق .. على الرغم انه غير محب للتدليل على نفسه والشهرة والاضواء وعلى الرغم من كده انا مش بفكر انتخبه مع اني حابه جدا ..
عبد المنعم ابو الفتوح زي عبد الناصر .. ومش زي عبد الناصر محب للتملك والادارة .. حابب يكون هو الكلمة لاولى والاخيرة .. وهو يستحق .. بس مش ده اللي محتاجينه دلوقتي .. انا منتظره في الفترة الثالثة للرئاسة 
خامسا عمرو موسى ... الكلمة الوحيدة اللي قالها عدله انه عايز مصر فيدرالية عشان الادارة اللامركزية .. غير كده خد منه الجملة دي  وحطه جنب الحيط اشتراكي وناصري بالاسم فقط قائل وليس فاعل 
سادسا .. واخيرا محمد البرادعي .. متهيألي انه حيكون حليف لامريكا تماما ..بس المختلف عن حازم صلاح ابو اسماعيل هي الرؤية الدستورية والقانونية .. الراجل ده متهيألي الوحيد اللي ممكن يحول مسار مصر ويمشي بعد كده .. مش حيتبت في السلطة وده اللي محتاجينه .. صحيح جدا عند علاقات خارجية بس متهيألي والله اعلم مني انه عنده رؤية ..ازاي تعمل بدال ماتتكلم .. اللي شاف مصر من برة غير اللي جوة مصر وشغال واللي شاف برة اكيد حيكون دماغه متفتحة اكتر من اللي جوة 
انا لما برسم حاجة لازم ابعد عنها 3 متر واشوفها من بعيد عشان اعرف اقيمها مش صحيح ابدا انه مايعرفش حاجة عن مصر .. هو مش خواجة .. 

.............
خلاص خلصنا كلام ؟؟؟؟ اتمنى مايحصلش انقلاب عسكري بقا عشان حتكون دي القشة التي قسمت ظهر البعير  
Post a Comment

ايه رأيك في مدونتي؟؟

ياما في الجراب يا حاوي


MusicPlaylistRingtones
Create a playlist at MixPod.com