لبيك حجا مفردا

ًلبيك حجا مفردا 

أبيت في مِناك غداً

اهديني ربي واعفو عني 

مهما تمّلك ذنبي مني

يمحوه حجرا اسودا

..

جئت اليك تائبا

مستسلما وذائبا

التف بالابيض

رُحماك .. اتصيد

حجا صحيحا صائبا

..

ادور في عكس العقارب 

ادعوا لاهلي وللاقارب

مُستَلِماً .. عاري اليمين

اجعلني من اهل اليمين

في سعيي نَيّلُ او يُقارب

..

غفرانك .. قبل النفير

كل الانام بك تستجير

صوت البكاء والهمهمة

باهي بنا أهل السما

شهود لعفوك الكبير

..

أطوف أطوف أطوف

أطوف وسط الالوف

ابيت لربي سجدا 

لبيك حجا مفردا

احتراق

قُصر الخطاوي معطلاك .. سرع خطاك 

ماتلتفتش ابدا وراك 

علي راسك دي لفوق

بعد الغروب دايما شروق

ضي شمسه من أملها محركاك

...

بتدي طاقة واحتراق

جوه عقل مصدي مكنه 

والتراب هو اللي ساكنه

واللي تابعك جه وعصاك

...

خليك جرئ وارمي عصاك 

تبقى أفعى وقوة دافعة محصناك

بدل ما تبقى قوم وابقى

وبلاش هزيمة محسراك

..

احتراق

احتراق

إتقل .. تتكيف

هو غالبا كده الواحد حيروح السعودية تاني من غير مايخطب لاني ببساطة مش لاقي نصيبي لسة .. او مش لاقي الشخصية المناسبة
بس انا لسة بدور ... وحفضل ادور
بشوف ناس ... بيتقاللي لأ .. وعادي .. الدنيا ماشية
اصل كويس اوي انهم بيقولو لأ من الاول
انا سعيد جدا بده
عندي احساس ان كفاية مرمطة بقى واستنى لحد ما هي اللي تيجي مش انا اللي اروحلها
اصل نصيبي حيجيلي لحد عندي والله لو كنت فين
ماهو حصل قبل كده و كفيلي السعودي جالي لحد البيت تحت بيتي وهو مايعرفش انه بيتي ... سبحان الله
عايز ابطل زن بقى والحاح واريح نفسي واقولها اتقلي تاخدي حاجة نضيفة .. اتقل تتكيف

سنة حلوة يا جميل

عدت سنة 

سافرت السعودية يوم 14-8-2014 

قعدت هناك سنة سهلة وصعبة 

سنة سهلة .. منغير متاعب .. مريحة شوية .. عدت وربنا هونها عليا 

وصعبة .. في محاولة التأقلم .. والبعد عن اهلي اللي ببعد عنهم لاول مرة في حياتي

قضيت سنة استفدت فيها كتير 

مصطفى الخضري كان بيساعدني كتير .. كان متولي امري كله في الاول .. كإنه ابويا وامي 

له فضل كبير مقدرش انكر ان السنة تمر بدون خساير وتكون خفيفة 

مدينة الخبر مدينة حلوة .. صغيرة .. محندقة .. متاعبها قليلة .. فيها بحر .. فلوسها قليلة شوية .. اماكن خروجاتها كتير ..البلدية بتكسر فيها بطريقة غبية .. بس لا تزال مدينة كويسة ... اللي بيخرج منها بيحاول بشتى الطرق انه يرجعلها تاني

انا مهندس معماري وكفيلي مهندس معماري 

م/ياسر الربيعة انسان كويس .. وامه انسانة كويسة .. وبتكفل اطفال ايتام ومقعدينهم معاهم في البيت .. 

قرود ودمهم خفيف واشقياء وعفاريت :D

كتسجيل للذكرى: بيت الشواية .. مندي الجزيرة .. شرنبي .. كرسبي ميل .. الكوفة .. جولدن فاير المطعم الشرق اسيوي .. بيت التنور (الرائع) .. فطاير الشلال .. فطاير بابل .. بيت الكباب الباكستاني .. حدائق دمشق .. كشري لقمتي 

لما رحت جدة ومكة كمدن .. وكا زحمة .. وكا طيب منظر .. مستريحتش فعلا  ..اللهم لك الحمدعلى نعمة الخبر 

اكتسبت خبرة كبيرة اوي من السنة الاولى في الشغل 

خبرة نفسية وخبرة من الشغل 

حققت انجازات كنت بتمنى اعملها ... اللهم لك الحمد 

عملت عمرة في رمضان يوم 8 رمضان الموافق الاربعاء 24/6

استضافني فيها الله يكرمه .. عمر محمود 

جالي هبوط في اليوم التالي وانا في الحرم .. وكنت فعليا بموت .. الحمدلله ربنا وقفلي 2 ولاد حلال وسط ناس ماتفهمش ليه مكانوش مصدقينني اني تعبان بجد !! وممرضة بتزعق وبتقول مش بنستقبل حالات الضغط في الطوارئ 

الحمدلله 
ثلاثة طيارات في اسبوعين 

رجعت مصر يوم 2/7/2015 

فرحان .. مبسوط .. هواء مصر وخصوصا اسكندرية .. مايتشراش بفلوس 

لا يقدر بمال 

مصر جميلة .. اسكندرية حلوة .. ناس مصر ولاد كلب الله يحرقهم كلهم .. بس مش مصرييين بس والله .. البشرية كلها ولاد كلب 

.. ما علينا 

استقبال حافل من بعض الناس .. فرحوني ..

واستقبال فاتر من بعض الناس .. فرحوني برضو عشان مش عايز اشوفهم
وناس بتكلمني عشان تشوفني عشان تتفرج عليا مش اكتر .. هو عايز يشوفني نضفت ولا لسة  

وعيد ميلادي ال 25 .. كان يوم 9/7/2015

ومخرجتش خروجات كتير ... خفيف خفيف 

باكل كتير :D

وبخس في مصر اكتر عشان بتحرك

.. وعروسة مشوفتهاش ولا شكلي حشوفها .. ومكالمة فيديو كول فاترة شوية  

وواحدة كنت بكلمها من وانا في السعودية وطلعت جزمة متستاهلش ان الواحد يفكر فيها اصلا وقالتلي مش عايزة ارتبط دلوقتي " مش عايزة حد يخنقني " كنت حلطشها على وشها بعد الجملة دي واتحول اعجابي ليها لكره شديد سألتها اومال انتي جايباني ليه عشان اقابلك .. قالتلي مش عارفة

-_-

امنياتي في ليلة 27 رمضان 1436

اللهم زدني علما وانفعني به .. اللهم هب لي من لدنك علما نافعا يغنيني عن البشر 

اللهم اذكرني في نفسك 

اللهم اغفر لي ولوالدي وارحمني وارحم والدي وادخلهما جنتك 

اللهم لا تحرمني في عامي القادم من احدهما يا رب 

اللهم اني اسألك الزوجة الصالحة والذرية الصالحة 

اللهم دبر لي أمري فإني لا أحسن التدبير

اللهم نجني يوم الصراط يا رب العالمين 

اللهم اني اسألك من فضلك ورزقك

اللهم يسر علىا سفري وهون عليا مشقتي وغربتي 

اللهم اغفر لي ذنبي .. واستر لي عيبي 

اللهم اني اسألك رضاك والجنة واعوذ بك من سخطك والنار 

اللهم لا تجعل للشيطان ولا لنفسي عليا حجة يا رب 

اللهم اكتب لي زيارة بيتك الحرام ومسجد نبيك يا رب العالمين 

واخر دعوانا ان الحمدلله رب العالمين

وأشهد ان لا إله الا الله وان محمدا عبده ورسوله 

وصلى اللهم على سيدنا محمد وعلى اله وصحبه اجمعين 

أنا أبغى هذا

فعليا انا مش عارف انا عايز ايه ... أصل انا مقتنع ان هما اللي بيختارونا مش احنا اللي بنختارهم 

انا مش بخيل ... بس ساخط على طريقة الجواز اللي تضيع فلوس سنين في ثواني 

ساخط على تقاليد مجتمعية كافرة بالرحمة والسلام ومحتضنة للمشاكل والخطط و الكراهية 

وكإن الواحد حيعدي الصراط .. لو عدى من فوق حد السيف .. يبقى كده يستحق انه يتجوز ولو معداش يبقى حظ اوفر في المرة القادمة 

انا بحب والدتي وابويا .. وخايف من واحدة بنت حرام تعصيني عليهم وتاخدني منهم 

ابويا قد يكون حما في يوم من الايام اشد من امي ... لان ابويا محتاجلي ... ابويا بيحبني ونفسه يتعكز عليا 

 فكرت ادور على واحدة مش مصرية .. بس انا ضامنها منين دي ...؟ المغاربة كتير على النت في السعودية ... بنات لاموأخذة 

مش من السهل ابدا انك تفهم اخلاق حد مش مصري لما تبصله 

انما لما تبص للمصرية من شكلها حتفهم عقليتها انما الجنسيات التانية ... استحالة 

المغترب وضعه اسوأ .. لانه بيجهز عشان الجواز مرتين .... مرة في الغربة ( بيصرف كله من جيبه) .. ومرة في مصر ( بيصرف نصه او تلت تربع ) 

انك تلاقي مصرية في الغربة او اسرة مرحبة بيك شئ مش سهل لانهم بيخافو من الغرب  ... وخطر لانهم بيمصو دم اللي قدامهم برضو مش سهل تلاقي حد فيهم طيب  

وانك تلاقي في مصر حد مش طمعان فيك بعد ماكان مش باصصلك بنفس الاهمية قبل ما تسافر .. شئ مستحيل 

انا بتاع مظاهر وبدور على شكل ... بس برضو بدور على مضمون مع الشكل ليه لأ يا ده يا ده ؟؟ مش فاهم !!!

ومش واخد الموضوع بشكل جاد .. لاني خايف - زي ما بخاف من اي تجربة جديدة بدخلها - ودايما بفضل الهرب 

بيجيبولي عرايس بس الشكل والصور مش عارف احدد منه دي عاملة ازاي ...

انا بدور على واحدة زي ما النبي قال 

خَيْرُ النِّسَاءِ إِذَا نَظَرْتَ إِلَيْهَا سَرَّتْكَ وَإِذَا أَمَرْتَهَا أَطَاعَتْكَ ، وَإِذَا غِبْتَ عَنْهَا حَفِظَتْكَ فِي مَالِكَ وَنَفْسِهَا

مواصفات قياسية
بدور على واحدة طيبيتها ونقاء داخلها وسلامها الداخلي بينطق على شكلها 

مطلوب عروسة مادية حقيرة لمهندس مغترب

كان الواحد ممني نفسه اوي .. ان واحدة معينة توافق عليه انه يتجوزها .. خصوصا انها معلقة معاه من 7 سنين مع انه شافها مرة واحدة بس .. مش عارف كان ده اللي بيسموه الحب من اول نظرة ولا ايه .. الواحد كان بيعمل حاجات غريبة جدا .. مع اني انطوائي بزيادة وبيخاف جدا .. .. بيبعتلها رسايل على الفيس بوك و يسوق عليها اهله وكان عندي استعداد اني انا اللي اكلم ابوها .. بس اكيد هي كان معندهاش سبب واحد (اذا كانت فاكراني اصلا ) انها توافق عليا .. انا اللي فعلا بنيت برج خليفة على اهواء وتخيلات بالتالي مع رفضها وقعت على جدور رقبتي 

قد اكون بجيب من الزفت واحط على نفسي .. بس ده مش معناه اني وحش .. لأ خالص .. انا مش انسان سئ.. ده اللي لازم اقوله لنفسي ..  لاني فعلا مش انسان سئ .. انا الفترة اللي فاتت كنت معتقد ان الانسان الاقرب الى الاكتمال هو اللي بيشوف جانبه السئ اكتر من جانبه الجيد عشان يقدر يحسنه .. بس لأ .. اطلاقا .. انا فقدت السيطرة لدرجة اني بقيت بكره نفسي .. ده قمة الهبل .. لأ انا مش وحش .. انا بصلي وعامل عمرة وشغلي كويس جدا وعندي شئ من الوسامة ومجتهد وطيب وبفضل غيري عليا لدرجة اني ممكن ارضى لنفسي اخد الزبالة عشان هو ياخد الحاجة الحلوة ويكون مبسوط 

بحاول ارضي غروري لاني فعلا مكسور

بحبها وشفها مرة .. اومال ايه اللي حيحصل مثلا لو كانت وافقت واختلفنا على حاجة او لو اهلي واهلها اختلفو .. مش عارف ايه اللي ممكن يحصلي ساعتها .. ومش فاهم انا بحبها كده ازاي .. دانا مشفتهاش غير من مرة واحدة من 7 سنيييييييييييييييييييييييييين

ده انا دعيت انها تكون ليا في كل حاجة 

دعيت وانا بطوف في العمرة .. وكنت بدعي في اغلب الصلوات اللي صليتها من اول ما قولت يا صلا 

ومع ذلك هي مش ليا مع اني حاسس بارتباط روحي معاها رهيب .. البنت دي ليا .. البنت دي بتاعتي

مافيش .. صلاة استخارة منها .. ربنا قالها عليا لأ .. انا مش الافضل بالنسبالها .. ومع ذلك انا متضايق .. راضي بحكم ربنا بس متضايق بردو .. مانا مش عارف متضايقش .. عاجز اني اتقبل فعلا .. بحبها .. ايه الجنان ده .. والله ما شوفتها الا مرة واحدة 

...

طيب .. نقطة ومن اول السطر 

انا دلوقتي عايز اتجوز .. وكنت بزن على اهلي كل يوم اني عايز اتجوز وانا في مصر .. صح ؟.. ومع ذلك لم اوفق في ايجاد هذه الانسانة ..ده وانا في مصر .. وانا بشوف حواليا بنات .. .. مابالكم بالسعودية .. انا من اول ما جيت الخبر مشفتش وش واحدة بقالي شهرين ونص اهو .. يعني الالحاح عندي طبيعي لازم يزيد .. ده غير ان في السعودية عموما .. وضع الهندي المتجوز افضل من وضع السعودي الاعزب ... والدليل .. عوائل يا محمد .. في مولات ماينفعش تخشها الا لازم معاك واحدة اختك بقى امك صاحبتك متعرفهاش اي واحدة ماتفرقش .. غير كده فا انت انسان منبوذ .. ده مش سبب كافي او اساسي او سبب اصلا اني عايز اتجوز ... غير اني عايز اتجوز 

قبل ما اسافر قعدت 3 قعدات صالونات .. 

اخرهم واحدة اول ما قعدت قدامها .. قالتلي مش عايز تسافر؟؟ .. مكانش موضوع السفر ساعتها بيشغل حيز من تفكيري اصلا او كنت بمعنى اصح فاقد الامل في السفر نوهائي على رأي حلاوة بيه العنتابلي بتاع فيلم باب الوزير .. وفضلت تكلمني عن قريبها اللي في جيزان اللي مسافر وبتاع .. واللي فضلت تقارنني بيه يجي 100 مرة .. عشان تشوف مين فينا الاغنى 

ودي المشكلة .. ان الواحدة من دول وخصوصا وهي لسة مخلصتش كلية .. بتكون حاطة واصفات قياسية لعريسها المنتظر.. يعني بتكون حاطة في دماغها واحد في وسامة احمد عز و حسين فهمي و فلوس وشقة وعربية 

لحد ماتصطدم على صخرة الواقع .. وتلاقي نفسها بتكبر واتخرجت وملاقتش حد وتفض تكبر تكبر تكبر لحد ما سقف طموحاتها يتهد على دماغها ..

والمصيبة الاكبر 

ان الولد وهو في مصر بيتقال عليه فقير و ميقدرش يلبي متطلبات خطيبته

ولو هو في الخليج بيفضلو يطلبو منه هاتلي شبكة ب 30 الف وشقة معرفش فين وطلبات كبيرة اوي اكبر من حجمه ولو مجابش يبقى بخيل 

وفي الحالتين بيكون وحش 

مش عارف حظي وحش ولا ايه .. بدأت اتيقن ان البنات كلها مادية زي اخر واحدة دي ..

اهم حاجة عندها تريح نفسها بغض النظر بقى عن اللوح اللي قدامها ده ايه بقى مهندس كناس حرامي ميهمهاش .. المهم معاه فلوس كتير وخلاص 

بس فعلا هما مش بيقدرو القرش بيجي ازاي .. لانهم بكل بساطة مش تعبانين فيه .. 

ابوها بيصرف عليها ... جوزها بيصرف عليها .. وفي الاخر هي بتاكل .. زي الحمير في النجيل ... انا مضايقاني اوي البنت دي 

....

المقاييس المثالية لحد في حالتي دي ..

اولا انه يتجوز واحدة بتشتغل .. لانها اولا حتكون عارفة الدنيا عاملة ازاي قد ايه المعيشة صعبة فحتقدر .. وحتكون عقلية ثقافية ناضجة غير ماتكون ست بيت زي البلاوي الكبب والكائن الملقب ب"الولية" اللي بتكون عقليتها اقرب لعقلية كرسي مطبخ .. حتى كرسي المطبخ بيكون ليه فايدة عنها 

ثانيا يتجوز واحد مغتربة اصلا .. ذاقت مرارة الغربة .. لانها حتكون حالها من حاله 

...................

بس اكيد الكلام ده في الاحلام .. والواحد لازم حيقع في واحدة مادية حقيرة ...فا زي ما الترع بيئة مناسبة لمعيشة البلهارسيا .. فا المغترب بيئة كويسة للماديات من ابناء وطنه ..

كان حيحصل ايه لو كنتي وافقتي ياللي في بالي .. ياريتك كنتي وافقتي

 في يوم الاحد 19 /10 /2014
كنت راكب انا وابويا وامي و خالتي واتنين من ولاد خالتي في عربية اشبه بالميكروباص .. ومتكربسيين جواها عشان العربية منف جوة ضيقة اوي ..  الغريب ان الميكروباص ده كان منغير ديريكسيون 

كنا في مشوار ما .. غريب اوي كله سراديب .. وابويا مكانش مبسوط من المشوار ده .. فا واحنا راجعين .. الميكروباص وقف .. في ناس شاوروله .. بنت هي وعيليتها .. والمفروض اني اقوم عشان اعدبهم يقعدو ورا .. فببص وانا عارف ان مفيش مكان .. فببص للبنت بنبرة حادة .. راحت قايلالي بإبتسامة ..ايه مالك ؟ .. .. رحت سألتها بتعجب  حتركبو فين مافيش مكان .. قالتلي ماتقلقش احنا حنركب ورا وحنزنق نفسينا .. فا ركبت ..
وصحيت من النوم  

من الاخر

مين هي مصر من 2011

مصر الان مكونة من مجموعة من حسالة من الناس .. يظن كل واحد فيهم انه اللي فاهم كل حاجة

ناس مع السيسي وناس مع مرسي وناس مع اللي بينهم وناس حتى لو جه نبي حيصفوه سياسيا وانسانيا وكإن كل الناس دراكولا

يتخانقو مع بعض 

وكل واحد فيهم يستند على وجهة نظر 

والعجيب ان كل وجهات النظر تكون صحيحة 

ولا أحد فيهم مخطئ

ولكن هذا يقول حجته 

وهذا يقول حجته

وكل واحد يقول للتاني في نهاية كلامه انتا مش فاهم حاجة !! 

...

يلعن ابوكم انتوا الاتنين

 ويلعن ابويا انا كمان عشان شايفكم انكم مش فاهمين حاجة انا كمان 

اين التلاقي ؟!

محبوبتي في الجنة وانا في النار .. فمن ذا الذي يجمعنا فقلبينا شتات .. فصل البرزخ بين المالح و الصالح .. ابتعاد ارضين بينهما خليجين ... فكيف يلتقيان .. اراء دموية مع نفس خيرية .. لا يلتقيان .. اريد البكاء .. الحق و الباطل الابيض والاسود ..انثى الميزان و ذكر السرطان ..عقل و هوائية .. سيساوي و إخوانية .. سقف و أرضية .. عمق وسطحية .. ثقافية ارائية تهوى الحرية تريدها اسلامية .. صافي مستقيم بشري مذنب كثير المعاصي تريحه العبودية و روحه ديكتاتورية واسعد لحظاته في محو الاخوان من على سطح البرية .. طبيبة بشرية ملاك للرحمة .. ومهندس متعطل تائه في الزحمة .. روح العداء .. زيت وماء .. نفسها سوية ترضى القضاء .. و نفسه دونية دون الإرضاء .. دنيوي ودينية .. لا تعرفه وهو يحفظها .. لا تجيبه وهو يصلها .. لا كرامه في حبه .. حبه كحب النساء .. افلاطوني .. وتفر منه كالجياد .. مارثوني

غلب حماري يا رفاقي .. متوازيان .. أين التلاقي؟!

بلا هدف

تطابق .. تطبيق 

تساوي 

سلام 

فنون وابيض يكسو الكلام

صور متداخلة في تكوين متزن 

وبخلفيتها لون الرماد

امان من بعد خطر

صوت غسان مطر 

مجد 

عزة كرامة نجاح

نقطة عرق سببها الكفاح 

موت فداء سبب 

حليب من كوب لتوه انسكب 

شنب

غضب

لهب 

مياه

 نطق اسمي مسموع صداه

بلاه

جنون 

تخيل بكاء 

وضع الجنين 

لون السواد 

سكون 

عيون 

تشجيع وخير

أمل وسلام

ثقة 

احلام

نهوض

صعود

لأعلى النقاط

ثم البداية في الانحدار 

في نهاية مشوار 

اتزان

الاستعانة بسم أفعى للشفا 

تضاد لخير

حكماء وطننا مُخرفة

مفيش ضمير 

ستات بيوت عابدين تراكوة .. فوق حق ماكوة على بدل متكلفة

بالذمة حاجة مُشِّرفة ؟؟

عالِم ايديه متكتفة زي العبيد

ضغطه علِى من الروتين وحالف لايسافر بعيد

عن وش ام دي بلد غضب الاله غرق بحريها والصعيد

ودورنا نشحت على الحديد

اه والله .. وحق كتابه المجيد

صاروخنا فرقع في الهوا وهو طالع

ورئيسنا شابط في الصوابع

صورته حتنزل على الطوابع والجنيه ماتقلقوش

حنرجع لأيام الباريه ويحّلي تغفيلنا الطربوش

ودقوننا بتربي الكروش .. متسلطنة

مصالحنا صابتها المرض متسرطنة

ولا راح ينفع لا علاج معاها ولا دوا .. مصيبتها صبحت متوطنة

استنى كارثة او ابادة ياحضرة صاحب السعادة المنتخِب

اسمعني وخلي صدرك رحب

عقلك وايدك عيلين صغرين قلبهم مهزوز

بيجروعلى اللي واكل عينيهم وبيلعبلهم اراجوز

حكم دماغك وانتخب زي الافرنج

اختار وكأنك قاعد في قهوة وبتلعب شطرنج

كلت الحصان الفيل حياكلك وكش الملك

مانا بردو عازرك اراء ساستنا زنبلك

اختار الاصلح اللي حيجبلك مرتب والاهم

مش اللي حيقولك حدود وحرام ودم

اختار مين يصون حقوقك يحميها

مش اللي طمعان فيها

وطننا محتاجله صدمة كهربا

طريقة ومتجربة

قول للدين نعم

حيخرج من ضهرك كفار

حتقول للسلف نعم

الشيعة حياخدم بالتار

حتقول يمين بالقوي.. يطلع شمال بالقوي

حتكون وسط

تفضل وسط

الارتكاز

الثبات

الامان

حتقول شتات

حيكون شتات

الاهتزاز

الانحطاط

والجنان

اثبت في نص الخشبة توزن

الاتزان هو الامان

الاتزان هو الامان

نص تفاحة

حجة ... بصي انا عايز اقولك حاجة ... بقولك ايه بقا انا قعدت 5 سنين في كليتي فشلت

 فعلا اني اكون اي صداقة بالمعنى المفهوم مع بنت من كليتي .. دول كانو ناس بتوع مذاكرة وجمالهم مستخبي ورا همهم في الدراسة واحترامهم الزااااااااااايد وده مش صح وبصراحة العيب كان مني كمان .. انا اللي مش عارف اجذب الانتباه دايما مكشر ومحدش بيعرف يحس انا قصدي ايه .. برايا دنيا .. وجوايا دانيا تانية خااااااااااااااااالص دنيتي اللي برايا دنيا جافة .. ابتسامتها قليلة .. كئيبة ناشفة اوي .. مش طايق فيها حد .. الا ناس قليلين اوي و لما بكون في قمة سعادتي مبعرفش ابين للناس وفي حالة عدم رضايا كمان..بعكس تماما في دنيتي اللي جوة .. دنيا كلها الوان ورفض عكس حياتي اللي كلها قبول .. دنيا مليانة رقص وهيصة ...بعس ثباتي وركوزي الاوفر  

واحب ابشرك اني عارف ان انا بالنسبالي .. مافيش امل وبجد .. بجد الامر مستحيل .. انا فعلا لا يمكن ابدأ

فا بصي يا حجة .. انا حصدرك انتي بقا في رحلة البحث عن نص التفاحة التاني

امي : طيب خلاص .. 

بعدها .. بص انا النهاردا لقيت واحدة زميلتي كانت بتدرّس معايا قابلتها وانا واقفة في طابور الانتخابات .. فا فاتحتها في الموضوع والصراحة الست جميلة واكيد بنتها زيها .. واخدت نمرتها 

خلاص فل .. بس حقابلهم ازاي دلوقتي وانا حالق شعري اوي كده ؟؟؟؟

لا لا لا انا قلتلها بقا لما شعرك يطول شوية عشان قلتلها الخصلة اللي فيك دي لما تكون متضايق فاتقصر شعرك اوي 

 وبعد اسبوع وشوية .. ومكانش شعري طول اوي بردو ... والدتي كلمتها .. وقالتلها .. ..وكان معاد اللقاء في نادي الاوليمبي يوم 28 ديسمبر ..وكان تحديد المكان عن طريقهم كمان فا كنت على ارضهم  .. كنت فعلا رايح وحاسس بأحساسين .. انا خايف .. بس انا في مركز قوى .. انا الولد .. 

محاولتش اتخيلها قبل ما اشوفها لاني كنت جايز مش عايز اتخيلها 

دخلت النادي مع والدتها وكونت رأي عن والدتها .. حسيت ان اشطة .. ست كويسة وارتحت لها .. 

عرفت بنتها مين وهي من بعيد .. (س) مش محجبة .. وانا طالبها كده .. ومش على استعداد اقول دلوقتي انا ليه كنت عايزها مش محجبة .. قولت لنفسي نهار اسود .. دي جميلة جدا .. 

انا معرفش انا كنت قاعد عامل ازاي بس انا كنت قلقان

قلتلها كلام كتير انا معرفش قولتهولها ليه .. وقليل اوي لما اتكلمت .. بعكسها .. تماما .. هي كانت جريئة اوي .. انا كنت بروتة فشخ

وطلع كلام مني غبي مكانش المفروض اني اقوله .. وكانت غلطة .. قولت كلمة "امي لازم تحط التاتش" "وده كان قمة العته لانها فعلا كلمة مخيفة 

عن (س) هي جميلة .. جريئة .. مغرورة اوي.. غير مرحة على الاطلااااااااااق .. ممكن تكون حتة تحفة في البيت بطريقة ناجحة .. انما انها تكون زوجة .. اعتقد لأ .. هي في كلية حيوية محتاجة ناس تسافر كتير اوي .. ده كان شيئ بالنسبالي انا عادي .. بالنسبة لأهلي لأ .. وقد يكونو عندهم حق

افتكر اول سؤال سألتهولي ... انتا اخوان 

:D

ابتسمت وقولتلها لأ .. بس انا كنت وقتها سايب شوية شعر من دقني ..عشان كده ظنت فيا الظن البطال ده .. 

سألتني  مابتشربش سجاير .. قولتلها ..لأ ومبحبش اللي بيشرب سجاير .. مش عارف انا قولتلها كده ليه .. بس فعلا انا حسيت انها بتشرب سجاير 

بس اللي انا كنت متأكده انها اول ما شافتني محستش بالرضا ... كانت قاعدة كأنها سكرانة .. القبول محصلش ..لا بالنسبالها ولا بالنسبالي

لأني فعلا كنت وانا قاعد كنت بغير رأيي فيها فعلا كل 5 دقايق 

نوع من المراهقة .. اديتها الفيسبوك بتاعي عشان تعملي اد .. ومحصلش .. فا خلاص .. وانا متصلتش بيها عشان ابدي اي موافقة 

سمعت .. ان صلاة الاستخارة ممكن تقرب او تبعد ..صليت استخارة لما روحت البيت .. قولت يارب لو قربها خير ليا حببني فيها .. ولو قربها شر ليا كرهني فيها .. وكنت فعلا مقتنع تماما اني عايزها... اليوم اللي بعده فعلا صحيت ..متضايق وكل مافكر فيها احس اني مقبوض ومش فاهم ايه الكره اللي نزل عليا من ناحيتها .. فعلا البنت تتحب .. بس فعلا ربنا مش رايد .. ربنا يستر على النصيب 

وماكنش ندمان 

حكمة الام بعد اللقاء ده بقا .. يا ابني اتجوز واحدة وحشة ..(لا يا حجة والله ده ايه الجمال ده) الحلوة حتتكبر عليك انما الوحشة حتحبك وحتمسك فيك بأيدها وسنانها ......ياسلااااااااااام تبارك الخلاق في ام ده منطق.. ماولع في نفسي من دلوقتي واخلص

عدت الايام اسبوع ورا اسبوع وقولت لأمي .. يالا .. اللي بعده 

:D

فا قالت لواحدة زميليتها بردو قابلتها بالصدفة ..يا نون .. وريني بنتك .. فا قالتلها ازاي يعني صورة ؟؟ قالتلها اه ماشي .. فاوالدتي قالتلي قولتلها ايه ده ؟؟؟ طب وانتي مالك ؟؟؟تشوفي انتي ليه ؟؟ فاقالتلي لأ مانا حشوفهالك الاول .. لو اشطة ماشي مش اشطة خلاص 

فا كانت القلشة اللي في الوقت ده .. هي انها دلوقتي لما امي حتشوفها لو عجبتها تبقا حتعدي المرحلة الاولى عشان تقابل الوحش 

المهم عدت المرحلة الاولى .. ومش فاهم الصراحة  هي عدت ازاي 

المهم اتقابلنا في ديليس يوم 6 فبراير .. كان يوم اربع والصراحة الفايدة الوحيدة اني كنت اول مرة ادخل ديليس

  ودخلت البنت هي وامها .. بلعت الام جدا وست طيبة ومحترمة جدا والصراحة استريحتلها ولقيتني بتكلم معاها بطلاقة .. وبستخف دمي والحياة لوز اللوز ...انا شكلي حتجوز ام انا مش بستظرف الا الامهات ليه مش بستريح في الكلام الا معاهم ومع البنات بيركبني عفريت 

المهم .. انا اول ما شفت بنتها .. بوزي اتلوى .. ومجتش معايا سكة .. هما نص ساعة ومشو ... وحتى دلوقتي بعد اسبوع من المقابلة مش فاكر اسم البنت ايه ... 

الظاهر ان المهمة في البحث حتكون متعبة ..

لان  فعلا انا المجال قدامي مقفول بميت قفل .. متخرج من كلية 5 سنين ومافيش حاجة وفي شغلي مافيش حاجة و حتى لو في معتقدش 

حعمل حاجة ..لاني عارف اني لايمكن انا اللي حبدأ .. ده طبعي وانا عارفو كويس 

ربنا يستر في رحلة البحث عن نص التفاحة 

عــــرافـــة

ودع غطسان في رمال 

وشـــــــال بيدفي عباية 

وخطوط عجز بتخبي خصال

منحوتة برياح جرّاية

سحبت طيبتها في سكتها

و سدت مسام ضوء برائتها

وكوّم تراب على صراحتها

والكدب في عنيها ماساية

والنصب في فراغها هواية

....

تقلب فناجين النسا..عامل محطة.. تحّول قطار تفكيرهم

بدال مايـجــــري عالصعيد يصبح في بحري يوصــلهم 

ترمي الودع فوق التراب ..ومع رميته يدق الخراب 

طبول الشرك على بابها بترعش ركبة الايمان من الشياطين الغوّاية

..

عرافة للغيب جرّافة

تقشط جذور الخير

 تقتل براعمه وتمّز طعمه 

ويصبح من حلو لمالح

 من قبل حتى ما يطرح ويوري ورقه للخلايق 

تصبح صورته تضايق 

ويكره فلاحه زرعته ويقوم حارقها 

ولا تصعب عليه .. ماهو كان كارهها

صاب المرض طرحة خيرها وسوّس عيدانها اللي بتطلع على الرايق

خلاه دبل ولا تنفع معاه اي سقاية

..

لهب كلام نبرة صوتها 

يحرق ودان اللي سامعها 

يتسرسب من تحت باب عقله 

يسرق اماله اللي جامعها 

وضي امله بربه يخيب

بجهله طفّى 

شمعة ايمانه بطفاية

فففففف

انا سعيد اني ركبت الميكروباص ده

حكاية سردية بحتة ..

شاء القدر اني ماروحش الشغل النهاردا بسبب امتحان ديبلومة في تصميم الجرافيك كنت قاعد بزاكرلها طول النهار .. وفي موعد نزولي في وقت الذروة 

زحمة كالعادة ... ولكنها اشد 

قلت اشطة انا متعود على كده حروح اركب من جنب المنشية اديني بسبق العربيات اللي واقفة

ولما وصلت .. بعد ما ايقنت اني مستحيل حركب سمعت صوت جي من سواق بيقول لزبون .. شايفين اديني بقالي ساعة الا ربع في بحري بس .. ليا حق "اقطّع المسافة بقا ولا لأ " حرام بقا بصراحة 

والناس بتوافقه .. من براها بس .. انما من جواها لأ 

وفضلت واقف نص ساعة .. مش لاقي ركوبة .. حتأخر على الامتحان ..طيب وبعدين 

وشي مكشر .. بسب وبلعن في دي بلد 

وبقول يلعن ابوها بلد بنت وسخة 

طلعلي من شارع المفروض مكانش يطلع منه .. الشارع ده بتاعت مشاريع تانية .. وكأنه ميكروباص فريد من نوعه 

والناس اتلمت عليه عشان فاضي .. وانا متوقع اني مش حركبه 

سأل احد المحاولين الركوب ... للسواق "اللي في بلدنا هو دايما اللي بيتسأل " ... رايح فين ؟؟؟؟؟؟

وكانت الاجابة .. سيدي بشر ... ظهر لي في الافق ايموشن رمضان مبروك عالمين حمودة ... قائلا ... والله لسة فيكي نخوة يا بلد

مشروع فريد من نوعه مش بيقطع المسافة عشان ياخد اجرتين ..

وبدأ المرشوع يمشي وناس تركب 

ركّاب الميكروباص هم ..

رجل في السيتينات من عمره .. وبجانبه شاب مقبل على الثلاثين  يجلسان بجانب سائق .. محترم قريب من 35 عام

اما في الكابينة الخلفية ..

سيدتان حينزلو بسرعة 

بجانبهم على الكرسي الايمن .. شابة جذبت انتباهي .. بخاتم به وردة كبيييييرة .. مش ذهب ..يبدو عليها الطاقة 

وتقول للي وراها انا اسفة مديقاكي بالكرسي ؟؟؟!! ترد سيدة منتقبة تحمل رضيعة .. سفك انتظارها الميكروباص دمائها ... لا لا ولا يهمك اسندي عادي 

بجانبها .. رجل .. واخد الدنيا ببساااااااااااطة ..تضرب تقلب .... مصدر مؤخرته للدنيا ولديه حس فكاهة و فضولي شويتين..لاحظت ده من كتر ما اتكلم مع شابة قاعدة جنبه عندها روح اجتماعية 

وعن يميني ست حتنزل قريب .. وعن شمالي .. واد مالوش دعوة بأأأأأأأأأأأأي حاجة .. سادد ودنه بالهاندفري .. وبيقول خراب يا دنيا عمار يا دماغي 

وورايا .. 3 مضحكاتية .. مكانوش بيعملو اي حاجة غير انهم بيضحكو 

ولّع شرارة اعجابي .. الي بدأ بأستغلاس الموضوع .. الراجل الفضولي خفيف الظل .. متحدثا عن مظاهرة بكرة التلات وانه شايف البلد دي بقت سيئة .. 

ردت عليه الشابة الاجتماعية متحدثة عن اللي حصل في سموحة .. وقالت ان المتظاهرين ولعو في المقرات بتاعت الحرية والعدالة 

التعليق ده استفز بطلة اعجابي .. البطلة دي ناشطة سياسية .. ام الخاتم اللي بوردة

معاها ماجيستير و بتتكلم بنفس الحماس اللي كن بيتكلم بيه اي حد عاصر الثورة 25 

وعلى عكس ردة الفعل اللي انا متوقعها .. انا كنت متوقع ان تحصل خناقة .. مابين الناس والناشطة السياسية دي ده رقم واحد 

وزيادة على كده اقتتال مابينها وبين السيدة المنتقبة ..

طلعت انا اللي حمار .. او هما اللي حالات مختلفة تماما 

انا لاحظت الاعجاب اللي بينط من عين اي حد بيركب الميكروباص ده حتى السواق بالناشطة دي 

لأ والادهى اللي خلاني اريّل .. التأييد التام .. من المنتقبة .. للناشطة السياسية دي اللي كانت بتهاجم مرسي والاخوان بضراوة 

الوحيد .. اللي كان مش عاجبه الكلام .. الراجل الستيناتي .. مش لأنه اخوان .. لأ ... لأنه لسة مافاقش من مرض ادوله فرصة .. انا كنت في حالة قرف تامة قبل ما اركب الميكروباص ده .. بس الميكروباص ده لفت نظري 

ان اول مرة من ايام الثورة .. الناس تتفق على حاجة .. 

مشفتش حد رأيه زي التاني .. من وقت الثورة ..

انا بدأت اشك .. قلت جايز الناس دول بس ... لكن لأ .. اي حد ركب اليكروباص ده في اي وقت طول الطريق .. وسمع الناشطة السياسية دي .. كان مبسوط بيها اوي اوي 

حسيت بجد قد ايه رصيد الاخوان نقص عند الناس بجد .. التعاطف معاهم اللي كان مخليهم اغلبية ... راح 

جشعهم في السلطة كره الناس فيهم .. سوء التصرف كمان .. البطئ من مرسي ..الطيش السياسي و قلة الحيلة 

قللت كتيييييييييييييييييييييييييييييييييييييييييييييييييييييييييييييييييير اوي .. واللي مش حاسس كده بجد .. حقوله زي ما الاخوان كانو بيقولو للي ضدهم .... انزلو الشارع 

في كل مكان بيحلق كره الناس للاخوان ... الا قليييييييييييل 

الميكروباص ده اكدلي كده .. والاسواق اللي جنب بيتي كمان .. اي حد بدقن يدخل السوق .. يستلموه .. البياعين اللي مالهومش في السياسة بيشتمو مرسي ... ولو حد بدقت عارضه .. السوق كلللللللله يبقا ضده وتقوم عاركة 

الميكروباص ده .. اداني امل .. ان مش كل الناس بقت مستسلمة ..

سعدت سعادة تضاهي سعادة حازم صلاح ابو اسمعيل لما بيتسأل الاسئلة 

أنا سعيد اني ركبت الميكروباص ده .. ايموشن حازم صلاح ابو اسماعيل

اجيب فلاشة ليه مدام حتبوظ

اليوم .. 23/11/2012 ... شعور بيأس لا ادري ما سببه 

ربما لأني اجد ان معظم ما حلمت به اصبح بعيدا .. فأصبحت مثل أناس لطالما تهكمت على طريقة حياتهم
اغار من حظ من هم اعلى 

واشعر بفخر شديد عندما انظر لمن هم دوني ... وسرعان ما اتذكر ان فخري هذا يمكن ان يكون لي سبب انتكاسة 

احلامي راحت ادراج الرياح .. شاب في الثانية والعشرين لا يعرف كيف يبدأ .. ولا متى سينتهي ..تائه 

وجدت عمل .. واصبحت ثور في ساقية .. من الشغل للبيت ومن البيت للشغل .. للاسف 

حلمت ان يكون لي كتب ... ولكني للاسف .. لم اسعى الى ذلك .. مع كثرة كتاباتي .. ليس كسل مني .. وليس لأنه لا يوجد وقت لدي 

بل الوقت متوفر ولكن .. التوفيق غير متوفر .. فلم يأتي الميعاد .. وندمي منذ الان ان لا يأتي

فهذا التردد يجعلني مابين خطوات موجبة وسالبة ... فمحصلتي دائما صفر

اعمل كتاب ليه .. ماهو ممكن يفشل.. هو مين اللي حيشتريه  

اكلم واحدة ليه ماهي ممكن ماتعجبش بيا وتكسفني

اسافر ليه مانا جايز يحصلي مشاكل هناك ومعرفش اخد حقي ومحدش يقدرّني و اتهان

اجيب عربية ليه مانا اكيد حخبط حد 

اجيب فلاشة ليه مدام حتبوظ

ولحد وقت قريب ... أصلي ليه .. مانا كده كده في النار 

اعيش ليه مدام حموت 

فعلا على رأي هشام صحبي .. اللي مش بسأل عليه ومش بسأل على ايه حد من صحابي 

اصلي اسأل عليهم ليه .. مانا مابسألش على حد اصلا 

شئ سيئ اني بفكر كتير اوي اعيش لوحدي 

حتى منغير ابويا وامي 

انا فعلا كتير جدا جدا بقعد طول اليوم لوحدي 

قدامي المخروب ده وبكلم ناس مش بتقرالي على البلوج بتاعي 

بتنشأ على احساس بطاقة بتجيلي لما حد بيقوللي على حاجة عاملها ..الله دي حلوة اوي 

احساس مايتوصفش 

ولو حد قال على الحاجة دي وحشة 

ببطلها 

بطلت موسيقى عشان مكانش حد بيسمعها 

لان لو حد حيسمعها .. مش حيفهمها .. مش عشان انا عبقري مثلا .. لأ عشان شعبنا مش بيفهم الا الاغاني والموسيقى المشخلعة 

بيتعامل بأسامي.. اشطة ده اللي عاملها ماهو مشهور .. ويفضل يسمعهاله .. 

انا ضيعت سنين من حياتي في كتابة اغاني لو جمعت الورق اللي كتبته و وقفت عليه حوصل للدور اللي فوقي

رسومات كتير رسمتها وانا صغير 

الحان كتير عملتها ..بيقابلها الناس بوجه عبوس وبيقولو لنفسهم ايه القرف ده 

وببقى حتجنن ... ها بقا .. يالا بقا .. تسقيفة اومال .. تشجيعة اومال 

بوزع وانا عمر ما كان حلمي اني اكون عازف كويس اصلا .. لاني عمري ما سعيت لكده ابدا 

حسيت ان التوزيع ممكن لو اشتغلت عليه اكتر ممكن يطلع حاجة .... 

الموسيقى حرام .... صوت جي من ناس اصلا مش بتصلي .. الموسيقى حرام 

طب خلاص الموسيقى حرام .. بلاش موسيقى 

اعمل ايه !!!

ارسم ؟؟؟ ماهو بردو حرام .. انحت ... ماهو بردو 

طب اعمل ايه ؟؟ 

ثورة وسياسة ... انتا ليبرالي علماني كافر 

ها بقا وبعدين .. مانا ضدكو يبقا انا معاهم مهما كانو هما ايه 

وارجع في الاخر اكتئب ويقولولي انتا مكتئب .. ماهو انا مكتئب لاني دايما بحاول ارضيكو 

وعشان عارف اني عمري ما حرضيكو .. دايما بقف

ده حتى انا كنت بخاف من مدرسيني في المدرسة ..بخاف اتضرب ..بخاف ارفع ايدي عشان اجاوب 

ببص لنفسي نظرة دونية عن الناس ان هما دايما هما اللي فاهمين وانا لو دخلت في موضوع حبوظه 

احا على ده تفكير 

احا على دي ناس بيظيطو مع الظيطة وبنخلهم ويركبو 

احا على دي دنيا كان ممكن تمشي وانا مش فيها انا مين يعني عشان اكون فيها .. خلاص يعني انا ترس مهم اوي ماتمشيش الا بيا 

احا على اخوان بيأيدو وخلاص 

واحا على معارضين بيستعرضو قدام الكاميرات 

وكله غلط

انا مستنى كارثة تاخدني وتاخد البلد بنت الوسخة دي 

مش دي سنة 2012 اللي قالو حتحصل فيها الكارثة بقا ... هي فييييييييييييييييييييييييييييييين

ثور

يا عقل زي النيل سدو منابعه ومنعو طميه للوصول للمصب 

وحيلته قلت وحبسو حلمه وهو لساه شب 

حسد الحمام على عيشته 

ومسك بأيده ريشته 

ورسم جناح احلامه

 لوّن خياله انكب

طموحه بركان هب

خضّر اراضي بوّرها الزمان صب
اسمنت حظ ثابت على عقل متكهرب
عالفاضي شحناته بيسرب
ومصيرها سالب ارض
ولكل يائس رد
حظك فريسة راقبها
وفي المعاد انقض
قضاء وماله رد
خليك مفتح دماغك على كل مستكرد
ارخي اللجام وقت الامان 
وفي الشدة ثور واتخض
سكوتك معنى مرض
اجلد شيطان وسوس لودنك بصوت يقول اتهد
اوعاك في يوم تتهد 
اجري في حلقة ماتجيش في يوم تخلص
حظوظ الجهد في العادي واحد و مش انصص
حقك حتاخده طول ما عليه بتسعى
لكل واحد حتديه يتردلك تسعة 
ماتسبش نفسك للكسل بين الخلايق ترخص
الدنيا زي النحلة .. شفاها في اللسعة
الدنيا لحم وشوك وصعب تتفصص
اكل العسل حلوة بس النحل بيقّرص

رحمة مفرومة

مدام اميمة  

امرأة ضئيلة الجسم قصيرة القامة كبيرة العمر في ال52 من عمرها محجبة  تعمل في احدى المصالح الحكومية .. ولذلك لا تمتلك سيارة خاصة بها لديها من الابناء اثنين زوجة لرجل متوسط الحال يكاد يتغزل في الطبقة الفقيرة ومترسب في قعر الطبقة المتوسطة المنقرضة بطبيعة الحال في بلدنا ولا ينعش حال هذه الاسرة المهدده بالافلاس نتيجة لإن ولديها الاثنين مكبلين بالثانوية العامة الا مرتب مدام اميمة الذي يذهب كله ولا يتبقى منه شيئ بعد يوم 22 في الشهر  

في منظر خارجي روتيني جدا تخرج كعادتها هذه المرأة بعدما نفذت طاقتها الكلية تقريبا ويلازمها الصداع الذي يتسبب فيه بطبيعة الحال ضعف ابصارها من كثرة التدقيق في الملفات .. ومتثاقل وزنها بسبب كمية الماء المفقدة من جسدها وقد اصبحت علاقة الماء  بملبسها كالعلاقة الحميمة بين الماء و قطعة الاسفنج وهذا شئ طبيعي .. ففي المصلحة الحكومية التي هي بها لا تزال برمجة عقولهم الصدأة لم تسمع عن شئ اسمه تكييف .. لا يزالون يعتمدون على المراوح التي لا تفعل شيئ ابدا مع كثرة التكدس السكاني داخل هذه المدينة المزدحمة المسماة "بالمصلحة الحكومية" ...وهذه المصلحة هي دولة داخل الدولة تمشي بقوانين مختلفة تماما فهي أم الروتين 

والسبب الرئيسي في اصابة ثلاث ارباع المسافرين داخلها بالضغط والسكر  والجلطات 

ورئيس هذه الدولة المسئول عنها وهو مدير المصلحة لا يقوم بالصرف على هذه المصلحة ليس للفضاء الدائم للخزائن والميزانية كما يزعم البعض من المديرين

ولكن لأنها مصلحة حكومية قانونيا اذا تبقى مبلغ كبير في خزينة اي مؤسسة حكومية فتوزع الارباح على مدير هذه المؤسسة وحاشيته على حسب الغزالة  

تتحسر على حالها و تنظر في ساعتها ويعبس وجهها .. ينتظرها منزلها الذي لا يعتمد سوى عليها.. اسرة كاملة لا تنتظم حياتهم الا بها ..سواء من اعمال المنزل الطعام والنظافة والمال وغير ذلك من مهمات النساء المرهقة كمهمات فرق الكوماندوز 

تنساق دائما مدام اميمة لأنها قد تعودة على ذلك وتذهب لتستقل "الميكرباص الاول " من اول الشارع الذي يذهب بها الى الشارع  الرئيسي حيث تستقل "الميكروباص الثاني"  الذي يأخذها مباشرة الى باب بيتها بعد طول عناء

تركب مدام اميمة مركبتها الاولى .. والتي كالعادة يكون سائقها "مبرشم"ويستمع الى بعض اغاني الاشباح التى تسمى"المهرجانات" و التي لا يفهمها عادة سوى ابناء الجان و قانتي الاحياء الشعبية من فئة عمرية صغيرة 

يصرخ السائق .. اربعة ورا أفنديا..وتبدأ بعدها ملحمة "لم الاجرة" التي دائما وابدا تكون .. وها هي امنا اميمة تتصبب عرقا من كثرة الحر والزحمة 

توصلها مركبتها الاولى في سلام وامان فتنزل لتعبر الشارع لتستقل مركبتها الثانية .. وتتعجب السيدة "يا سلام الطريق النهاردا مش زحمة زي كل يوم اكيد حوصل بدري" تعبر اميمة منتصف الشارع الرئيسي بصعوبة ثم تبدأ في العبور في النصف الثاني

واذا بسيارة مسرعة .. يركبها شاب اخرق عديم المسئولية يصدم هذه الام ..فتتطاير الام من قوة الصدمة بعد ان عانق جسدها حديد السيارة  فتلف في الهواء لفتين وترطتم رأسها اولا بالارض فيستقر جسمها بعد ذلك ممددا .. واذا بأول قطرات تتساقط من فمها مندفعة تجر ورائها شريط عمرها الذي يمر بسرعة امام عينها ولا يعلمه الا هي وخالقها 

ولا تسمع من هذه الدنيا سوى خلفيات لاصوات كلاكسات لا تبالي وواناس يصرخون .. هاتوووووو الاسعاااااااااف 

وتمر خمسة دقائق ويبدأ الطريق المنساب يتكدس .. سيارات سيارات سيارات .. اناس كتيرون..وسيارات كثيرة على بعد 4 كيلو لا تعلم ماذا يوقفها .. 

والغريب انه ليس من جهتها فقط تكدس المرور .. ولكن نصف الطريق الاخر الذي قد عبرته توها قبل الحادثة توقف هو الاخر 

والذين حولها فقط هم من ينتظرون الاسعاف وبعضهم .. جاء لينظر فقط .. غلاسة .. مش اكتر 

وتمر السيارات متتالية بتصوير بطئ .. هو لن يساعدها ... ولن يوصلها الى مستشفى .. ولكن يمر بجانب جسدها ويشق دمها المنساب على الارض بأبطئ تصوير بطيئ .. وهو ينظر فقط .. ويتكدس المرور اكثر واكثر .. ويصرخ الناس من حولها في السيارات "امشي يا عم " وبردو السواق يستهبل ويمشي بالراحة .. فزمن مرور السيارة بعد ان رأي الجثة ملقاة على الارض هو 3 دقائق لكل سيارة

ثم يأتي من بعيييييييييييييييييييييييييييييييييييييييييد

صوت سيارة الاسعاف التي تترجى السيارات "لو سمحت وسع شمالك .. فضي شمالك يا ملاكي "ولا احد يهتم والكل يمشي امامها  ويعوقها لينجح في الهروب من الزحام 

ولاتزال تحاول سيارة الاسعاف الوصول ..لانقاذ اي شخص يموت في هذه اللحظة ... حتى الان 

الان فقط.. اميمة قد ماتت

ومات مستقبل اسرة

الان .... وصلت عربة الاسعاف.. هل من منقذ ؟؟ 

!!!!

معارك

مسعى 

طريق طويل متقطع غير معلوم الاتجاه والمنتهى 

صراع بين اشباه احلام 

لمس اكتاف 

خليط بين حبات العرق والدموع 

يأس 

استسلام

الاحباط يولد في جوفه الطموح

فيبتلعه الاول 

نقد ضعيف .. يحطم سلسلة انتصارات قليلة قد مضت

ويقضي على مستقبل مليئ بالاحلام 

قليل من يتكأ على نقد وجه له 

واقل من يتخذه سلم يصعد عليه 

ليصل الى كمال منقوص

ويلمس تاج احلامه الذهبي

ولكن من لم يقوى ..يضمحل طموحه

ويعود ادراجه 

فيتطاير حلمه 

ويتلاشى 

يبدأ بالتفكير 

هل ما افعله حرام ؟؟؟

ماذا عساي ان افعل إن كسبت دنياي وخسرت اخرتي

قد يكون محق في بعض اعماله 

ولكنه في المجمل يكسب معركته ضد نجاحه

وينتصر فشله 

فيبرر يأسه بسراب 

فمن بعد ايمانه 

يقول هل اترك دنياي من اجل اخرتي 

!!!!

ماذا افعل 

وإن عاد الى دنيته 

يقول ءأترك اخرتي من اجل دنياي 

!!!!

ماذا افعل 

تضاد 

شيطان

نفس أمارة بالفشل عند بشاير النجاح

سواء كانت في الدنيا او في الاخرة 

حيرة 

احباط 

معارك

تحيا شركة لينك راعية النصب في مصر

في شهر ديسمبر سنة 2011 قمت بالاشتراك في احد عروض شركة لينك في احد فروع الموزعين .. فرع الغرفة التجارية بالمنشية .. في عرض اشتراك بسرعة 2 ميجا بايت لستة شهور بنصف الثمن 115 جنيه.. ثم العودة بعد 

الستة شهور الى ثمن السرعة الحقيقي المضاعف وهو 230 جنيه 

فقررت ان اشترك في هذا العرض لمدة الستة شهور .. واقوم بتقليل السرعة قبل انتهاء المدة ...وهذا قانوني تماما ولم يرد به اي شئ مخالف لذلك عند الاشتراك 

وقبل انتهاء العرض في مدة الستة شهور ..بشهر كاااااااااااامل ... ذهبت الى هذا الفرع الموزع .. لدفع اخر شهر وتقليل السرعة قبل انتهاء العرض .. قالت لي الموظفة على الشباك .. لا لن اغير لك السرعة الان .. عند مجيئك لدفع الشهر القادم مقدما سيتم تقليل السرعة ....

فذهبت قبل يومين من استحقاق الفاتورة للشهر التالي وتأخري كل هذا لتسليمي مشروع تخرجي من الجامعة .. المهم  .. قبل العودة الى السعر الحقيقي لل 2 ميجا ... فقلت لها اريد تخفيض السرعة فقالت لي الموظفة لا يحق لك طلب تخفيض السرعة قبل اسبوع .. قلت لها ان ده مكانش بيحصل " قبل كده راحت قايلالي ده قانون نزل "الشهر ده " قلتلها اعمل ايه انا دلوقتي انتي قولتيلي اني اجي قبل الشهر ما يخلص .. قالتلي اه انا قلتلك كده بس انا مش حقدر اعملك حاجة وحتدفع الفلوس كاملة الشهر ده 

استسلمت وقلت فوضت امري لله ودفعت ال 230 بتوع الشهر .. الشهر الماضي من الان 

وفور دفعي المبلغ قمت بطلب تخفيض السرعة عن طريق الانترنت من يوم 30 يونيه الى 10 يوليو .. وتم قبول الطلب بالفعل وانتقل قيد التنفيذ يوم 17 في انتظار تقليل السرعة .. في انتظاره .. في انتظاره .. لم يتم تقليل السرعة .. واتى يوم الشهر الجديد يوم 23 تاريخ بعثي بهذه الرسالة اليكم والذي من المنتظر تقليل السرعة الفعلي فيه الى 1 ميجا .. وهو تاريخ بداية استحقاق شهر جديد مع الشركة .. 

فوجئت بعد تغير السرعة ..

اتصلت برقم خدمة العملاء 16333 ... فرد احد الموظفين .. وبعد اطلاعه على البيانات اخبرني بأنه يعتذر عن خطأ عدم تقليل السرعة وانه خطأ من عندهم ..وقال لي انه حان دفعك للشهر الجديد .. بثمن 230 جنيه .. فعندما ثورت عليه وقلت له ماذنبي انا في هذا انه خطأكم قال لي هناك حل وسط .. حضرتك تدفع 230 جنيه وانا عملت لحضرتك طلب تخفيض السرعة .. وفرق الفلوس حضرتك حيتحط في حسابك للشهر اللي بعده وكلها يومين عمل وسرعتك تتعدل ل 1 ميجا بتاريخ 26/7/2012 قولتله ماشي قاللي بس لازم حضرتك تدفع النهاردا .. قولتله حاضر .. من عينيا ..

رحت في تمام الساعة التاسعة والنصف الي الفرع الموزع وكانت في استقبالي موظفة اخرى تدعى نشوى .. قلت لها رقم تليفوني وقلت لها اود تقليل السرعة .. انا جي ادفع اهو الشهر الجديد وعايز اقلل السرعة قبل شهر كامل .. " اهو عداني العيب وازح كمان .. اخبرتني انه من شهر .. تم تنزيل قانون جديد .. ماينفعش اللي في العرض اللي انا فيه "بس" انهم يقللو سرعتهم ...... رحت قايلها انا الكلام ده ماتقاليش قبل كده ولما كلمت 16333 بشأن الموضوع مقاليش كده وده اصل المركز الرئيسي اللي انتو تابعيين ليه ..راحت قايلالي لأ ده موظف مش فاهم حاجة .. ماينفعش حضرتك تغير سرعة قبل 23/12/2012 وحتفضل تدفع 230 جنيه .. القانون نزل من شهر .. قولتلها طب ازاي القانون ده يتنفذ بأثر رجعي .. قالتلي القانون ده نازل للعرض بتاعكم بس ...

وانا اراهنكم حروح يوم 23/11/2012 حيقولولي نزل قانون جديد ولازم تفضل تدفع نفس المبلغ لحد سنة 2027 

ولما اتنرفزت قولتلها عايز الغي التعاقد .. قالتلي ماينفعش حضرتك تلغي التعاقد قبل سنة من تاريخ التعاقد ......... انا اتعمل عليا كماشة 

والكلام ده مش ليا انا بس لكل اللي مشتركين في نفس العرض ده

فيييييييييييين حماية المستهلك  

إن الفراغ لقاتلي

إن الفراغ لقاتلي .. 

عدو سلمت له نفسي واستسلمت 

وصلت لنهاية مطاف معلوم 

وشردت في طيات المجهول 

قطار طالما طار على قضبان الماضي 

حتى وجد نفسه يطيح من القمة متجها الى القاع

لا يوجد تحته الا الفراغ

أهو خاضع لقانون القصور الذاتي؟

وسيأتي عليه الوقت ليتوقف تماما ؟؟

دون نجاح .. دون طموح 

ام ربما تنبض فيه من جديد الروح 

كرة على منحدر 

وقعت تحت رحمة قوة الاحتكاك 

كبحت قوامها

 فأنتقلت من تكبر السادة الى شوق العبيد

تستنجد بأي شيئ جديد 

روتين .. لعين

ليس له دين

أمل سجين
يعد الايام تلو السنين

عدّاء فقد الامل في اللحاق بمن سبقوه 

سباح ضل الشطئان

فقتله الاستسلام

الظلام