احلامي واحلامي

ممكن يكون طموحي كبير والكل شايف اني طموح اوي اوي وممكن يكون في ناس جواها بتقول هو (مسعا) بيفكر في ايه
ياااااااااااه دي كلمة كبيرة اوي ...بفكر في ايه
احلامي ممكن تكون تتعد على الصوابع بس في داخلها كلها مصاعب ممكن مايقدرش واحد يجمعها كلها مع بعض
وانا صغير (فلاش باك والدنيا رمادي ) امي كانت بتقوللي " انا حاسة انك حتكون حاجة كبيرة اوي " ياااااااااه الكلمة دي ممكن تكون الحاجة الوحيدة اللي فاكرها من طفولتي من وانا عندي 5 او 6 سنين تقريبا بخلاف التلت صفعات اللي تلقاها خدي في حياتي
هي دي طفولتي صحاب وجملة وتلت اقلام
ويمكن لو فكرت امي بالجملة دي حتقعد تضحك لانها هي كمان فاكرها اوي
ولما سألتها قبل كده " ماما انتي قلتيلي الجملة دي ليه؟؟؟؟" راحت قايلالي " محمد انتا كنت زمان وانتا صغير بتعمل من حاجات صغيرة ممكن تكون ملهاش دعوة باللعب اصلا حاجات ممكن يتلعب بيها ... قلتلها وده يعني ايه راحت قايلالي كنت مبتكر
مش عارف لحد النهاردا الجملة دي محفورة في نفوخي معرفش ليه مع ان ممكن واحد تاني لو اتقالتله يا اما مايفهمهاش يا اما مايفتكرهاش يا اما ينفضلها اصلا
جايز في طفولتي ممكن اكون كنت باخد حاجات اعمل بيها لعبي او بتخيل اني بكلم حد وبمثل معاه مثلا واحدة اتقتلت وانا كنت بدافع عنها لحد ماتتقتل ولحظة اما تتقتل اقعد اعيط مثلا " مش عارف كنت عيل مجنون" يمكن جايز كان نفسي اكون ممثل وانا صغير ممكن اكون اكتر طفل اتفرج على افلام وهو صغير اكمن كانو ابويا وامي كان شغلهم بعيد عن بيتي وده خلاهم يودوني مدرسة قريبة من شغلهم
وكنت لما اروح من المدرسة كنت بقعد عند ستي لحد الساعة اربعة تقريبا او خمسة كل يوم يعني كنت بقعد عندها اكتر ما بقعد مع ابويا وامي
او بالاحرى كنت بقعد مع التلفزيون اكتر ما بقعد مع ابويا او امي وستي كمان
بس اللي خلاني اتخلى عن الحلم ده اني الدغ....للاسف ودي حاجة مسببالي مشكلة لحد انهاردا
وانا في خامسة ابتدائي ابن خالتي احمد كان جايب اورج جديد غير اللي كان عنده لان القديم كان صغير اوي اوي 2.5 اكتاف فا لما جاب ال5 اوكتاف اداني الاورج الصغير ومن هنا بدأت اتجه بنظري للمزيكا واشوفها حاجة حلوة
فا حاولت مع نفسي شوية بس كنت مش عارف اتحرك
فا راحت امي جايبالي مدرسة المزيكا الي معاها في المدرسة ميس هند ودي كانت مزة جامدة جدا ويمكن هي اللي اتطبعت في مخيلتي لحد انهاردا انها تكون فتاة احلامي المهم علمتني حوالي سنة الا شوية وبعدين اتجوزت وسافرت دبي
بس انا كنت ساعتها بعافر في العزف
فا كملت مع نفسي في محاولة لتجميع معلومات كتير في المزيكا واني اجيب اي نوتة تقع عيني عليها او اسمع اي اغنية واعزفها وبقيت بجمع كتب مزيكا وهكذا
بس عمري ما كان حلمي اني اكون عازف بارع يعني او اني اطلع على مسرح واعزف على الرغم انها حاجة بتشدني اوي وساعات بسأل نفسي حتعمل ايه لو انتا فوق بتعزف على المسرح !!!!
الحاجة اللي بعديها اللي عملتها لما كنت في اولى اعدادي كنا ركبنا الدش ايام ما كان الدش له قيمة وكان في قناة سبيس تون وطبعا كأي طفل عنده حرمان طفولة من التليفزيون المصري فا كنت بقعد طول النهار على القناة فا كنت بسأل نفسي هي شخصيات الكرتون دي بتترسم ازاي؟؟؟؟ ومن هنا قررت اني اجيب كراسة رسم وارسم فا كنت بثبت الصورة وبفضل ارسم لحد ما قدرت اطوع ايدي كويس
بس الموضوع ده مافضلش معايا كتير هما سنتين ونص بالظبط وبعدين الاعدادية اكلتني وكان ضغط اللي حواليا بقا لازم تجيب مجموع كويس فا العادة دي بدأت تسحب ايدها مني واحدة واحدة لحد ما بطلت ارسم
وقعدت لحد صيف تانية ثانوي مش بعمل حاجة في حياتي غير اني بعزف وقليل جدا كمان
وكانت اول محاولة ليا اني اكتب اغنية فا كتبت حاجة كده كانت رديئة جدا في المعاني
بس كانت موزونة تمام الوزن اهم حاجة كانت بالنسبالي فا كتبت اللي بعدها واللي بعدها وفضلت اكتب لحد انهاردا
وبعدين معرفتي بالمزيكا خلتني احاول الحن ولحنت فعلا حاجات قوية وبمقامات مختلفة ولسة بلحن لحد انهاردا
وعرفتي بالمزيكا بردو مع التأليف الموسيقي والتلحين والكمبيوتر ساعدتني على التوزيع ولسة بعمل كدة لحد انهاردا

يمكن طولت في الموضوع شوية في سرد الماضي بس الموضوع بدأ من هنا:
نفسي جدا اكون الملحن رقم واحد في الوطن العربي
نفسي اكون احسن شاعر غنائي في مصر
نفسي ابقا احسن موزع موسيقي في العالم ( يمكن دي واسعة شوية)
نفسي اكون صحفي او بمعنى اصح كاتب ساخرلدرجة اني بجهز طول مانا عايش او على قد ما اكبر لكتاب محتفظ بأسمه لنفسي
نفسي اكون معماري شاطر
نفسي ابقا مدرس جرافيك ومطلوب عالميا
نفسي اكون مخرج سينمائي على الرغم اني ماسعيتش ليها خااااااااالص بس عندي احساس اني لو اتحطيت في المجال ده حسد
للاسف نفسي ابقا ممثل (على الرغم من اللدغة بردو)
كان نفسي يكون صوتي حلو (ده مايمنعش اني صوتي يجي منه يعني ) على الرغم من اللدغة بردو :D
نفسي اتجوز واحدة طيبة تخاف عليا وتحبني تكون جنبي واكون جنبها
نفسي اخلف طفل قبل ما يشيل اسمي اسمه يتشال من قبلي واشوفه احسن واحد في الدنيا
نفسي ربنا سبحانه وتعالا يكون راضي عني وابويا وامي يفتخرو بيا
نفسي اكون جريئ ومخافش
نفسي اثق في نفسي
نفسي ماتذلش قدام حد نفسي افضل قوي
نفسي بعد ما اموت الناس تفتكرني
نفسي اشوف الانبيا كلهم
نفسي اشوف ربنا سبحانه وتعالا
بعد كده مايهمنيش ادخل جنة او نار

شفتو انا قنوع ازاي :D:D

الجن الياباني

جالي الاسم كده في لحظة صفا بعد ما شفت في اليوتيوب فيديو عن اليابان والغريبة انه فيديو كان عن العمارة في العالم وتطورها وده عشان شفت ازاي شفت ان اللوحات المضيئة في الشوارع والاماكن العامة بتنور حياتهم اكتر من لمض الشارع....
اليابان بدأت تطورها من اول ما الامريكان ولاد الامريكان ما ضربو هيروشيما ونكازاكي واللي سببها مات الكتير وحصل تشوهات في الاجنة لمدة سنين طويلة
واللي حصل في الحادثة دي ان طيار امريكاني كان رايح في مهمة لليابان والظباط بتوعه قالوله ارمي الحاجات اللي معاك دي واجري.. واكمن السواق كان طيب ومايعرفش ان اللي معاه ده نووي حيموت بيه ناس اللي حصل ان الطيار ده لما شاف اللي حصل لليابان ...اتجنن
ومن هنا بدأ (ين) يتحول الى (جن) ....في كل حاجة اقتصاد وعلم وفنون ودولة وقوى عالمية ..وعلى الرغم من اللي عملته فيهم امريكا
الا انهم دلوقتي بيموتو في حاجة اسمها امريكا وبيدوبو في تراب امريكا .. لدرجة ان في ناس من امريكا لما شافو حب اليابانيين ليهم بدأو يعلمو الياباني في الجامعات
البلد دي اثبتت بشكل قوي اوي اوي
ان القوة مش بالامكانيات زي ما البشوات اللي عندنا ما بيقولو .لان اليابان بدأت من لا شئ من حبة تراب واجنة مشوهين الى عمالقة اسيا وقريبا رواد العالم
مين كان يصدق ان الراجل القصير ابو عنين ضيقه ده ممكن يسود العالم ....بالعلم ....اليابان اولا عبارة عن حبة جزر الناس قالو يلا بينا ننضم على بعض ونعمل دولة وكلنا نعرف الياباني بانه الراجل القصير ابو عنين ضيقة وبيوت هرمية منحنية الشكل من فوق ( ده قبل العمليه) انما بعد العملية اليابان ام ناطحات سحاب محلقة في الفضاء الوردي ...متهيألي المباني دي من علوها هي اللي خرمت الاوزون

لو عملنا رصد لحالة الياباني قبل وبعد
في العمل ...قبل الحادثة كان بيشتغل شغلانتين والباقي تحصيل حاصل يا اما كان شغال في صيد السمك ودي المهنة الرئيسية والمهنة اللي بعد كده هي زراعة الارز ...............دلوقتي بقا الياباني وبلا فخر من اعظم رجال اعمال في العالم واحد من احسن المصممين المعماريين ياباني وهو تاداو اندرو والشغل في البنوك والاستثمار ورسم الكارتون والجرافيك وصناعة الكمبيوتر والمواد السلكية واللاسلكية والتفوق الالكتروني حتى على امريكا اللي هما كانو بيضربوهم وفرحانيين ان اليابانيين دول خوبوءات
ده لدرجة الكارتون هما اللي مسيطرين عليه منذ طفولتي المشردة المحقق كونان وابطال الديجيتال وبوكيمون من ايام ما كنت مسخوط في رابعة ابتدائي
والعقدة دي تأصلت حتى في جيل التمانينات حيث الانتقال من عصر ماما نجوة وبقلظ وبرنامج عروستي الى عصر مازنجر وجرندايزر

وكله بقا الا العربيات اللي مالية الشوارع بجميع انواعها . واحنا لغاية انهاردا متمسكين بالحنطور وبنقول عليه تراث .. انا نفسي نتخلص من الكلمة دي الحاجة مهما قدمت وحافظت عليها حتعمل بيها ايه دي وصلت عندنا لحد المرض النفسي فعلا
زي الناس اللي مش بيتخلصو من الحاجة زي الراجل اللي مش بيتخلص من علبة السجاير بعد ما بيخلصها وعنده اوضة مليانة كراكيب
لانه خايف يفرط في حاجة
وده لان في اعتقادنا ان الفراعنة لما جم عملو تاريخ يجب علينا احنا الاحتفاظ بيه فا لازم احنا في حضارتنا المعاصرة الاحتفاظ بحاجاتنا عشان تقعد للجيل اللي بعدنا
مبدأيا الفراعنة مكانوش بيفكرو في كده هما كان بيفكرو في الحاجة على اساس انهم كده كده ميتين ميتين خلاص يبقا اعمل لدنياك كأنك تعيش ابدا واعمل لاخرتك كأنك تموت غدا .. وبعدين الفراعنة مكنش عندهم حد يقلدوه زي ماحنا بنحاول نقلدهم

انا ليا واحد صحبي كان على طول عالام اس ان على طول حاطط صور فراعنة وكان منبهر بيهم ابهار اعجاز
لما شاف الناس اللي برة بيفكرو ازاي في كل فتفوتة نسي حاجة اسمها فراعنة وبطل يتكلم عنهم اصلا لان فعلا ماينفعش حد يمشي وهو باصص وراه .. اكيد حتخبطه عربية معمولة في اليابان
لان التاريخ فعلا عشان نتعظ منه ونعرف راسنا من رجلينا مش عشان نقلده
وكل يوم بيتثبتلنا ان احنا متخلفين جدا ... لما ناس الفراعنة اللي هما من سبع تلاف سنة كانو متقدمين عنهم مش مكسوفين من نفسنا واحنا متذيلين الترتيب الآدمي في القرن الواحد والعشرين الميلادي
!!!!!!

Ms3a_miso

للاسف ... مشروع

للاسف زي كل مرة عندي مشروع وزي كل مرة خايف بردو وزي كل مرة مكتئب وزي كل مرة زعلان
عندي مشروع دي حاجة مش جديدة مانا المشاريع اللي بتبقا في كليتي دي حاجة عادية ومتعود عليها ماهو لازم اتعود وانا عندي حوالي مشروعين في كل تيرم ...ودي مش مشكلة يعني
المشكلة اني بضطر اتخلى عن هواياتي عشان ماتعطلنيش وان لازم تفكيري يكون منحصر بس في المشروع عشان ماتشتتش
اني افكر في مبني حيكون ازاي والناس حتتحرك ازاي حيشوف ايه قدامه وبتخيل تحركه جوا مبني انا مفتكسه
بحس ساعات ان شغلانتنا دي قريبة من شغلة الحرامي ..بس الحرامي بيجيب المساقط بتاعت المكان اللي حيسرقه ويفكر ازاي حيسرق فيه وحيدخل منين وكده زي فيلم غبي منه فيه..بس احنا العكس احنا اللي بنعمل المساقط اللي لازم حيجيها اليوم وتتسرق بمعنى اصح احنا اللي بنعمل المساقط اللي الحرامي بيجيبها عشان يسرق المكان..يعني احنا بنساعد الحرامي ان هو يسرق
يبقا العمارة حرام :D

المشكلة التانية اني خايف من حاجة وهي اني اتعب نفسي اوي وفي الاخر الااقي نفس الدرجة اللي بتطاردني من اول المشروع 55 كحكتين عشان الحسد اللي جبتهم في السكيز وفي اي سكيز بيتعمل من اول مادخلت الكلية

مكتئب لاني للاسف انا المسئول عن مشروعي ده بكل مافيه من اخطاء ... وده لان مافيش حد بيصلح معايا.. وكل ماروح اصلح مع بشمهندس (س) اللي ماسك مجموعتي وبيصلح معاها يقوللي نفس الجملة واللي هي " انا عايزك تحلم اوي وبعدين تقنن حلمك ده "نفس الجملة هي هي حتى لو عملت ايه اقوله طب يا بشمهندس عايز اصلح الحل يروح قايلي لا مش حصلح معاك !!!! طب انا اعمل ايه
يبقا مافيش حد غير اني اكون انا المسئول عن كل حاجة مهما كانت الغلطات ومهما تكون الدرجة
وبتمنى اني اجيب درجة عالية عشان اكون بجد اثبت لنفسي اني اخيرا بقيت مهندس ناجح اللي هو اصلا مش اسمى احلامي "انا كل اللي عايزه اني اكون مهندس كويس مجرد كويس يعني العملا (الجواسيس ) يذكرو اسمي بالخير بس مش اكتر لا عايز اكون معيد ولا دكتور ولا اكون كل مرة جايب امتياز ولا بتاع انا عايز الناس تتكلم عن شغلي ودماغي بأنها حاجة مختلفه ومن طينه تانية

وزعلان لاني من جوايا نفسي اصلح حاجات زي مثلا قناعتي بأن درجة المشروع واني الاقي كتلة حلوة وفكرة واو دي حاجة ليها علاقة
بأني اكون انسان نضيف او ان في خلل في نفسي لو اني مش موفق في اني الاقي حاجة وبفضل العن الحظ وآكل في نفسي.. على الرغم ان الموضوع كله الهام من عند ربنا بالاضافة الى الاجتهاد واحتواء الموضوع وانك توصل حاجة مختلفة بصورة جميلة

ناس كتير بتبصلي على انا مش راضي باللي ربنا قاسمه ليا
بس انا عندي كونسبت ماشي بيه في حياتي وهو اتعب نفسك في كل حاجة .. فالسماء لا تمطر ذهبا

علم المدارس ضيق علينا
ولا ميت اكس بتكون مقاسنا
و النور ضلم وغطا عنينا
بدل مايعلي بيخفي احساسنا
والطب بدال ما يزيل في الامنا
من جواه يكتم انفاسنا
اللي قال العلم في راسنا
بعد ماقالو انه في كراسنا
كان عجوز واستنجلينا

قال وخرف بشئ يشرف عشان يقولو عليه حكيم
واصطدامه بعكس قولته من طفولته في السبق له واقع اليم
والمناهج ما لها منجا ..كبيرة جدا
وللوزارة العيشة منجه ..وحلوة جدا
ولكل جيل مهما اتغيراساليبهم....بيتعاملو على طول معاهم بأسلوب قديم
وكم كم ولم لم بس الكتاب في المعلومات عامل رجيم

عملة نفسي

قطرة ندى في الصبحية بتندي شباك عربية
وسكوت وساكن في الحتة وعالصبح ضلمة مغطية
صوت الكلاب واضح وصريح و وكر عصافير بتزقزق
ولسة قايم من نومتي وجفن عيني بيتلزق
في جفن اخوه ولا إني افوق ولو راسي تحت الحنفية

ماتقوم يا ميسو عالكلية دي لونها بمبة النموسية
يا صلح بقا سبني شوية بحلم بلحن في اغنية
وبعد غلبي وقلقاني
قايم ببرطم بلساني
ياما نفسي ارجع لسريري لكن لابد التضحية

بعد الفطار والتغذية بلبس هدومي وبتعايق
عيال معاهم عربية .. وانا نفسي اكون مرة السايق
واركب مواصلة ولكني بضحك
شايف امالي في بكرة كبير
بكرة الحياة تتدردحلك
وتكون حكاية من الاساطير
ولما اغرق في خيالي اكون وصلت الكلية
مع اني بضحك !! على طول صحابي شايفيني ديما متدايق

شايفيني قدوة في التكشير مع اني انا جوايا عادي
تمثال وقابل للتكسير وبراءة عيل في اعدادي
كاشفني ناس كتلة طيبة
وشايفني ناس نفخة رهيبة
وكأني انا حاجة غريبة ومتمادي انا في استعراضي

وناس في خوفها تكلمني وناس تخاف تقرب مني
اكمني شادد اعصابي وروحي ساكنة في ركابي
يمكن اكون عصبي شوية بالسلب ويا الايجابية
عصبي في مشاعري واحساسي
عصبي ويغلي الدم في راسي
واصيح وازعق من روحي عشان اعود للآدمية

ورغم كده الطيبة مني بحلم احقق احلامي
واكتر حاجة تطمني اني احس بكياني
مبدع وعايش في الخضرة
طاير وواصل للسدرة
لكن اخلاقي بتحرقني لوعديت خط اماني

Ms3a_miso

مصر هي امي ؟؟؟ امال ابويا فين !!!

متربيين طول عمرنا على كلمة مصر هي امي (يعني الست اللي ناعتة في قلبها عشان تأكل عيالها وعيالها مالهومش في حاجه غير الاكل) بس لو جينا نبص للوقت اللي احنا فيه دلوقتي وازاي مصر اتغيرت في 10 سنين
كنا زمان مش لاقيين ناكل و تعبانييين نفسيا وفي المعيشة كمان
واوروبا وفي الدول المتقدمةكانت الحياه فلة شمعة منورة عايشيين اخر عنطظة وبيلعبو بالفلوس لعب
وعايشيين في نفسية مثالية وبياكلو كويس
وده طبعا على الانسان المتوسط الدخل

دلوقتي في الوقت اللي احنا فيه ده زي اللي راقصيين عالسلم بس الفرق اننا شايفين اللي فوقنا بس هما مش شايفنا وسامعيين اللي تحت بس مش بنفزلهم طلباتهم
بمعنى اخر اه في فلوس في البلد ومتوسط االدخل ارتفع عن زمان ومعانا عربيات وكل حاجه بس ناقص الناس اللي بتشتغل كويس وبتحرت قلبها

اعرف واحد معايا في الدفعة دخل حزب وطني ... قلتله ليه يا حرحش دخلت حزب وطني
مرتاح فيه انا قلت يمكن حلو فا قلتله طب ايه السبب الحقيقي ورا دخولك الحزب
راح قايلي ان الرحلات رخيصة وطول ماهو ماشي بيدعو الناس للحزب (الظاهر على كل راس بيدخلها بياخد فلوس ولا ايه ) واستشهد بأغنية لعمرو مصطفى كان بيقول فيها يا وطني ( ماقالش بدالها يا وفدي مثلا ) فا قعد يقوللي على مزايا الحزب الرحلات ودريم بارك بعشرين جنيه وكده
وان في ندوات ومش عارف ايه ولك في البطيخ
فا في وسط ما هو بيتكلم كان بيبدأ بجمله وينهي بجملة تانيه
كان بيبدأ بيقول ان الناس مش بتشتغل كويس في وظايفها وكل واحد فاكر نفسه رئيس جمهورية في شغله وبيتحكم في اللي تحته عشان كده البلد مش بتتطور
فا قلت ماشي الواد عنده حق وكده
بعدين بيختم كلامه بأن البلد مافيهاش فلوس انا وقفت عند دي وصوتله بقا
مبدأيا لو البلد مافيهاش فلوس ماكناش عملنا ستاد برج العرب ومكناش بنعمل مشاريع معمارية كويسة في مصر والله عندنا حاجات مصروف عليها معتقدش ان واحد شغال في شركة فودافون حيكون عنده مشاكل اقتصادية ولا مديون ومشعارف ياكل وعنده العيشة لاموناتة باللبن

الدنيا ممكن تكون اه مقصرة مع ناس وناس لا بس في الوقت اللي احنا فيه اللي بيشتغل في مكان محترم هو اللي بياخد واللي شغال مع الحكومة (بياخد بردو بس حاجات تانية ) دون معيشة الفرد اصلا
وبعدين اصلا هو لو بيشتغل بضمير كان خد على قد شغله ومش شرط ابدا انه يشتغل شغلانة واحده لا يشتغل اتنين وتلاتة كمان ان امكن
النت دلوقتي بيسهل حاجات كتيرة اوي اوي اوي ممكن يشتغل وهو قاعد في بيتهم اصلا وهو قاعد على الجهاز ومرتبه يجيله لحد عنده مقابل الحاجة اللي بيعملها

الصح مش انك تقعد في بيتك وتقول مافي شغل
الصح انك تعمل الشغل وانتا قاعد في بيتك
تفرق كتير مابين واحد بيستكسل وواحد بيحرت نفسه طول النهار عالجهاز عشان يطلع حاجه ده انا بتكلم عالنت يعني اللي هو اقل مجهود حركة
كل المطلوب منك مجهود ذهني او ابداعي او حتى العمل لحساب شركة من منازلهم
بدال ماتعتمد على مصر انها تأكلك وان هي امك
لا خليك انتا ابوها وانتا اللي اصرف عليها

متضايق اوي ومعنوياتي في الحضيض

انا كنت متخانق مع واحد صحبي (وكنت فاكر انه هو صاحب) وبسببه بردو اتخانقت مع حد تاني وبسببه بردو كنت بتخانق مع ابويا وامي في البيت لاني كنت بحس انه عايش عليا المستفيد الوحيد وبيمص دمي في كل حاجه
ممكن اكون سلبي اوي انهاردا بس انا كل ماكون سلبي وافش خلقي انا برتاح برتاح اوي اوي كمان
كنت مبسوط اني مش بكلمه وانا مش حاسس بنحيته اي حاجه زيه زي غيره يعني بس انهاردا عايزين يفرضوه عليا وخلاص
وانا اخري اني اقوله صباح الخير
لاني كده مستريح مستريح مستريح يعني مش بتكلم جوه نفسي يعني دماغي مش بتوجعني وعندي صداع يعني حاسس اني طاير مع الملايكا من الاخر
جم النهاردا وبكل سهوله عايزني ارجع اكلمه تاني بعد ما ارتحت
واساسا الحل ليا كان اني اتجاهل وجوده يعني زيه زي عدمه
بالنسبالي انهاردا فعلا القيامه قامت لاني كده مت او بمعنى اخر انتحرت لان اللي بينتحر مش بيكون في وعيه
اتخانقت مع حد مالوش علاقه بصاحبي ده بس كل اللي كان عايزه يصالحنا على بعض
وكل الفكره اللي اتاخدت عليا اني قليل الادب والذوق ومش محترم ووقح ومجنون ..... الخ

لو الانسان بيتاخد بالحاجات اللي بيقولها يبقا السكوت احسن وانا اصلا كنت ساكت لكن خرجوني بره نفسي افففففففففففففف
مش متخيلين انا شكلي عامل ازاي دلوقتي مسود وغضب ربنا على وشي
فففففففففف مش حعرف اكمل كتابه
وشكلي مش حكتب تاني اصلا
لان فعلا لما بتكون معنويتي صفر او متنرفز اوي كل حاجه عندي في الدنيا ماتساويش حتى نفسي والدنيا كلها

ده احنا

ياااااه رجعت تاني...... بقالي كتير مافتحتش البلوج وماكتبتش حاجه
وجه الوقت اللي لازم اسنفر فيه دماغي
وقولكم على حاجه على وقع الانفلونزا الجديدة زي الناس مابتحب تسميها (انتو عارفين طبعا ان الناس بتحب تفضل اسم الدلع عن الاسم العادي)

ماعلينا

كنت نازل من بيتي تاني يوم العيد باين او حاجه زي كده فا كنت نازل بكمامة من اول مانزلت وفتحت باب الشارع وامة لا اله الا الله بتبص عليا وبتضحك والقهوجيه اللي تحت بيتي و حتى بتاع المطعم المعفن اللي تحتي (بيعمل ساندوتشات معفنه الراجل ده ماتبقوش تجيبو من عنده)

ماعلينا تانية غير الاولانية

فارحت ماشي ولا سائل فيهم (وقلت ياعم فكك منهم وبيس ودي ناس مفوتة وقديمة ونفساوية ومنفسنة ومش خايفة على نفسها وكده يعني) طلعت عالبحر عشان اركب وصلت ان العيال الصغيره في الشارع يألسو عليا لا وغير كده مافيش مشروع عايز يركبني اصلا مع اني لازم اول واحد يركب دانا لابس كمامة يعني ... يعني ححميك من قبلي حتى يا اخي
هاااااا فين وفين لحد مافي ميكروباص رضا يركبني واصلا هو مارضيش هو ماخدش باله من الكمامة
اول ماركبت بقا
واخد باله من الكمامة لقيته راح خايف وقاللي ...ايه ده انتا لابس البتاعة دي ليه ....قلتله اصلا انتا مش لابسها ليه يعني الوقاية خير من العلاج .. فا سكت وبعديها لقيت طول مانا قاعد في المشروع الناس اللي بره المشروع قاعدين يتريقو عليا وعيل منهم قال .... الواد ده جاله انفلونزا خنازير
انا قلت يانهار اسود بيفسرو في وشي عايزين يموتوني بالحيا ...وكل مادا والسواق بيقلق (السواق ده صعبان عليا والله ) ها بقا جهل

ماعلينا تالتة مستقل بذاتها وذات هوية وكينونة خاصة

فا وصلت المكان اللي عايز اروحه اللي مش حقولكم عليه عشان سر (هي غتاتة ورذالة بقا ) اللي لفت نظري بقا ان شعبي الحبيب ذو نظريه رائعه وسديدة وكل الحاجات الحلوة دي
والنظرية بتقول( البس كمامة ليه مادام انا لسة ماتعدتش ؟؟؟؟.... الله !! امرك عجيب مانا لسة ماتعدتش يبقا البسها ليه ) شعبنا الوحيد اللي في الكون اللي حيلبس الكمامة بعد مايتعدي
عامله زي واحد كان بيقوللي قبل ماجيب الجيتار (هو انتا حتجيب جيتار لية مدام انتا مابتعرفش تعزف ) شوفو بقا قال يعن يالواد عاقل اوي ومدبر للفلوس وعلامة ماشاء الله عليه يعني سؤال دلوقتي هو البيضه اللي جت الاول ولا الفرخة؟؟؟؟؟
على فكره اجابة السؤال ده الفرخة لان البيضه مابتفقسش الا لو كان رقد عليها فرخه بدليل ان البيض اللي في تلاجتكو مش بيفقس

نرجع لمرجوعنا ياعم الحج هو مش انا لازم اجيب الحاجه الاول وبعدين اتعلم عليها ولا انتا ايه؟؟؟؟ هو الواحد حيلعب كورة ازاي وهو ماشافش كورة قبل كده؟؟؟؟

نرجع لمرجوعنا اللي قبليه اللي انا نسيته ؟؟؟!!! هو انا كنت بقول ايه ... ثواني ابص فوق وارجعلكو

اه كنت بقول ان شعبنا هو الشعب الوحيد اللي بيشقلب الحاجه ليه؟؟؟ بمبدأ خالف تعرف واحنا مش بنقلد الاجانب ولازم تكون لينا شخصيتنا
لازم نتعدي الاول عشان نحط الكمامة عشان مانتعديش زياده
!!!
اصلا لو احنا جدعان بحق ربنا بقا نعمل حاجه اللي بره مش حيعملوها
احنا ممكن نستغل ياما من الايد العامله " الصيع " وسمحوني في اللفظ لانهم قاعدين عالقهاوي مش لاقيين شغل
اننا بما ان حياتنا بعد كده قايمة على كمامة المفروض يكون زيها زي الجرافتة يتعملها موضة وباترن معينة كانوع من الجمال وبتوع الازياق يقعدو يأيفوها على المناخير ونستخدمها كاصناعة وطنية لانها فعلا في شكلها كده مش حلوه ومش عملية لانها مفتوحه شويه من فوق والهوا بردو بيدخل
فا اساسا احنا عيب علينا اننا نستهزق بحاجه المفروض اننا مانتريقش عليها لان بعد " التجريس اللي انا اتجرسته ده في الشارع "انا حرمت امشي بكمامة اساسا ده انا امة لا اله الا الله بقت بتضحك عليا
هو اه كان شكلي بيها عامل زي صب زيرو اللي في مورتال كومبات بس المفروض اني آخد بالاسباب يعني لان ربنا ممكن يكون كاتب لاي حد فينا انه مايتصابش عشان لابس الكمامة ومحافظ على نفسه

ده اساسا في الصين ايام السارس كانو عايشين كمامات اصلا وكانت صناعة وطنيه دول كانو بيلبسو القطط كمامات
شكلنا عمرنا ما حنتحضر لان مش المشكلة اننا نلبس الكمامة او لا المشكلة اننا بنضحك عالحاجة لمجرد ان مافيش حد تاني بيعملها وبنتريأ وخلاص على الرغم ان دي بردو حرية شخصية ولازم الواحد مايفرضش رأية حتى لو هو صح

انتا تنبهني بس ماتضايقنيش

Ms3a_miso

دلوقتي شوفو اول حاجه تتنشرلي في مجله او موقع رسمي

اقرو طفل شارع

في مجله ميكانو

http://mikanoo.com/do.php?id=1350

واكبر شكر في الدنيا للكاتبة الصحفية سحر غريب
رئيس تحرير مجلة ميكانو وصاحبة مدونة حماتي ملاك

طفل شارع

قماش مقطع وجلد شقق واللي لائمها هو التراب

هموم بتسري وخيول بتجري ورا خيالات السراب

قلوب بتصرخ مالوجع في الملأ الاعلى بتتسمع

وكل اللي مقدور عليه نرمي اللوم على الغراب

شوارعنا ياما فيها عيوب كلاكستها دقات قلوب و حيطه فضا وحيطه طوب

مين اللي قال ابن الغني يسكن في قصر وانا اللي اتمرمط في الدروب

واللوم عليا يرتمي اكمني انا من اهلي هربت

هو ابويا اللي حسني حمل كبير وفي القلب كبت

اقول ايه ربك كريم وهو بس بسري عليم و لا حد يفلت مالحساب

دوامه بر شدتني عطلت كل مايملكني موتت قلبي واحساسي ولجوه الدوامه شفطتني

من نوم عالارض منغير غطا وكل ايامي مرمطه

والجوع بياكل من ضلوعي وعيوبي خرجت عن حكم طوعي

تحت مسمى الكحرطه

والارض لافة على كعوبها... دايره ومن كتر تعبها من عدّنا تعب اللسان

وسط الزحام والمواصلات نسرح بفل في اشارات وملوك استعطاف الانسان

ملقف هوا للتيارات من كل اشي واشي

ايشي احمر واشي اخضر واشي لونه مشمشي

ولازم نقول للغلب حاضر ولازم اكون عالهم صابر ربك يكسيني في الشتا وقت ماكون انا سقعان

ايه ذنبي انا اذا كنت .... في الحال ده اول ماتولدت

لقيت نفسي امي الشوارع وابويا هو اللي مسّرحني

لو غلط اوحتى ماغلطش ماعدتش فارقه... بيلسوعني

اه لوكنت في حضن اهلي

اتعلم وكبر على مهلي

اشوف كبايتي من كل ناحيه

وعلم المدارس بيمرجحلي

فكري و اخلاقي وكرامتي ....معاني ناسيها اتمحت مني

Ms3a_miso

ضاع الحب اول اغانيا المنشوره

اول عمل ليا (يتنشر) في مجال اللي بحبه غنا وتلحين وتوزيع

اغنيه من تأليف اسلام محمد حسن مع بعض التحسين مني
وتلحيني وتوزيعي بالكامل وادائي الصوتي
للحفاظ على حقوقي لها كملحن وموزع
حقوق النسخه للستوديو بتاعي

Admin2

لينك الاغنيه وقولولي رأيكم بصراحه
بجد واتمنى انكو ماتكونوش معاهم معاهم عليهم عليهم عايز رأي صريح جدا جدا جدا
اسألكم الاغنيه حلوه تقولولي الاغنيه حلوه عشان ترضوني وخلاص
لا عايز رأي حق
واستمر ولا لا

وكل سنه وانتو طيبين بمناسبه العيد

لينك الاغنيه

ضاع الحب

يهان المرء او يهان

ما معنى ان تعيش منكس الرأس في وسط امة تعلو اعناقها
فإذا حاولت تقليدهم عجزت ان تكون مثلهم
وإن حاولت سبقهم عجزت السنتهم عن نسيانك ذكرها

ما معنى ان تكون في الغلال مكبلا ومصمت اللسان
والحكم حكم من كبّل والكرم كرمه ومضاد للامتهان
واذا اردت بالقول غالب لاحطاط الفكر والانقلابات
ذللت حقا واهنت حتى تسمع صرخاتك يهتز لها العنان

ترى الكريم باليد تصافح و بالسوط دمك يملأ صفائح
وهو يعامل باللين والرقه في الظلم دوما صوته الرابح
اما في خيره تباس الايادي ويقال سباقا في الخير بادي
علشان يداري ولماجي اكشف يقولولي كفايه بطل فضايح

دي ناس كريمه وفي بلادنا قيمه
في صلاتها تسجد وفي السراط مستقيمه
والله ابدا و بالعزه بحلف في عكس القبله صلاتهم مستديمة

السبحه في ايد و سكينه في التانيه
تسبح بشفه و تشتم بالتانيه
والله اعلم بكل نفس رباها ربي
مين نفسه شعنونه ومين منهم هاديه

محمد فوزي

يااااااااااه اخيرا حتكلم عن محمد فوزي فففففف
محمد فوزي ده حد بعشقه اوي

يمكن ناس كتير لما يجو اقول قدامهم محمد فوزي الاغلبيه مايعرفوهوش واللي يقرف واللي قول اخي واللي يقول ايه ده مين ده وحاجات كده
على الرغم انه في وقته كان واخد حقه تالت ومتلت على الرغم انه ماعش غير 48 سنه بس اتجوز تلت مرات وخلف اربعه
بس اللي بحبه في محمد فوزي هو قوته في اللحن لما بسمعه بحس انه بيلعب على اوتار الاحساس وبيسرق الكحل مالعين مالاخر
والحانه اللي كان بيفضل فيها مقامات كتير زي الحجاز و الحجاز كار والبياتي والنهاوند ومقام الكرد
واغنيته اللي تقريبا معلمينه بيها هي ذهب الليل وشحات الغرام ولو سألت حد تاني تعرف اغاني تانيه له يقول لا
لدرجه ان واحد قلتله انا بحب محمد فوزي اوي راح قايللي محمد فوزي مين
رحت قايله بتاع ذهب الليل فا عرفه بس بعد ايه
مايعرفش ان ليه اغاني اقل ما يقال عليه اسطوره في التلحين
زي داري العيون / حبيبي وعنيا / تملي في قلبي / يا ساحره القلب بعيونك / طير بينا يا قلبي /
فين قلبي فين قلبي يا ناس/ اللي يهواك اهواه /ياولاد بلدنا يوم الخميس / عالباب انا عالباب / راح توحشيني /الشوق الشوق
ولو بسيطو عندي في البلوج حتسمعو تحت اغاني من اغانيه
وكان الود ودي احطها كلها بس هي بجد عشرات من الالحان تتجاوز 120 لحن بكتير وكلها رائعه
ده غير الاوبريتات اللي كان بيعملها
والافلام الفظيعه
واكتر فيلم بحبه هو فيلم معجزه من السماء سنه 1950
لان الفيلم ده شبهي في حاجات كتير اوي اوي اوي

وحبي لمحمد فوزي مش مجرد حب مستمع لفنان انا بعتبره استاذي اللي بتعلم منه في كل حاجه الصراحه في الحياه
التلحين واحساس الموسيقا وبتعلم منه ازاي طلع السلم درجه درجه من الموالد والازاعه لحد ماتربع على عرش الاغنيه والسينما
ده حتى انواع الستات اللي بيحبها انا بدوب في تراب رجليها بجد ومعرفش ايه الصدفه العجيبه دي

وكان محمد فوزي الدغ زيي بردو وفي نفس الحرف هو حرف الره وكتير اوي مايخدوش بالهم في الحكايه دي عشان ساعات بيكون باين وساعات لا في كلام كلام يعني زيي بردو
بس انا لما بسمع محمد فوزي وبشوف روحه الحلوه اللي تجذب اي حد ليها وتخطف انتباه الناس
ولما بسمع شغله بحسه بيناديني وبيقوللي انتا اللي جي
ولانه بجد مثل اعلى ليا جدا جدا حتى في طيبته ومعاملاته مع المنافسين ووساعه فكره ومعرفته بطبايع الناس
ده غير موهبته المتفجره حتى في امضته في افلامه وتحويله لحرف الياء في اخر كلمه فوزي لمفتاح صول
ماتخترش على بال كل الناس واختياره لكلمات اللي يغنيها وانه كان ياما ادي الحان لناس كتير ومكانوش بيعرفو يبرزوه زي ماهو بيبرزه لانه بجد كان اسطوره كبيره اوي اوي اوي
مبارك فوزي فوزك بقلوب احبائك
تهانيا

بكره جاي

كنت كاتب الكلام ده في احدى مدوناتي الخاصه بس محبتش ابخل عليكو بيه

اكوام حجاره اتدشدشت وسط الانقاض
ونارها لما بتطفي بتصبح رماد
صوت الرصاص بطل خلاص
يمكن ده حلمي اني اعيشله او اسمعه وزيي وغيري يتمتعو
بفلسطينيه عالارض ماشيه بتضحك وعايشه عشان امل
تبقا احسن واحده في الدنيا وتستنا الباقي يتعمل
ان الدنيا فيها تتصلح حالها... عشان تسلم الشعله لعيالها
يومها حيبنو ويعمرو ومافيش مجال للاعتراض

وتبقا احتلالها من التاريخ وفي المتاحف صواريخ
موجوده فيها متحنطه وعلى الهزيمه ستر وغطا
يشوفها ولادنا ويترحمو على ايام المرمطه
صفحات بيضا والدم لونها يلغوص في كل حته ويطرطش مساكنها
يطمن منهم شعوب الرعب ساكنها
يامين يخلصهم من غدر ظالمهم ويسجل المكتوب بالتو تاريخهم
في مواجهه الاعادي
ويواجهه في المرايا يغسل دم ضحايا
غرق براعم زرع وموت مفاتنها

بحلم بعد العمار حيكون ايه شكلها
ملامحها من سويسرا ولا اجمل منها
وهدئها في شارعها ولطافة شعبها
اخضر جناين وبساتين .. نوافير وريحية ياسمين
طاغيه وتسرق عشق الحنين
ولو نبص على اقتصادها نلاقيه في القوه متين
اعجاز المولات ورهبه مساجد وكاتدرائيات
ومستقبلها صابح وخيرها طارح ولا حد احسن منها

اجراس تدق مع القلوب واذان بيطرب في الغروب
وليلها ساحر والضيا في الشارع منور الدروب
صوت ميجنا ومواويل تحبس انفاسك بالقليل
واصوات تحس بحبها وعلى مدحها لزم الوجوب

احم احم
يمكن خيالي سرح شويه معرفش قلت داكله ازاي
قاعده صفا وسرحان شويه وبق من كبايه الشاي
خلوني احس بجمال ارضي وخلوني احس ان بكره جاي

Ms3a_miso

سمبلها.... تجملها

جماعة ...هي البساطه حلوه؟؟؟؟؟؟؟؟
اصل ايه احسن لما تعمل حاجه صح وتجملها على قد ماتقدر
ولا تعمل حاجه صح بردو بس بسيطه
؟؟؟؟؟؟
اصلي انا بعاني من الحكايه دي
ممكن اتعب في تجميل الحاجه ويجي حد تاني بشغل بسيط ويدي نتيجه افضل

اينعم خير الكلام ما قل ودل وانا معاكو

بس الحاجه بالنسبالي لو مش متعوب فيها وطالع عيني فيها مايبقاش فيها متعه الشغل
وان فعلا المعنى الصحيح للسمبله انا مفتقده اوي لان لايمكن شغلي اعرف اخليه السهل الممتنع وخصوصا في العماره
ادي الشغل حيديلك
بس انا بالنسبالي الشغل السمبل كروته والاهتمام بالتفاصيل دايما بيوصل للنتيجه الاحسن في كل حاجه
ومنظر اكثر فنيه زي مافي فايل ثري دي ماكس تعبان فيه
تديله حيديلك وماينفعش تسمبل في الماكس دي ابدا والا حيطلع نتيجه وحشه اوي اوي

وما الحياه الا ماكسون كبير يا ولدي
وماتسألونيش ايه اللي ورد في بالي اني اسمي البوست سمبلها تجملها مع اني انا مضاد للسمبله

لو حد يعرف معنى افصح للبساطه في كل حاجه ياريت يقوللي

يوميات شب موهوب موهوم

المشهد التاني

دلوقتي شادي بقا عنده 17 سنه وانهاردا اخر يوم في امتحانات الثانويه العامه
واول حاجه شادي فكر فيها انه بعد الامتحان يروح يغير جو من كتمه المذاكره والدح لانه على الرغم من شخصيته السيئه بعض الشئ
الا انه بجد شاطر اوي ونبيه
فاكان خارج مع صاحبه بعد الامتحانات عبد الحميد وكان عبد الحميد "صايع شويه" والصياعه هنا انه بتاع بنات
من النوع اللي بيقولو عليه مقطع السمكه وديلها
عبد الحميد واقف في الشارع قدام منظر فيه شجر وخضره
وبيقول لشادي شايف يا شدو الجو مز ازاي كده ياه ياد اخيرا بقا حنطلع للحياه ياترى حدخل كليه ايه
يروح شادي قايل بكل ثقه وبنفخه كدابه: ها ...انا اكيد هندسه ومش حرضا بيها كمان
(لانه كان جايب في تانيه 92 %)
عبد الحميد بتريقه : يا سلااااااام .. ليه يعني هندسه حته واحده اه انتا شاطر بس مش اوي كده يعني
وكمان مش حترضا بيها!!!
شادي :طبعا هندسه بقا عايز تقنعني اني بعد ما فركت الورقه فرك حتجيلي حاجه غيرها
(تتنقل الصوره بسرعه لوقت طلوع النتيجه عالنت ..والموقع بيعلق كالعاده من ضغط الناس بس لحسن الحظ جاله
الموقع يفتح بسرعه وبيبشره بنتيجه جميله اوي اوي وزي ماتوقع شادي 88 في الميه ودي طبعا ماتأكلش عيش في بلدنا وخصوصا علمي
المفروض يجيب 110% وبعدين يبدأ يخش زراعة) ماعلينا
اول تعليق لابوه على النتيجه اللي كان شايف النتيجه بتطلع قدام عينه "واكسسسه" 88 % مانتا لو كنت تقعد تزاكر زي الناس مكنش ده بقا حالك
وشادي في سره بيقوله ياعم اسكت بقا هو انا ناقصك
مع اخر حرف يسمعو زراغيت من بيت علي اللي ساكن في العماره اللي قدامهم
ساميه بتقول ده اكيد علي شايف يا خيبه
شادي بنظره مفاجأه ان علي عداه : اه
ساميه : قوم باركله يا خويا لا يقولو اننا بصينلهم في درجه ابنهم
وراح شادي جري على بيت علي عشان يعرف هو جاب كام وبعد ماطلع عالسلم عشان يباركله كانت رانيا نازله
ورانيا دي كانت بنت جميله اوي اصغر من شادي وعلي بسنه وكانت ساكنه في بيت علي في الدور اللي فوق اللي فوقيهم
فا شادي بيبصلها وسرحان فيها وهي نازله لدرجه انه زاحم عليها السلم وهو بيضرب الجرس
فا قالتله عن اذنك راح قايلها اه اتفضلي وراح قايل لنفسه يا عم اتنيل انتا في ايه ولا في ايه
وهو بيقول راح جوز خالته فاتحله الباب وراح قايله بنفس مايعه : اهلا يا حبيبي اتفضل...ايه عملت ايه
راح قايله اه الحمدلله
جو خالته :ايوه يعني كام
راح قايله 88
راح ابو علي قايله باستخفاف :بس ؟؟؟؟
ابو على كان على طول مش بيحب شادي عشان عارف انه ولد مش كويس ابدا
فا شادي يتحسر على نفسه وعينه تبدأ تدمع بعد ماشاف علي فرحان
فراح يسأله ايه جبت كام راح قايله بفرحه فيها ثقه 96
شادي سمع الرقم من هنا ونزلت عليه كالساعقه وبدأ ياكل في نفسه والغل والحقد يغلي في عروقه من علي اللي دايما واقفله زي اللقمه في زوره
.....يتبع

يوميات شب موهوب موهوم

مابين الموهبه والوهم شعره ومابين الموهبه والجنون نفس الشعره وممكن يكون الجنون ده سلبي او ايجابي وزي مابيقولو الفنون جنون
السلبيه في جنون الفن بتكون في اعتقاد الشخص انهو اكبر من الناس في اي حاجه على الرغم انهو مايعرفش حاجه في البطيخ
او حتى ايجابي متمثل في الابداع الدائم اللي بيسابق عجله الزمن عشان يكون احسن واحسن
الشخصيه اللي اختارتها شخصيه مصريه اوي اللي بتحب تحشر نفسها تحت اي حاجه تحت لواء يمكن ينابني من الحب جانب

بطل قصتي سميته شادي (الاسم اللي حسمي بيه ابني لو خلفت ولاد) شادي حتناول قصه حياته من اول ماتولد لحد ما شاء الله
بس احب عرفكو بيه في كل حاجه من صفاته كانوع من المعايشه للشخصيه
اسمه بالكامل شادي أكمل عبدالرحمن عرفه
من مواليد بني سويف
شعره اشقر دليل على العرق الاوروبي اللي فيه لان سته كانت انجليزيه عنده نمش في مناخيره متردد دايما في اي خطوه بيعملها
مناخيره في العلالي دايما وشايف كل الدنيا اقل منه حتى على ابوه اللي بيحبه عارف انه من جواه مش عارف حاجه بس بيكابر
تحت نفس اللواء بتاع يمكن ينوبني من الحب جانب وبيتبتر على اي حاجه تجيله من عند ربنا

المشهد الاول

في لوحه لمنزل عائله متوسطه وفرش مبهدل شويه كان شادي ساعتها عنده ست سنين بالظبط وكانت مامته واخداه وواخده اخوه الصغير علاء اللي عمره سنتين ورايحين عند على ابن خالته وعلي ابن خالته ده عيل لزيز من وهو صغير يعرف ازاي يخطف الضحكه من الكلمه عشان يرميها في بقك فهلوي من صغره يعني
في منظر دخول الست ساميه ام شادي من الباب
تي تو تي تون جرس الباب بصوت عالي
مامة علي : ايوا ايوا حاضر يا ساميه هو انتي على طول مستعجله كده ... استني جايه اهه بس اللي في ايدي
تي تون تي تون جرس الباب تاني
مامة علي وقعت صحن ماللي كانت بتغسلهم
مامة علي: يييييي افتح يا علي
وعلي يجري بسرعه عشان يفتح الباب
تروح مامه شادي حضناه و بايساه وقايلاله اهلا علوه عامل ايه فين ماما
يروح علي قايلها ببراءه طفوله: تي كوه في المطبخ
تروح ساميه معليه صوتها وهي رايحه لام علي
ساميه :ايه ده انتي جوه في المطبخ من ساعه ما قلتلك اني جايه ياختي مابلاش تعب لنفسك
مش كويس كده علشانك بقا
تروح ام علي بايساه وهي بتقولها اهلا يا حبيبتي ويروحو الاتنين يقعدو في الصالون
وساميه تروح قايله لعلي وشادي يلا روحو العبو مع بعض عشان عايزه مامتكو في حاجه
واول ما يقعدو في الصالون تروح ام شادي على طول قاعده على الكرسي المكسور وواقعه بعلاء وعلاء بيعيط من الوقعه
وامه بتهدي فيه وتقول لمامة علي ايه يا نجلا انتو مش حتغيرو الصالون ده بقا ولا حتى تشيلو الكرسي ده
وام علي تهديها ويقعدو يتكلمو مع بعض

ويروحو الولدين داخلين أوضه علي والاوضه بتاعت علي كانت مامته مغرقهاله لعب على الرغم من انهم اسره متوسطه
بس كان رأي مامه على ان سعاده ابني فوق كل شئ وان على لو حس بأي نقص تجاه اي حد وان حد اعلا منه حتثبت في شخصيته وخصوصا انه كان في سن صغير

شادي بيقول لعلي بهدوء ايه كل اللعب دي دانا ماما مش بتجبلي حاجه
علي بأبتسامه:لا انا ماما بتجبلي مش كل اللي انا عاوزه بس كتير اوي بتكبلي لعب
وكان دايما شادي بيبص في اوضه علي على انها اقرب للجنه في كل حاجه
وعشان شادي كان مابيحبش الاحساس اللي بيجيله ده بأن اعلي هو الاحسن ماكنتش بيرتاح الا لما يكسر لعلي لعبة من لعبه
اللي دايما بيكون سبب في نزول دموع علي بكل سزاجه

وتيجي ام شادي تشوف ايه اللي بيحصل لعلي تلاقي شادي كسر لعلي لعبته زي كل اسبوع
تروح مامة شادي لطشاه بالقلم وشادي يحمر خده ويقعد يعيط
يتبع .....

انا حر؟؟؟!!!!

اول شعاع النور بينور البيضه ... يعلنها بعلو الصوت ويقولها بتعريضه
ويقوللي انتا اتولدت..احم .. قصدي اتفقست
نفسك داخل وخارج يزحم دنيا عريضه

اول عياط كتكوت خارج على الدنيا ...

مش عارف ايه مستني
ولا فكر الدنيا عني
ياترى حتحبني ...ولا بغدر حتخونني

حاخدها تاتا تاتا من اول ما بتديت

شفت طير قدامي قلت دي امي ..... من لحمي ومن دمي
عايشه عشان اكبر وترتاح من همي

وعشان معرفش اطير خايف لاكون مسجون
وخايف لا يجي اعادي تدمر كل عيون
بتخرج مية ليا تصحي العطش فيا
تحرمني من كل فرحه ومن اني اشوف الكون

رامي على امي انا في الدنيا كل اعتمادي
هي التجبلي اكلي وتحميني من الاعادي
عايزاني اتصبر ولازم اعيش واصبر
لحد مكبر شويه و اتخلص من عنادي

ولما جيت اكبر ببص لدنيا بشوق
متلهف عايز اطير وافرد جناحي لفوق
واحلق انا في الاعالي وتكون الدنيا تحتي
ومحسش ابدا بحد بيني وبينه فروق

اتحمل مسئوليه واكون عش ليا
واتجوز من طيرة حلو تقاسمني في لقمتي
في الفرح تكون معايا وفي الجرح تبقا مواسيه
تساندني في حاجه وسبب في جرأتي

وانا اتعب نفسي ليها عشان تعيش في سعاده
وحرم اللقمه مني عشان ماتحتجش لحاجه

دي الحريه فنظري مش اعمل النا عاوزه
اكون مسئول عن حد واعيشله طول عمري
سبب في اثبات وجودي ومن اني اعدي حدودي
واوصل بحريتي فوق السما السابعه

شكرا ايها الخنزير

والله ماعارف اشكره ولا ادعي عليه
يامن لحمك محرم لدينا الف شكر
انتا سبب رئيسي في تأجيل الدراسه وفرصه للتطور على الرغم مالخساير اللي ممكن نواجهها لما تجيلنا انفلونزتك
وبما ان الدراسه اتأجلت يعني ممكن الجهل يسود الا بقا لو استغلينا مقوله عم عرفه البواب وهي الحاجه ام الاختراع
واستغلينا النت في التعليم ومن شاء فاليؤمن ومن شاء فاليكفر
يعني مافيش ارغام على التعليم
و اوم يا محمد عشان تروح المدرسه وموال كل يوم بتاع العيال الغتته
وحيكون في الغاء للدروس الخصوصيه
واللي عنده نت هو بس اللي حيتعلم (ابصتي يا لينك انتي وتي اي داتا ) احم احم
ده غير بقا ان بدال الدروس حيكون في توتوريالات تعليميه وفيديوهات تعليميه على اليوتيوب والمواقع التعليميه الخاصه بالمدارس والجامعات
ممكن بجد نستخدم التأخر اللي كان ممكن يحصل اننا نحوله بجد بتطور لحاجه تنفع مصر
غير ان حيكون في مظهر حضاري جميل اوي
هو ان اللي حيعطس او يكح حيكون الناس قرفانيين منه وبتجري
غير كده ممكن مانقلوهوش يرحمكم الله ممكن ندعي عليه بدالها

لا ممكن بقا وهو بيعطس نقتله واحنا راكبين المشروع عشان نحمي الركاب من العدوى مهما كان عنده المرض او لا
والوقايه خير من العلاج
وحيكون مظهر حضاري اوي اننا نمشي بالكمامه يعني من هنا ورايح محدش حيضحك على حد لابسها
وحيكون كل الناس بتغسل ايدها كويس
من الاخر حننضف
اما بالنسبه لكليتي فنون جميله عماره يعني عندنا مشاريع ديزين ده الحل الوحيد
ترغمونا على عمل اللوح بدال على كانسون وطباعه نوفر تمن الطباعه ونشتغل كاد وفوتوشوب وماكس وحنا قاعدين في البيت
والمعيدين يقعدو معانا على الشات الام اس ان او الياهو على حسب المعيد بقا
وبويب كام يشرحلنا
وكذلك الدكاتره يسجلو لنفسهم فيديوهات ويعرضوها
يا سلام ده ايه التطور ده
وكل الاشغال تتم وانتا قاعد في البيت مش لازم ننزل حتى
والبورصه في البيت وكل التنفس في البيت
انا ببص للموضوع على انه نفع مش ضرر ابدا
ولا انا غلطان ؟؟؟؟

انا اسف

مش حلاقي اكتر من هنا فرصه اني اقول اسف على حاجات كتير عملتها
وعشان مافضحش نفسي يعني واللي ربنا ستره احنا مانفضحوش برده

ورغم بأن الاسف مش من شيم الرجال خالص زي مالحجه بتقوللي
بس شايف ان الاعتذار عند الخطأ ممكن يكون مش من شيم الرجال ممكن يكون فعلا من شيم الفرسان :D

تشبيهي للعتذار تفكير معماري شويه وهو لما حيطه تشرب ميه
اول حاجه بتلاحظها عالحيطه هو ان البياض بيطبل ويبدأ لونها يتغير وبعدين تتشقق وتقشر وتقع
يعني الاعتذار لايمكن انه يفضل جوه الواحد والا حيطأ

اسف جدا يا ابن خالتي اني عملت كده معاك بس انتا اللي مش بتنقي نفسك من ناحيتي ساعات بحسك حاببني ومرتاحلي وساعات بشوفك باصصلي في لقمتي
وعايز تبوظلي كل حاجه وخلاص

اسف لهاني اخو هيثم شاكر الفنان الجميل اللي انا استغبيت معاه لما لقيته عامل مسابقه في منتدى هيثم شاكر تقديم اغاني وكده فاكلمت هاني واتغبيت معاه بدال مانتهز الفرصه وده غباء مني بأني وصفت المسابقه لعب عيال وده اللي خلاه مايقبليش كلمه اساسا ومنغير ما يسمعني وراح قايلي فيما معناه ان كلامك حيترمى في الارض ويتداس بالجزمه

اسف لكل انسان اخلصلي وانا دايقته او زعلته في يوم من الايام

اسف لكل واحده حاولت احببها فيا ومعرفتش او حببتها فيا فعلا وانا معرفش

اسف جدا لان ساعات ناس بتستنا مني الكتير وانا بديهم القليل غصب عني او ببخل عليهم برضايا

آسف اني صاحبت اللي في بالي واللي ربنا باعتهولي قدر معرفش بقا ازا كان قدار نافع ولا ضار

اسف اني فضلت كل السنين دي عايش جاهل عن اللي حوايا

اسف اني عايش مع الناس كأني ريكوردر بسجلهم كلامهم متلقي لكني مكنتش عارض مع ان الحياه هات وخد

اسف اني كل ده مكنتش بحاول اتعلم

الباحثات عن العربيه

صباح الخير عليكو لاني بكتب الموضوع ده الصبح... احم احم
كان بيستفزني اوي وقت التمانينات وخصوصا في الافلام ان لازم يحصل حاجه من الاتنين
ياما البنت اهلها مايوافقوش على اللي طالب ايد بنتهم عشان فقير او ان هي اللي ترفض اساسا وتروح متجوزه سباك (ولازم سباك عشان معاه فلوس
ودايما الكشف بيطلع 20 لحلوح)
او ان يحصل انها لو لزما تتجوز حد عادي لازم يكون فلاح مغترب (اشمعنى مغترب ماتعرفش ) مع انها لو راحت البلد عندهم حتلاقي ناس كويسين
المهم كانت موضه وبطلت
وفي النوع الاول كانت البنت تنجرف ناحيه شهوتها الدائمه للفلوس لان فعلا الستات جنس مادي حقير (اقصد مادي جميل) المهم ماعلينا عشان مانتعاركش
كانت البت من دول وهي في غايه الجمال تفضل تقول لمحسن(اللي حيتجوزها) ولازم بعد 3 سنين حب اتجوزك على ايه انا مش مستعده اعيش في الفقر
ركز يا محسن احنا لو اتجوزنا حنجيب عيال متشرده ماحلتهاش اللضا واكمن محسن على نياته بيفضل يتحايل عليها انها ماتسيبهوش وتروح تتجوز السباك
وفي الاخر بعد مايغلب ويطلع عين تربتتيت اي حد من قرايبه يقولها خلاص فاتن اعملي اللي انتي عايزاه
وانا بتمنالك السعاده من كل ألبي (بالهمزه مش بالقاف

لو رجعنا و عقلنا مخنا ازاي بنت جامعيه تتجوز من دكتور سباك معاه مؤهل متوسط ده اذا كان معاه مؤهل اساسا
ولازم يوم الخطوبه يجيبلها اشي شئ وشويات ومشبك وحلويات وسيغه جامده دهب عيار واحد وعشرين عشان يسد بقها اللي مايشبعش
سؤال الحلقه بقا
هل فعلا الستات(النسوان) كائنات ماديه او انا غلطان في الحته ديه؟؟؟
اجابتي انا كسخصيه جباره نعم الستات كائنات ماديه اوي لحد دلوقتي مش في التمانينات بس لا في كل عصر واون وكل همهم كل اول شهر ياخدو مهيه الراجل اول بأول عشان مايخلوهوش يتمتع بحياته
وكل ما الراجل كان غني كل ما اخدو اكتر
وكل همهم هو الشب اللي معاه فيلا وعربيه او شقه وبردو العربيه اساسي عشان ماتتبهدلش في الواصلات
بغض النظر عن شكل الشب ده او حالته الاجتماعيه او مؤهلاته او سلامته العقليه او اي حاجه في البطيخ
فالستات اعيزائي القارئيين هم ليسو الباحثات عن الحريه زي ما في الفيلم لان هم في حريه فعلا من زمان
بل هم الباحثات عن العربيه

طور في ساقيه

عناكب ساكنه القلوب وراميه خيوط عشها على مغاره الافراح
خيطانها ملزقه تستنى تشبك في نسمه هوا تتمسك بالحياه وتمص الجراح
تستنزف حياتك وتدور... تسبق جناح العصفور
وتحبس تنفس الرئه ماللي جوه القفص بيثور

واهي ساقيه دايره حواليها ..فدادين تعب تديها
من عرق شقايا بتسقيها
وطول عطشها بتستنا تتنازل وتحن عليها

واقف محازنك عالغار.. مطاريد جبل تطخ عيار
ترزع كفوفها على بابك واهو كله الا استهتار
كل الاحبه اتفرقو ضلو السلامه ضلو رجوع
وازاي تستنا منهم نجا وفي شارعنا النور مقطوع
ازاي يشوفو سكتهم ومالخوف مسحوبه ابتسامتهم
وكل مايمشو من طريق بيلاقو لوحه ممنوع

وانتا لوحدك كل همك انك تقطع من لحمك عشان تكمل لولادك
مسحوب في دايره و طور في ساقيه
مغمينه وفاهم ان اصحابه ساحبينه
وماشي في خط مستقيم اتاريه في العوج سايقينه

فار تجارب في دايره لافف عشان فلوس الغلب سافف
عرقان بينهج يرتعش واللي بتسبقه هي السلاحف
ويجي في لحظه الرجوع بعدما كان النور مقطوع
يشوف حياته واللي جرا !!!
طب ليه باينه متدمره
ازاي بالنسبه لناس تانيه بقت حياته متأخره
ناس غلابه وناس متدينين وناس عاشقه المسخره
ايه حصل ؟؟ازي سبقوني؟؟...مش كانو بس ينبهوني
ان الدنيا هات وخد للغلب ساعه وللفرح ساعه
آدي التعب هلك فيا وجالي نقص في المناعه
يارتني كنت من كله دقت بدال ماكل من صنف واحد
انا مش معترض ولا كفرت ولا حتى قلت بأني جاحد
فين كل قوتي ...اهو قبل موتي
شايف في عيني دنيا تانيه
ممكن يكون الناس التانيه خلاص شبعو مالدنيا
بس انا ندمت بأني كنت في الغلب اضيع كل ثانيه


Ms3a_miso

السلام عليكم

كنت بفكر من كام يوم ياترى ايه اكتر حاجات ساعدت لتغير مجتمعنا المصري في حاجات كتير لايمكن يكون عيب تكنولوجيا لانها المفروض تساعد في التقريب مش في التبعيد بس اللي حصل " قفله " بمعنى ان السلوك كلها شبكت في بعض وحصلت عمليه عكسيه
لو جينا عملنا عمليه مقارنه قبل وبعد في حاجات كتير خلال السنين اللي فاتت وازاي الانسان اتغير اكتر في العشرين سنه اللي فاته اكتر ماتغير خلال 50 سنه قبلها هي مش نظره للماضي وتحسر وليت الزمان يعود يوما ولازم زمان يكون احسن والكلام ده
المشكله ان حصل خلل وبدال مالعادات تطور للاحسن حصل انها قلت خالص واحتما يكون مابيتخدمهاش الا قليل ومع الوقت حتنقرض وفي منها اتطور فعلا وفي منها زي ماهو
نبتدي بالعادات اللي كانت موجوده ايام زمان وازاي جت الدنيا مع التطور لغتها

كانت ايام زمان قبل ظهور التليفون بشكل عام كانت الناس بتزور بعضها بشكل كبير اوي لمجرد الزياره والاطمئنان او بغرد شرب القهوه اوحتى بغرد السلف انما بعد ظهور التليفون الناس بقت زيارتها قلت لحاجه بتاعت 70 % ومحدش بيسأل عن حد الا بالتليفون انما بقا بعد ظهور الموبايل الوكسه كبرت
اللي حصل ان البشوات بيستخسرو تمن المكالمه بتاعت الكارت في انه يسأل عن حد ونادرا لما يبعت ماسدج حتى

كانت زمان القهاوي معروفه بأنها للمثقفين والفنانين والشعرا والادباء واللي عايزين يشربو حاجه وفي اخر 50 سنه الحاله اتغيرت بقا القهوه للكهله واصحاب المعاشات انما الخيبه التقيله بقا انها بقت دلوقتي متنفس للي قدي واللي اصغر مني كمان بغرد" الصياعه " ان صح التعبير والناس اللي اكبر منهم اللي مش لاقيين شغل اللي لازم يطلعو في كل فيلم او اعلان لازم يكون بيلعب طاوله ماينفعش دومينو او حتى يكون جي يشرب بس ماهو مايعرفش يلعب
كمان ظهر في التمانينات مصطلح كافيتريا على القهاوي النضيفه شويه عشان الحبيبه والمخطوبين وكده يعني انما بقا دلوقتي ظهرت الكافيهات النضيفه
كارلوس وكوستا وجراند كافينه واللي تحت سان ستيفانو اللي انا معرفش اسمه ده ابو مينمم شارج 35 جني ده واسعارهم عاليه معرفش على ايه وكل حته بسعر شكل تقولش عامل النسكافيه بميه الدهب

زمان كان المدرس بيخوف التلميذ على الرغم ان زمان كانو عفاريت اكتر من دلوقتي اشاسا وكانو بيعملو في المدرسين مقالب دلوقتي المدرس بيتضرب عشان الناس بتقوي اولادها عالمدرس وبتقول احنا دافعين فلوس (بيذلوهم باللقمه اللي بيديهالهم) غير كده الجنب التاني المدرس مش عدل هو كمان ماهو كمان ملينا بلاوي مستواه التعليمي ضايع رايح في داهيه معندوش شخصيه واللي عنده شخصيه منهم او بيهزر داخل الفصل او بيضرب عشان دروس
وبعدين الدروس مش عيب زي ماتدفع فلوس عشان تجيب لحمه من اي جزار تدفع فلوس عشان تعلم ابنك صح لاني مش معترف اساسا بمجانيه التعليم اللي مش بتطبق دي
نيجي بقا للوكسه الكبيره وهم البنات كان زمان البنت عندها حياء من اهلها على الرغم ان هيا من جواها مش كده بس خوفها من اهلها كان بيخلي الغلط اقل بكتير دلوقتي مع افتكاس الشات والفيس بوك والكاميرا والديجيتال بقا العط عيني عينك والسيجاره في ايدها عادي ماهو طبعا اهلها سايبنها ماهو عصر حريات ويارتها بعدالجواز ممكن تتغير كمان لا اساسا حتفضل زي ماهي وتربي ولادها على قرف اللي كانت هي بتعمله والولاد اكيد طبعا حيزودو على حسب عصرهم واللي بيجرا فيه
يبقا بعد كده ناقص ايه
كان زمان منتخب مصر مش بيكسب حد خلال التسعينات لدرجه ان ده كان يقين عند شعب مصر اصلا وكان محمود الجوهري بيرعبهم من الخصم وارض الملعب بس لما فازو في بوركينافاسو كنا بنستعجب ايه ده دول فازو ومن هنا بدأت الجرئه عند المصريين اصلا في الكوره وفضلنا نتطور ونتطور لحد ماوصلنا لمستوانا ولسه اللي جي اكتر لان العزيمه بتعمل اكتر من كده

الفن اتغير ملامحه كانت الافلام في قبل السبعينات كلها عن البطل اللي اتجوز البطله وحبو بعض وبوسه في اخر الفيلم في السبعينات كانت وكسه السينما المصريه و الغنا وكل حاجه كان عهد فقر اساسا وظهر افلام الحشيش والحاجات دي وعلى الرغم من كده كان عندنا اكتر من اسم له وزنه في مجاله
في التمانينات بدأت العمليه تعلا شويه والقصص تقوا في التسعينات القصص قويه وتصوير وحش اوي وكمان حكايه الفيديو ساعده في تردي السينما
بس دلوقتي الاسماء اللي بتعمل القصص الحلوه يتعدو على نص ايد واحده واللي بيألفو القصص بتاعت الافلام اتنين وفي الغنا كتييييييييييييييييييييييييراوي
بس المعهم هما افضلهم والباقي مع الوقت حييأسو ويقلو بس الاشاده الصح هي اشاده التصوير الممتاز والاخراج التحفه
وانا شايف ان السيت كوم بعد كده حيبقا له مستقبل كبير

بس ولو عندكو حاجه تانيه قولو :D
والباب مفتوح للمناقشه ايه تاني ممكن نعدله ونغيره للاحسن وازاي

في دوله انتيكا الجمهوريه الشعبيه

في ناس عايشين غلابه اتخنقو مالتقصير
ووحوش عايشين في غابه ونهبين حقول الخير
ايشي رز وقمح فاسد وبطاطس التصدير

عصفور هاجر عشوشه وحاير من التدوير
على مسكن في شجره تانيه ينال فيه التقدير
بيأدي اقصى جهده وتعبان كتير في بعده
مستني عبال ماتفرج ويحصل التغيير

يرجع تاني لعشه اللي كان عليه بيطير
بعد ما الميه جفت من ساقيه الاساطير
مستني ربك يكرم بمطره تبني ماتهدم
بتحي اول برعم في طينه ارض الخير

في البحر بين المراسي في فلوكه عايزه تصيد
سرقه منها الرزق سفينه عليها عبيد
عايشين بالاقطاعيه مخصوم منهم مهيه
عايشين في وسط قراصنه بتفرض التهديد

في دوله حتى النت فيها بتحدده
حالفه على الشعب يمين وحالفه لاتهججه
ويقولو الرزق عالي دانا شعبي عندي غالي
داحنا عنينا الشعب ونموت ولا نعكننه

مافيش غير الاغاني تهون علينا عيشتنا
والكوره هي الوحيده اللي تردلنا كرامتنا
نتبهدل عشان عشتنا ولازم نرضا بطاقتنا
الغلب ده كارنهنا والكلمه دي بطاقتنا

صحيح ان التغيير لازم يحون بأصول
لازم نصبر شويه مش نحرق المحصول
من بعد الصحرا نعود ونرش كل الدود
حتطلع ثمره حلوه في اخر العنقود